Ijkuak ouak on miyek atl
8
Pero Dios xokelkau Noé niman nochimej on yolkej yejuan nemiyaj ijtik on ueyi akajli*.
Yej Dios okichiu para ma ajaka chikauak ipan on atl yejuan onkatka ipan on tlaltikpaktli.
Yejua ika,
on atl opeu temoua.
2 Onotsakukej on amelyaltin kampa kueponiya on miyek atl ijtik on tlajli,
niman xok okiau.
3 Ijkon on atl opeu yolik temotiu,
niman ipan 150 tonajli miyek otemok.
4 Niman ijkuak oajsik on 17 tonajli de on chikome metstli,
on akajli onoteltito ipan on tepeyoj itoka Ararat.
5 Mojmostla más temotiaya on atl.
Niman ijkuak oajsik on achtoj tonajli de on majtlaktli metstli,
oneskej inkuapan on tepemej.
6 Kemaj Noé okichix okse 40 tonajli,
niman okitlapoj on ventana yejuan okichijchiu ipan on akajli.
7 Niman okimakau sen kakalotl.
Niman on kakalotl patlantinemiya san kanika kampa ueliya hasta okichix ma uaki on atl.
8 Sakin,
no ijki okimakau sen paloma para kitaskia tla youak on tlajli.
9 Pero on paloma onokuep ipan on akajli pampa xkanaj okinextij para notlalis,
pampa on tlajli tentoya ikan atl.
Kemaj Noé onkonkixtij ima,
niman okonan on paloma niman okalaktij.
10 Kemaj Noé okichix okse chikome tonajli niman oksejpa okimakau on paloma ikiauak on akajli.
11 Sano ipan on tiotlak ijkuak ye peuaya tlayouatia,
on paloma onokuep niman kuajkiya ipan itenchochopiyaj sen ixojyo olivojkojtli xoxoki yejuan kemach okitek.
Ijkon Noé okimat ika on tlajli ye uaktiaya.
12 Niman Noé oksejpa okichix okse chikome tonajli niman kemaj oksejpa okimakau on paloma.
Pero ijkuak on,
on paloma xok onokuep.
13 Kemaj ijkuak Noé kipiyaya 601 xipan ipan on achtoj tonajli de on achtoj metstli,
otlan uaki on atl.
Kemaj Noé okixtilij ikuatsaka on akajli niman okitak ika ye tlauaktikatka.
14 Niman ipan on tonajli 27 de on ome metstli,
otlan uaki on tlajli.
15 Kemaj Dios okijlij Noé:
16 “Xkisa de on akajli iuan mosiuau,
mokoneuan niman mosiuamonuan.
17 No ijki,
xkinkixti nochimej on yolkej yejuan nemij mouan.
Xkinkixti on totomej niman nochimej on yolkej para ma uiyan,
niman ma kimpiyakan miyekej inkoneuan niman ma kitemiltikan in tlaltikpaktli.”
18 Kemaj Noé niman isiuau,
ikoneuan niman isiuamonuan,
okiskej de on akajli.
19 No ijki,
okiskej nochimej on totomej,
niman nochi yolki yejuan tepeyolki tekuanimej,
niman yejuan kalpanyolkej niman nochi yejuan noteuilanaj.
Niman cada se de on sesentlamantikej yolkej okiskej ken itlakatilis.
20 Kemaj Noé okichijchiu sen tlaixpan* para toTEKO.
Niman okikuik de cada se on sesentlamantikej yolkej niman cada se de on sesentlamantikej totomej yejuan kuajli para uentli.
Niman okinmiktij,
kemaj okitlalij on uentli yejuan nochi tlatla ipan on tlaixpan* para toTEKO.
21 Kemaj toTEKO okijneku ipokyo yejuan ajuiyak,
niman yejua okinojlij:
“Xokaman nicastigaros in tlaltikpaktli ipampa imintlajtlakoluan on tlakamej,
pampa sen tlakatl desde ijkuak konetl san kinemilia kichiuas on tlen xkuajli.
No ijki,
aman xokaman nikimpolos nochi kech yejuan yoltikaj ijkon ken onikchiu aman.
22 ’Chika onkaj in tlaltikpaktli,
nochipa onyas tokalistli niman pixkalistli.
Nochipa onyas on tiempo ijkuak tonas,
niman on tiempo ijkuak seuas.
Onyas on tonalko niman on xopantla.
Nochipa onyas tonajli niman tlayouajli.
In tlajtlamach* xkaman tlamis san chika onkaj tlaltikpaktli.”