Abram niman Lot onoxelojkej
13
Ijkon tej,
Abram okis ne Egipto iuan isiuau,
iuan Lot niman nochi on tlen kipiyayaj.
Kemaj onejnenkej para norte ika,
niman oksejpa okalakkej ipan on tlajli Canaán ipan on xalpatlakan yejuan itoka Neguev.
2 Niman Abram sanoyej yoricojtiaka.
Kipiyaya miyek oro,
plata niman yolkej.
3 Ijkuak okiskej Neguev,
oyajkej ika yolik niman kanaj noteltiayaj,
hasta kaman oajsikej Betel.
Niman sakin*,
oajsikej kampa onokajkaj achtoj itsajlan Betel niman Hai.
4 Sa no ompa oajsikej kampa okichijchijka sen tlaixpan*.
Niman ompa oksejpa okimauistilij toTEKO.
5 Lot yejuan yaya iuan Abram.
No ijki yoricojtiaka.
Kipiyaya miyek yolkej ken Abram on itioj.
Kipiyaya miyek borregos,
chivos,
uakaxtin niman miyekej tekitkej yejuan chantiyaj inuan.
6-7 Niman on tlajli kampa chantiyaj Abram niman Lot,
xok kimajxiliaya para tlakuaskej nochi iminyolkauan.
Yejua ika,
itlakeualuan Abram yejuan kitlajpiyaliayaj ika iyolkauan nokualaniayaj iminuan on yejuan kitlajpiyaliayaj Lot ika iyolkauan.
Ijkon tej,
Abram niman Lot xok ueliyaj nemij san seknek pampa kimpiyayaj sanoyej miyek yolkej niman pampa on cananeos niman ferezeos sanoyej kimpajsolouayaj.
8 Kemaj se tonajli Abram okijlij Lot:
“Tejuamej tiiknijtin.
Xkuajli para titokualaniskej,
nion motlakeualuan nokualaniskej iuan notlakeualuan.
9 Ma titoxelokan.
Xkita,
ompa on onkaj nochi on tlajli para tiktlapejpenis kampa tiknekis.
Tla tikneki tias tlayekmakopa,
nejua nias para tlaopochmakopa.
Niman tla tias para tlaopochmakopa,
nejua nias para tlayekmakopa.”
10 Niman Lot okonixtlaloj nochi on kualtsin tlajli de on río Jordán hasta Zoar.
Okitak ika kipiyaya miyek atl,
niman katka ken on xochiyoj ne Eden.
Nesiya sanoyej kualtsin ken on tlajli de Egipto.
Ijkin katka ijkuak toTEKO xe kimpopolouaya on kalpanmej Sodoma niman Gomorra.
11 Kemaj Lot okitlapejpenij nochi on ixtlauatl nisiu de on río Jordán,
niman oyaj para kampaka ikisayan tonaltsintli.
Ijkon onoxelojkej Abram niman Lot.
12 Ijkon tej,
Abram onokau ipan on tlajli de Canaán niman Lot oyaj ochantito ipan on uejueyikalpanmej kampa ixtlauatl.
Oajsik ne nisiu on ueyikalpan Sodoma,
13 kampa on tlakamej onouikakej sanoyej xkuajli.
Sanoyej tlajtlakouayaj ixpan toTEKO.
14 Sakin,
ijkuak Lot yonoxeloj,
toTEKO okijlij Abram:
“Abram,
xontlacha uejka kampaka norte niman neka sur,
niman neka kampaka ikisayan tonaltsintli,
niman neka kampaka ikalakiyan tonaltsintli.
15 Nochi in tlajli yejuan tiueli tikita,
nimitsmakas tejua niman mouejkakoneuan para nochipa.
16 Nikchiuas para sanoyej ma miyekiyakan mouejkakoneuan ijkon ken miyek xajli.
Niman tla yakaj ueliskia kipouaskia on xajli yejuan onkaj ipan in tlaltikpaktli,
no ijki uelis kimpouas nochimej mouejkakoneuan.
17 Xmotelketsa niman xnejnemi ipan nochi in tlajli.
Xkita kech ika ueyak niman patlauak in tlajli pampa nejua nimitsmakas.”
18 Kemaj Abram okejkuanij ikal niman okitelketsato kampa onkatka sen tlatiochijkaauakojyoj yejuan iyaxka* katka sen tlakatl itoka Mamre yejuan onka itech on ueyikalpan Hebrón.
Niman ompa Abram okichijchiu sen tlaixpan* para toTEKO.