On torre yejuan itoka Babel
11
Ipan on tiempo nochimej on tlakamej yejuan nemiyaj ipan in tlaltikpaktli okipixkej san sen imintlajtol.
2 Niman ijkuak okiskej ne kampaka ikisayan tonaltsintli,
okinextijkej sen ixtlauatl ipan on tlajli itoka Sinar,
niman ompa onokajkej on tlakamej.
3-4 Kemaj se tonajli yejuamej okinojlijkej:
“Xuajlakan,
ma tikchijchiuakan sen ueyikalpan niman sen ueyi torre yejuan ajsis hasta ipan cielo.
Ijkon nochimej techixmatiskej ika tiueyixtokej.
Niman ijkon xok nonekis titoxexeloskej niman tiaskej sa kanika ipan tlaltikpaktli.
Ma tikchijchiuakan tabiques niman ma tikikxitikan kuajli ipan tlitl.”
(Yejuamej xokuikej tetl,
yej okuikej tabiques de sokitl.
Niman okipepechojkej ikan chapopojtli.)
5 Pero toTEKO ouajtemok para otlachako ipan on ueyikalpan,
niman no okitako on torre yejuan on tlaltikpaktlakamej kichijchiuayaj.
6 Kemaj toTEKO onokuep ne iluilkak niman okinojlij:
“On tlakamej nemij san seknek,
niman kipiyaj san sen imintlajtol.
Ijkon tej,
tla yejuamej aman kichijchiuaj in torre ken kinekij,
sakin* uelis kichijchiuaskej nochi san tlen yejuamej kinekiskej.
7 Más kuajli para titemoskej niman tikimpatiliskej imintlajtol para ijkon xok ueliskej notenkakiskej.”
8 ToTEKO ijkon okichiu para okiteltij imintekiu niman xok okichijchijkej on ueyikalpan.
Niman ijkon okinchajchayau on tlakamej nochiuiyan ipan tlaltikpaktli.
9 Niman on ueyikalpan okitokayotijkej Babela Ijkon itoka pampa ompa toTEKO okipatlak imintlajtol nochimej on tlakamej yejuan nemij ipan in tlaltikpaktli para xok ouelkej onotenkakkej.
Niman de ompa,
toTEKO okinchajchayau nochiuiyan ipan tlaltikpaktli.
Iuejkakoneuan Sem
10 In yejua imintoka iuejkakoneuan Sem.
Ijkuak yopanok on apachiuilistli,
niman ome xipan sakin* ijkuak Sem kipiyaya se 100 xipan,
otlakat Arfaxad on ikoneu.
11 Sakin,
Sem sanken* onen okse 500 xipan niman okimpix más ikoneuan,
tlakamej niman siuamej.
12 Niman ijkuak Arfaxad kipiyaya 35 xipan,
otlakat Sala on ikoneu.
13 Sakin,
Arfaxad sanken* onen okse 403 xipan niman okimpix más ikoneuan,
tlakamej niman siuamej.
14 Sala kipiyaya 30 xipan ijkuak otlakat Heber on ikoneu.
15 Niman sakin*,
Sala sanken* onen okse 403 xipan niman okimpix más ikoneuan,
tlakamej niman siuamej.
16 Heber kipiyaya 34 xipan ijkuak otlakat Péleg on ikoneu.
17 Sakin,
Heber sanken* onen okse 430 xipan niman okimpix más ikoneuan,
tlakamej niman siuamej.
18 Niman ijkuak Péleg kipiyaya 30 xipan,
otlakat Reu on ikoneu.
19 Sakin,
Péleg sanken* onen okse 209 xipan niman okimpix más ikoneuan,
tlakamej niman siuamej.
20 Reu kipiyaya 32 xipan ijkuak otlakat Serug on ikoneu.
21 Sakin,
Reu onen okse 207 xipan niman okimpix más ikoneuan,
tlakamej niman siuamej.
22 Niman ijkuak Serug kipiyaya 30 xipan,
otlakat Nacor on ikoneu.
23 Niman sakin*,
Serug onen okse 200 xipan niman okimpix más ikoneuan,
tlakamej niman siuamej.
24 Nacor kipiyaya 29 xipan ijkuak otlakat Taré on ikoneu.
25 Sakin,
Nacor sanken* onen okse 119 xipan niman okimpix más ikoneuan,
tlakamej niman siuamej.
26 Niman Taré kipiyaya 70 xipan ijkuak otlakat Abram,
Nacor niman Harán on ikoneuan.
Iuejkakoneuan Taré
27 Ijkin imintoka katkaj inuejkakoneuan Taré.
Taré onochiu tajtli de Abram,
Nacor niman Harán.
Niman sakin*,
Harán onochiu tajtli de Lot.
28 Pero Harán omik ijkuak xe mikiya itataj.
Omik kampa otlakat,
ipan on ueyikalpan itoka Ur ipan on tlajli kampa nemij on Caldeos.
29 Abram okinosiuatij Sarai,
niman Nacor okinosiuatij Milca,
yejuan ichpoch Harán niman ikniu katka Isca.
30 Niman Sarai xueliya kimpiyaya ikoneuan pampa tetsakatl* katka.
31 Taré onen ipan on ueyikalpan Ur ipan on tlajli kampa chantij on Caldeos,
niman okis para oyaj ipan on tlajli Canaán.
Taré okuikak Abram,
itelpoch,
niman Sarai,
isiuamon,
niman Lot,
ixuiu,
yejuan itelpoch katka Harán yejuan omik.
Pero ijkuak yejuamej oajsikej ipan on ueyikalpan Harán,
ompa onokajkej.
32 Niman ompa omik Taré ijkuak kipiyaya 205 xipan.