Dios okinots Abram
12
ToTEKO okijlij Abram:
“Xkajteua mopaís,
on mofamilia,
niman on ken kinta motataj,
niman xuiya kampa nejua nimitsititis.
2 Niman nimitsmakas miyekej mokoneuan,
niman sanoyej nikinmiyekilis mouejkakoneuan ipan in tlajli niman nochiuaskej sen ueyi país.
Nimitstiochiuas niman nikchiuas para nochiuiyan ma mitsixmatikan.
Niman motechkopa kiseliskej tlatiochiualistli oksekimej.
3 Nikintiochiuas on yejuan mitstiochiuaskej.
Pero on yejuan mitstlaueliskej,
nejua nikintlauelis.
Motechkopa tejua nikintiochiuas nochi kech familias nemij ipan tlaltikpaktli.”
4 Kemaj Abram okis ken toTEKO okinauatij.
Niman Abram kipiyaya 75 xipan ijkuak okis ipan on ueyikalpan Harán para oyaj ipan on tlajli Canaán.
5 Niman Abram okuikak Sarai isiuau,
niman Lot on isobrino.
Niman no ijki,
okiktik nochi on miyek tlajtlamach* yejuan kipiyaya.
Okinuikak nochimej on esclavos yejuan iuan uajlayaj de on kalpan Harán kampa okinkojka para iyaxkauan.
Ijkon tej,
okiskej para oyajkej ne Canaán.
Ijkuak yejuamej oajsikej ipan on tetlalpan Canaán,
6 Abram okipanok on tlajli hasta oajsikej kampa onkaj on ueyi tlatiochijkaauakojtli yejuan itoka More nisiu on ueyikalpan Siquem.
Ipan on tiempo nemiyaj Cananeos ipan on tlajli.
7 Ompa toTEKO ononextij itech Abram,
niman okijlij:
“In tlajli nikinmakas mouejkakoneuan.”
Kemaj Abram okichijchiu sen tlaixpan* para toTEKO pampa ompa okinotitij.
8 Sakin,
oyaj ochantito kampa tepeyoj,
kampaka ikisayan tonaltsintli de on ueyikalpan Betel niman ompa okintelketskej iminkajkaluan.
On ueyikalpan Betel nokauaya kampaka ikalakiyan tonaltsintli,
niman on ueyikalpan Hai nokauaya kampaka ikisayan tonaltsinli.
Niman ompa Abram okichijchiu okse tlaixpan* niman okimauistilij toTEKO.
9 Sakin,
oksejpa opeu nejnemi hasta ijki oasik ipan on tlajli yejuan itoka Néguev.
ToTEKO okimanauij Abram iuan Sarai ne Egipto
10 Ipan on tiempo onkatka mayantli ipan on tlajli pampa on tlajli xtlatlakitiaya.
Kemaj Abram oyaj,
ochantito ipan on tlajli Egipto ipan se tiempo pampa melauak xitlaj* onkatka tlen kikuaskej kampa nemiyaj.
11 Niman ijkuak ye kalakiskiaj Egipto,
Abram okijlij isiuau Sarai:
“Xkita,
kuajli nikmati ika sanoyej tikualtetsin.
12 Niman ijkuak on chanejkej Egipto mitsitaskej,
kijtoskej:
“In siuatl,
yejua isiuau in tlakatl.”
Nejua nechmiktiskej niman uelis mitsuikaskej.
13 Yejua ika,
para maka itlaj topan nochiuas,
xkijto ika tinokniu.
Ijkon techseliskej kuajli,
niman xnechmiktiskej san mopampa.”
14 Ijkuak oajsikej ne ipan on tlajli Egipto,
on chanejkej okitakej ika Sarai sanoyej kualtetsin.
15 Niman on uejueyi tekiuajkej yejuan nemiyaj ichan on rey no ijki okitakej,
niman okijlitoj on rey ika on siuatl sanoyej kualtetsin.
Kemaj on rey otlanauatij ma kuajuikilikan ichan para kinosiuatis.
16 On rey okiselij Abram sanoyej kuajli ipampa Sarai.
Niman on rey okimakak Abram,
borregos,
uakaxtin,
polokomej*,
camellos niman esclavos yejuan tlakamej niman siuamej.
17 Pero toTEKO ocastigaro on rey iminuan nochi on yejuan nemij ichan ikan kokolistin yejuan sanoyej temojtij pampa okinoyaxkatij* Sarai niman okuikak ichan.
18 Yejua ika,
on rey okinots Abram niman okajuak.
Ijkin okijlij:
“¿Tline* ijkon otinechchiuilij?
¿Tline xotinechijlij ika in siuatl mosiuau?
19 Tejua otikijtoj ika mokniu,
niman yejua ika oniktilan para nosiuau yeskia.
Aman tej,
nikan nemi.
¡Xkuika niman xuiya!”
20 Kemaj on rey otlanauatij para ma kuajkixtikan Abram ne Egipto iuan isiuau niman nochi tlen kipiyaya.