केही व्यावहारिक शिक्षाहरू
4
यसकारण मेरा अति प्रिय र तिर्सना गरिएका भाइहरूहो, हे मेरा आनन्द र मुकुटहो, प्रभुमा यही प्रकारले स्थिर रहो, मेरा प्रियहरूहो!2 म इयोदियालाई विन्ती गर्दछु, र सुन्तुखेलाई विन्ती गर्दछु: उनीहरू प्रभुमा एउटै मनका होऊन्! 3 अनि हे साँचो जोड़ीदार, म तिमीलाई पनि विन्ती गर्दछु: ती स्त्रीहरूलाई सहायता गर, जसले सुसमाचारमा मसँग, क्लेमेन्टसँग पनि र मेरा अरू सहकर्मीहरूसँग मेहनत गरे, जसका नामहरू जीवनको पुस्तकमा छन्।
4 प्रभुमा सधैं आनन्द गर; म फेरि भन्दछु, आनन्द गर! 5 तिमीहरूको कोमलता सबै मानिसहरूलाई थाहा भएको होस्! प्रभु नजिकै हुनुहुन्छ। 6 कुनै कुराका निम्ति फिक्री नगर, तर हरेक कुरामा प्रार्थना र विन्तीद्वारा तिमीहरूका मागहरू धन्यवादसाथ परमेश्वरकहाँ जाहेर गरिऊन्, 7 र सारा समझलाई माथ गर्ने परमेश्वरको शान्तिले तिमीहरूका हृदयहरू र तिमीहरूका विचारहरू ख्रीष्ट येशूमा रक्षा गर्नेछ।
8 अन्तमा भाइहरूहो, जे-जे कुरा सत्य छन्, जे-जे कुरा आदरयोग्य छन्, जे-जे कुरा न्यायसङ्गत छन्, जे-जे कुरा चोखा छन्, जे-जे कुरा मनोहर छन्, जे-जे कुरा तारिफ गर्न लायकका छन्; यदि कुनै सद्गुण छ भने, यदि कुनै प्रशंसा छ भने यी कुराहरूमा ध्यान देओ! 9 जुन कुराहरू तिमीहरूले सिक्यौ, ग्रहण गर्यौ, सुन्यौ र ममा देख्यौ, ती कुराहरू गर, र शान्तिको परमेश्वर तिमीहरूको साथमा रहनुहुनेछ।
दानका निम्ति धन्यवाद!
10 तर प्रभुमा म साह्रै आनन्दित भएँ; किनकि अहिले, अन्तमा तिमीहरूको वास्ता मप्रति फेरि पलायो; हुन त तिमीहरूले वास्ता गरिरहेकै थियौ, तर तिमीहरूले मौका पाएका थिएनौ। 11 खाँचोको विषयमा मैले कुरा गरेको होइन, किनकि जुनसुकै अवस्थामा म रहे तापनि सन्तुष्ट रहनु मैले सिकेको छु। 12 म होचिनु जान्दछु र भरिपूर्ण हुनु पनि जान्दछु; सबै ठाउँमा र सबै कुराहरूमा भरपेट हुनु, साथै भोको रहनु, भरिपूर्ण हुनु, साथै खाँचोमा पर्नु मैले सिकेको छु। 13 मलाई शक्ति दिनुहुने ख्रीष्टद्वारा म सबै कुराहरू गर्न सक्छु।
14 तरै पनि मेरो कष्टमा सहभागी भईकन तिमीहरूले असल गर्यौ। 15 अब हे फिलिप्पीहरूहो, तिमीहरूलाई पनि थाहा छ, सुसमाचारको शुरुमा, जब म म्यासिडोनियाबाट हिँड़ें, तब कुनै पनि मण्डली दिनेलिने विषयमा मसँग सहभागी भएन, तर तिमीहरू मात्र भयौ। 16 किनकि थेस्सलोनिकामा पनि तिमीहरूले मेरो खाँचो पूरा गर्नलाई समय-समयमा पठायौ। 17 मैले दान चाहेको होइन, तर म त त्यहि फल चाहन्छु, जुन फलले चाहिँ तिमीहरूको हिसाबमा प्रशस्त वृद्धि ल्याउँछ। 18 अब मसँग सबै थोक छन् र म भरपूर भएको छु; तिमीहरूले एपाफ्रोडिटसद्वारा पठाएका यी कुराहरू पाएर म तृप्त भएको छु – यो त मीठो बास्ना आउने सुगन्ध, ग्रहणयोग्य बलि हो, जुनचाहिँ परमेश्वरलाई खूबै मन पर्छ। 19 तर मेरा परमेश्वरले आफ्नो धनअनुसार महिमामा ख्रीष्ट येशूद्वारा तिमीहरूको सबै खाँचो पूरा गरिदिनुहुनेछ।
20 अब परमेश्वर र हाम्रा पितालाई सदासर्वदा महिमा भइरहोस्! आमेन।