On pacto* yejuan Dios okichiu iuan Noé
9
Kemaj Dios okintiochiu Noé niman ikoneuan ikan in tlajtojlij:
“Xkimpiyakan miyekej nemokoneuan,
niman xtemiltikan in tlaltikpaktli.
2 Nochi kech yolki nemi ipan in tlaltikpaktli mechmakajsiskej.
Nochi kech totomej,
nochi kech yolki nemi ipan tlajli niman nochi kech nemi ipan mar,
uelis nenkinmoyaxkatiskej.
3 Uelis nenkikuaskej nochi kech yolki nemi pampa nemechmaka nochi para nemotlakual.
No ijki,
nemechmaka nochi xojtli yejuan xoxojki para nemotlakual.
4 Pero onkaj tlinon xkuajli para nenkinkuaskej.
Xuelis nenkikuaskej nakatl ikan iyesyo,
pampa inemilis sen yolki onkaj ipan iyesyo.
5 Tla yakaj kimiktis sen tlakatl,
noneki no mikis.
Niman tla sen yolki kimiktis yakaj tlakatl,
on yolki noneki no mikis.
Melauak,
noneki cada se niktlaxtlaualtis on tlinon kinchiuilia oksekimej tlakamej.
6 ’Tla yakaj kimiktia sen tlakatl,
on temiktijketl no yakaj kimiktis,
pampa Dios okijchijchiu on tlaltikpak tlakatl
ken yejua itlachalis.
7 Pero nemejuamej xkimpiyakan miyekej nemokoneuan.
Sanoyej xmomiyekilikan
niman xtemiltikan in tlaltikpaktli ikan nemouejkakoneuan.”
8 Dios no okijlij Noé niman ikoneuan:
9 “¡Kuajli xkitakan!
Aman nikchiua pacto* nemouan inuan nemouekakoneuan,
10 niman inuan nochi on yolkej yejuan nemij,
yejuan okiskej ipan on akajli* nemouan:
On totomej,
on kalpan yolkej,
on tepeyolkej tekuanimej niman iuan nochi kech yolki nemi ipan tlaltikpaktli.
11 Nikchiua pacto* nemouan ika xokaman oksejpa nikimpolos ikan atl nochimej on tlakamej niman nochimej on yolkej.
Xok kaman onyas okse temojtij apachiuilistli ipan nochi tlaltikpaktli yejuan kipopolos nochi.
12 In yejua neskayotl de on pacto* yejuan nikchiua nemouan niman iminuan nochimej yolkej para nochipa.
Mechititis ika xokaman onyas sen temojtij apachiuilistli yejuan kimiktis nochi tlakatl niman nochi yolki.
13 Niktlalis on kosemalotl ipan moxtli niman onyas ken sen neskayotl de on pacto* yejuan nikajteua ipan in tlaltikpaktli.
14 Ijkuak nikchiuas para ma uajla moxtli ipan tlaltikpaktli,
niman on kosemalotl nonextis ipan on moxtli,
15 ijkuakon nikelnamikis on pacto* yejuan onikchiu nemouan niman iminuan nochi on sesentlamantikej yolkej.
Aman xokaman onyas on temojtij apachiuilistli yejuan kipolos nochi on tlen onkaj.
16 Ijkuak nikitas on kosemalotl yejuan nonextis ipan moxtli,
nejua nikelnamikis on pacto* yejuan nejua,
nemoDios,
onikchiu para nochipa nemouan,
niman iminuan nochi tlakatl,
niman nochi kech yolki yejuan nemi ipan in tlaltikpaktli.
17 In kosemalotl yejua neskayotl de on pacto* yejuan oniktlajli iuan nochi tlakatl niman nochi yolki yejuan nemi ipan in tlaltikpaktli.”
Ijkon tej,
Dios okijlij Noé.
Noé niman ikoneuan
18 Ikoneuan Noé,
yejuan iuan okiskej ipan on akajli,
katka Sem,
Cam niman Jafet.
(Sakin,
Cam onochiu tajtli de Canaán.)
19 Intech in yeyimej itelpochuan Noé niman inuejkakoneuan,
okiskej nochimej on tlakamej yejuan sakin* onochayajkej nochiuiyan ipan in tlaltikpaktli para okitemiltijkej.
20 Noé ika nokauaya tlatokaya,
niman yejua achtoj tlakatl yejuan opeu kitoka uvas.
21 Se tonajli Noé okonik miyek vino niman otlauan.
Kemaj tlajkaltoya tsotsoltik ikalitik ipan ikajkal.
22 Ijkuak Cam,
yejuan itataj Canaán,
okitak ika itataj tlajkaltok tetsotsoltik,
oyaj okinmijlito ikniuan.
23 Kemaj Sem niman Jafet okuikej sen tela,
niman okinotlalilijkej imintlakapan,
niman otsinkistiajkej para maka kitaskej imintataj tsotsoltik.
Ijkuak okalakkej kalijtik,
otlachixtiajkej okse lado para xokitakej Noé,
niman okitlapachojkej ikan sen tela.
24 Niman ijkuak Noé otlachix de on itlauanalis,
okimat on tlen Cam itelpoch yejuan piten okichiu,
niman ika xokitlakaitak.
25 Kemaj okijtoj:
“¡Dios ma kitlaueli Canaán!
¡Ma nokaua inmak ikniuan ken se esclavo!”
26 Niman Noé no okijtoj:
“ToTEKO,
iDios Sem,
ma kiseli yekteneualistli.
Niman Canaán ma nokaua ken esclavo itech Sem.
27 Ma Dios kichiua para Jafet ma kipiya miyek iuejkakoneu,
niman ma chantikan inuan ikoneuan Sem.
Niman iuejkakoneuan Canaán ma nokauakan ken esclavos itech Jafet.”