पवित्र जनहरूका निम्ति हुने चन्दाको विषयमा प्रेरित पावलको आदेश
16
अब पवित्र जनहरूका निम्ति चन्दाको सम्बन्धमा, जस्तो मैले गलातियाका मण्डलीहरूलाई आज्ञा दिएको छु, त्यस्तै तिमीहरूले पनि गर: 2 हप्ताको पहिलो दिनमा तिमीहरूमध्ये हरेकले, जुन-जुन कुरामा उसलाई फलिफाप हुन्छ, त्यहीअनुसार जम्मा पारेर आफूसँग राखोस्, र म आउँदाखेरि चन्दा उठाउने कामहरू नहोऊन्। 3 अनि जब म आउँला, तब जस-जसलाई तिमीहरूले पत्रहरूद्वारा योग्य ठहराऔला, तिनीहरूलाई म यरूशलेममा तिमीहरूको दान पुर्याउनका निम्ति पठाइदिनेछु। 4 अनि म पनि जानु उचित छ भने तिनीहरू मसँग जानेछन्। 5 अब म्यासिडोनिया भएर जाँदाखेरि म तिमीहरूकहाँ आउनेछु; किनकि म म्यासिडोनिया भएर जान्छु नै। 6 अनि सायद म तिमीहरूसित रहनेछु, अथवा म जता जाउँला, त्यस यात्रामा तिमीहरूले मलाई केही परसम्म पुर्याइदिन्छौ कि भनी म जाड़ो महिना पनि काट्नेछु। 7 किनकि अहिले म तिमीहरूलाई बाटोमा भेट्न चाहन्नँ; तर प्रभुले अनुमति दिनुभयो भने तिमीहरूसँग केही समयसम्म रहने आशा म गर्दछु। 8 तर पेन्टेकोस्टको दिनसम्म म एफेससमा रहनेछु। 9 किनकि मेरा निम्ति ठूलो र प्रभावकारी ढोका खोलिएको छ, तर विरोधीहरू धेरै छन्।10 अब तिमोथी आइपुगे भने याद गरिराख: तिनी तिमीहरूसँग विनाडर रहून्; किनकि तिनले पनि मैले गरेजस्तै प्रभुको काम गर्दछन्। 11 यसकारण कसैले तिनलाई तुच्छ नठानोस्; तर तिनलाई शान्तिसित पठाइदेओ, र तिनी मकहाँ आऊन्; किनभने भाइहरूसित म तिनलाई पर्खिरहेको छु। 12 अब भाइ अपोल्लोसको विषयमा, तिनी भाइहरूसँग तिमीहरूकहाँ आइदिऊन् भनी मैले तिनलाई खूबै अनुरोध गरें, तर यसपालि आउनका निम्ति तिनलाई पटक्कै इच्छा भएन; तर जब तिनले मौका पाउलान्, तब तिनी आउनेछन्।
आखिरी प्रोत्साहन
13 जागा रहो, विश्वासमा बलियो गरी उभ, पुरुषार्थ देखाओ, बलिया होओ! 14 तिमीहरूका सबै कुराहरू प्रेमसाथ गरिऊन्। 15 हे भाइहरूहो, म तिमीहरूलाई विन्ती गर्दछु, (तिमीहरू स्टिफनसको घरानालाई चिन्छौ, जुन घराना अखैयाको पहिलो फल हो, र तिनीहरूले पवित्र जनहरूको सेवाका निम्ति आफैलाई अर्पेका छन्), 16 तिमीहरू यस्ताहरूको अधीनतामा बस, साथै हामीसँग काम गर्ने र मेहनत गर्ने हरेकको अधीनतामा बस! 17 स्टिफनस, फोर्टूनाटुस र अखैकस यहाँ आएकामा म आनन्दित छु; किनकि तिमीहरूबाटको कमी तिनीहरूले पूरा गरिदिएका छन्। 18 किनभने तिनीहरूले मेरो र तिमीहरूको आत्मालाई शीतल पारिदिएका छन्; यसकारण यस्ताहरूलाई आदर गर! 19 एशियाका मण्डलीहरूले तिमीहरूलाई सलाम पठाउँदैछन्। आफ्नो घरमा भएको मण्डलीको साथमा अक्विला र प्रिस्किल्लाले प्रभुमा तिमीहरूलाई धेरै सलाम पठाएका छन्। 20 सबै भाइहरूले तिमीहरूलाई सलाम पठाउँदैछन्। पवित्र चुम्बनले एक-अर्कालाई अभिवादन गर! 21 म पावलद्वारा आफ्नै हातले लेखेको सलाम!