भजनसंग्रह 41

प्रधान वादकका लागि; दाऊदको भजन

धन्य हो त्यो मानिस, जसले गरिबको वास्ता गर्दछ; सङ्कष्‍टको समयमा परमप्रभुले उसलाई छुटकारा दिनुहुनेछ।

2 परमप्रभुले उसको जगेड़ा गर्नुहुनेछ र उसलाई जीवित राख्‍नुहुनेछ; पृथ्वीमा ऊ आशिषित हुनेछ; अनि तपाईंले उसलाई उसका शत्रुहरूको इच्छामा सुम्पनुहुनेछैन।

3 परमप्रभुले उसलाई रोगको ओछ्यानमा नै सम्हाल्नुहुनेछ; उसको बिमारीमा तपाईंले उसको सबै ओछ्यान बदली गरिदिनुहुनेछ।

4 मैले भनें: “हे परमप्रभु, मप्रति कृपालु हुनुहोस्, मेरो प्राणलाई निको पार्नुहोस्; किनकि मैले तपाईंको विरोधमा पाप गरेको छु।”

5 मेरा शत्रुहरूले मेरो विषयमा खराब कुरा बोल्छन्: “कहिले त्यो मर्ला, र त्यसको नाम मेटिएला?”

6 अनि त्यो मलाई हेर्न आयो भने पनि त्यसले व्यर्थको कुरा बोल्छ; त्यसको हृदयले आफूसँग अधर्म बटुल्छ; बाहिर निस्केपछि त्यसले त्यही कुरा भन्छ।

7 मलाई घृणा गर्नेहरू सबै एकसाथ मेरो विरोधमा कानेखुसी गर्छन्; मेरो विरोधमा तिनीहरू मेरो हानि गर्ने युक्ति रच्छन्।

8 तिनीहरू भन्छन्: “त्यसलाई खराब रोगले पक्रेको छ; र अहिले त्यो ओछ्यानमा परेको छ; त्यो कहिल्यै उठ्नेछैन।”

9 हो, मेरो आफ्नै परिचित मित्रले, जसमाथि मैले भरोसा राखेको थिएँ, जसले मेरो रोटी खान्थ्यो, मेरो विरोधमा कुर्कुच्‍चा उठाएको छ।

10 तर तपाईं हे परमप्रभु, मप्रति कृपालु हुनुहोस् र मलाई उठाउनुहोस्, र म तिनीहरूलाई बदला दिन सकूँ!

11 यसैबाट म जान्दछु, तपाईं ममाथि निगाह राख्‍नुहुन्छ; किनभने मेरा शत्रुहरू ममाथि विजयी हुँदैनन्।

12 अनि मलाई चाहिँ – मेरो इमानदारीमा तपाईंले मलाई सम्हाल्नुहुन्छ र सदाका लागि मलाई आफ्नो मुखको सामु राख्‍नुहुन्छ।

13 इस्राएलका परमेश्‍वर परमप्रभु अनादिदेखि अनन्तसम्म धन्यका होऊन्! आमेन, र आमेन!!