Dios okuajtitlan on apachiuilistli
7
Kemaj toTEKO okijlij Noé:
“Nixpan san tejua tiyolmelajki de nochi on tlakamej yejuan aman nemij.
Yejua ika tej,
xkalaki ipan on akajli* iuan mosiuau niman mofamilia.
2 Xkinuika mouan chichikome okichyolkej niman chichikome siuayolkej de nochi on sesentlamantikej yolkej yejuan kuajli para uentli.
Pero xkuika san se okichyolki niman san se siuayolki de nochi on sesentlamantikej yolkej yejuan xchipajkej ixpan Dios para uentli.
3 No ijki,
xkinuika chikome okichtin niman chikome siuamej de nochi on sesentlamantikej totomej para oksejpa xinachiuiskej ipan in tlaltikpaktli.
4 Ijkon xchiua pampa ipan chikome tonajli nikchiuas para ma kiaui,
niman kiauis 40 tonajli niman 40 yeuajli.
¡Niman ijkon nikimpolos nochi kech yoltokej nemij yejuan onikintlalij ipan in tlaltikpaktli!”
5 Niman Noé okichiu nochi ken toTEKO okinauatij.
6 Noé kipiyaya 600 xipan ijkuak on apachiuilistli okitlapachoj in tlaltikpaktli.
7 Ijkon tej,
Noé okalak ipan on akajli iuan ikoneuan,
isiuau niman isiuamonuan para onomanauijkej de on apachiuilistli yejuan ouajlaj.
8-9 Kemaj ojomemej oualajkej de nochi on yolkej kampa nemiya Noé ipan on ueyi akajli.
Oualajkej yolkej yejuan chipajkej ixpan Dios para uentli,
niman yejuan xchipajkej ixpan Dios,
on yejuan patlanij niman on yejuan noteuilanaj.
Okalakkej sen okichyolki niman sen siuayolki de cada se on sesentlamantikej yolkej ken Dios otlanauatij.
10 Niman ipan chikome tonajli,
ouajlaj on temojtij apachiuilistli ipan tlaltikpaktli.
11 Ijkuak Noé kipiyaya 600 xipan,
ipan on 17 tonajli de on ome metstli,
otlapojkej nochi amelyaltin niman nochiuiyan kueponiya on atl yejuan onkaj ijtik tlajli.
No ijki,
opeu sanoyej chikauak kiaui.
12 Niman 40 tonajli niman 40 yeuajli sanoyej okiau ipan tlaltikpaktli.
13 Ipan sa no yejua on tonajli ijkuak opeu kiaui,
Noé okalak ipan on ueyi akajli iuan ikoneuan,
Sem,
Cam niman Jafet niman isiuau niman yeyi isiuamonuan.
14 Niman iminuan okalakkej nochi on sesentlamantikej tepeyolkej tekuanimej,
niman on yejuan kalpanyolkej,
on yejuan noteuilanaj,
niman nochi seseknekamej totomej.
15 Nochimej yolkamej okalakkej ojomemej iuan Noé ipan on ueyi akajli.
16 Okalakkej sen okichtli niman sen siuatl ken Dios okinauatij Noé.
Sakin,
ijkuak Noé yokalakkej ijtik on akajli,
toTEKO okitsakuako itsakuijlou on akajli.
17 On apachiuilistli ouejkau 40 tonajli niman on atl más uajlaya.
Kemaj ijkuak opeu tlejkoua on atl,
on akajli no opeu tlejkotiu,
niman opeu kuika on atl.
18 On atl más otlejkok niman sanoyej uejkatlan onochiu,
niman on akajli onokajtiaj ixko on atl.
19 On atl más tlejkotiaya hasta okintlapachoj on tepemej yejuan más ueuejkapanmej ipan tlaltikpaktli.
20 Niman sakin*,
ijkuak yokintlapachoj on tepemej,
otlejkok on atl okse chikome metro ikuapan on tepemej.
21 Ijkon omik nochi kech yejuan yoltikaj ipan in tlaltikpaktli.
Omikkej nochimej totomej,
niman on yejuan tepeyolkej,
niman yejuan kalpanyolkej.
No ijki,
omikkej nochimej sesentlamantikej yolkej yejuan noteuilanaj,
niman nochimej on tlaltikpaktlakamej.
22 Nochi kech onkatkaj ipan tlajli niman nochi kech nijyotiaya ipan in tlaltikpaktli omikkej.
23 Noé niman nochimej yejuan nemiyaj ipan on akajli san yejuamej xomikkej.
Nochimej on oksekimej okimpoloj.
Nochi tlakatl,
yolkej,
totomej niman nochi yejuan noteuilanaj omikkej.
24 Niman on atl okitlapachoj nochi tlaltikpaktli 150 tonajli.