Iminxompayejyeualis on tlakamej ipan in tlaltikpaktli
6
On tlaltikpaktlakamej opeu tojlantij nochiuiyan ipan in tlaltikpaktli niman okimpixkej iminichpochuan.
2 On yejuan kinkuitiayaj itelpochuan Diosa X” okintakej ika iminichpochuan on tlaltikpaktlakamej sanoyej kualtsitsimej.
Kemaj okintlapejpenijkej yejuan kinuelitayaj niman okinnosiuatijkej.
3 Niman toTEKO okijtoj:
“Xnikinkauilis on tlakamej ma nemikan para nochipa ipan in tlaltikpaktli pampa yejuamej san tlaltikpaktlakamej yejuan mikiskej.
Yejua ika,
inemilis yes san 120 xipan.”
4 Ipan on tiempo opeu nemij on uejueyi tlakamej ipan in tlaltikpaktli ijkuak “ikoneuan Dios” onosentlalijkej iuan iminichpochuan on tlakamej para kimpiyaskej inkoneuan iminuan.
Sakin,
inkoneuan yejuamej onochijkej uejueyi tlakamej yejuan nochiuiyan kinmixmatiyaj.
5 Niman toTEKO okitak ika on tlakamej kichiuayaj nochi tlen sanoyej xkuajli ipan in tlaltikpaktli.
Nochipa san kinejnemilijtikatkaj kichiuaskej on tlen xkuajli.
6 Yejua ika,
toTEKO onajman ika okinchijchiu on tlaltikpaktlakamej,
niman sanoyej onoyolkokoj.
7 Niman toTEKO okinojlij:
“Nikimpopolos on tlaltikpaktlakamej yejuan oninkintlalij ipan on tlaltikpaktli.
No ijki,
nikimpopolos nochi on yolkej,
totomej niman yolkej yejuan noteuilanaj ipan tlajli.
Ninajmana niman niknemilia:
¿Hasta tline* onikinchijchiu?”
8 Pero toTEKO kipakaitaya Noé.
Noé okichijchiu sen ueyi akajli*
9-10 Noé okipix yeyi itelpoch.
Ijkin imintoka katka:
Sem,
Cam niman Jafet.
Aman nemechijlis on tlen okipanok Noé.
Noé katka sen kuajli yolmelaki tlakatl yejuan nochipa kitlakamatiya Dios.
Niman no yolmelajki katka intsajlan on tlakamej ipan on tiempo.
Yejua nouikaya ken Dios kinekiya.
11 Pero ipan nochi in tlaltikpaktli,
sanoyej onkatka on tlen xkuajli ixpan Dios,
niman nochimej on tlakamej nochiuiyan sanoyej xuajli nouikayaj.
12 Niman Dios okitak ika in tlaltikpaktlakamej xkuajli nemiyaj,
pampa nochi tlakatl xok kuajli ipan iminyojlo ipampa on tlajtlakojli.
13 Kemaj Dios okijlij Noé:
“Nikimpopolos nochimej on tlaltikpaktlakamej ipan in tlaltikpaktli pampa nochimej sanoyej xkuajli nouikaj.
Yejua ika,
impampa nikpopolos nochi tlen onkaj.
14 Aman xchijchiua sen ueyi akajli* ikan kojtli* yejuan okotsoyoj itoka gofer,
niman ijtik xchijchiua ikan cuartojtsitsimej.
Xtsajtsakua ikan chapopojtli ijtik,
niman tlapani para maka kalakis atl.
15 Ijkon xchijchiua on ueyi akajli.
Xchijchiua 135 metros ika ueyak,
22 metros ika patlauak,
niman 13 metros ika uejkapan.
16 Xchijchiua on akajli de yeyi piso,
niman xtlalili sen ventana nisiu tlapani.
Niman xtlalili sen itsakuijlou ipan se lado.
17 Nejua nikuajkis sen apachiuilistli.
On atl nomanas niman ueyiyas hasta tlakpak para kitlapachos nochi tlajli,
niman nochi tlen yoltikaj ipan in tlaltikpaktli mikis.
Nochi tlen onkaj ipan in tlajli poliuis.
18 Pero nikchiuas sen pacto* nemouan para nemechmanauis.
Tejua tikalakis ijtik on akajli niman kalakiskej mouan mosiuau,
motelpochuan niman mosiuamouan.
19-20 No ijki,
on yolkej niman totomej de nochi sesentlamantikej yejuan nemij ipan in tlaltikpaktli uajlaskej motech para maka mikiskej.
Xkinuika mouan ijtik on akajli,
sen okichyolki niman sen siuayolki de nochi sesentlamantikej yolkej.
21 No ijki,
xkikti mouan nochi tlajtlamach* tlakuajli yejuan nonekis nenkikuaskej nemejuamej niman nochi tlakuajli yejuan tlakuaskej on yolkej niman xkeua ipan on akajli.”
22 Niman Noé okichiu nochi ken Dios okinauatij.