हितोपदेश 31

राजा लमुएलका वचनहरू अर्थात् त्यो भविष्यवाणी, जुनचाहिँ उनकी आमाले उनलाई सिकाएकी थिइन्:

2 हे मेरा छोरा, के? हे मेरो गर्भका छोरा, के? अँ, मेरा भाकलहरूका छोरा, के?

3 आफ्नो बल स्त्रीहरूलाई नदेऊ, न ता आफ्ना चालहरू त्यसलाई देऊ, जसले राजाहरूलाई नष्‍ट पार्छ!

4 हे लमुएल, यो कुरा राजाहरूका लागि होइन, दाखमद्य पिउनु राजाहरूका लागि होइन, न ता मदिरा पिउनु नै शासकहरूका लागि हो;

5 नत्र तिनीहरूले पिउलान्, र व्यवस्था बिर्सलान् अनि थिचोमिचोमा परेका सबैको न्याय बिगार्लान्।

6 नाश हुन लागेकोलाई मदिरा देऊ, र हृदयमा पीर भएकाहरूलाई दाखमद्य देऊ!

7 त्यसले पिओस् र आफ्नो गरिबी बिर्सोस्, अनि आफ्नो पीर फेरि नसम्झोस्।

8 तिमीले सबै विनाशका लागि ठहऱ्याइएकाहरूको पक्षामा गुँगाको लागि आफ्नो मुख खोल!

9 आफ्नो मुख खोल, धर्ममय न्याय गर, अनि गरिब र खाँचोमा परेकोको मामला लड़िदेऊ!

10 गुणवती स्त्रीलाई कसले पाउन सक्छ र? किनकि उसको मूल्य त लालमणिहरूभन्दा पनि धेरै बढ़ी हुन्छ।

11 उसको पतिले निर्धक्‍क भएर उसमाथि भरोसा राख्छन्; यसले गर्दा उनलाई लाभको घटी हुँदैन।

12 उसले आफ्नो जीवनभरि नै उनको कुनै खराबी होइन, भलाइ मात्र गर्नेछे।

13 उसले ऊन र सन खोज्छे, अनि खुशीसित आफ्ना हातले काम गर्छे।

14 ऊ व्यापारीका जहाजहरूजस्तै छे; टाढ़ा-टाढ़ाबाट उसले भोजनवस्तुहरू ल्याउँछे।

15 रात नबितीकनै ऊ उठ्छे पनि, र आफ्नो घरानालाई भोजन दिन्छे, अनि आफ्ना दासीहरूलाई काम बाँड़िदिन्छे।

16 उसले जमिनको विषयमा सोच्छे, र त्यो किन्छे; आफ्ना हातको कमाइले उसले दाखबारी लगाउँछे।

17 उसले आफ्नो कम्मर बलले कस्छे, र आफ्ना पाखुरा बलियो पार्छे।

18 आफ्नो कमाइ राम्रो छ भनी उसले थाहा गर्छे; राती उसको बत्ती निभ्दैन।

19 उसले चर्खामा आफ्ना हात लगाउँछे, र आफ्ना हातले कतुवा समाउँछे।

20 उसले गरिबका निम्ति आफ्नो मुट्ठी खोल्छे; अँ, खाँचोमा परेकोकहाँ उसले आफ्ना हात बढ़ाउँछे।

21 आफ्नो घरानाका निम्ति ऊ हिउँसँग डराउँदिन; किनकि उसको घरानाका सबैजनाले सिन्‍दुरे वस्त्र पहिरेका छन्।

22 ऊ आफैले बुट्टादार चादरहरू बनाउँछे; उसका वस्त्रहरू मिहिन मलमल र बैजनी रङ्गका हुन्छन्।

23 जब उसको पति देशका प्राचीनहरूको बीचमा बस्छन्, तब मूलढोकाहरूमा उनी चिनिन्छन्।

24 उसले मलमलको लुगा बनाउँछे र बेच्छे; अनि व्यापारीकहाँ पेटीहरू पठाउँछे।

25 शक्ति र सम्मान उसको पहिरन हो; अनि ऊ आउँदो दिनको विषयमा हाँस्छे।

26 बुद्धिमानीसाथ उसले आफ्नो मुख खोल्छे; अनि उसको जिब्रोमा दयाको व्यवस्था पाइन्छ।

27 उसले आफ्नो घरानाका चालहरू ध्यानपूर्वक हेर्छे, र अल्छेपनाको भोजन खाँदिन।

28 उसका छोराछोरीहरू उठ्छन् र उसलाई ‘धन्यकी’ भन्छन्, उसका पतिले पनि यसै भन्छन् र उसको प्रशंसा गर्छन्।

29 ‘धेरै छोरीहरूले सद्‌गुण देखाएका छन्; तर तिमीले चाहिँ ती सबैलाई उछिनेकी छौ।’

30 मनोहरता धोकापूर्ण छ, र सुन्दरता व्यर्थ छ; तर जुन स्त्रीले परमप्रभुको भय मान्छे, उही स्‍त्रीको प्रशंसा हुनेछ।

31 उसलाई उसका हातको परिश्रमको फलबाट देऊ; अनि उसका कामहरूले उसलाई मूलढोकाहरूमा प्रशंसा गरून्।