40
परमप्रभुले अय्यूबसित निरन्तर बोल्नुभयो । उहाँले यसो भन्नुभयो,2 "आलोचना गर्न चाहनेले सर्वशक्तिमान्लाई सुधार्ने कोसिस गर्नुपर्छ र ? जसले परमेश्वरसित विवाद गर्छ, त्यसले जवाफ देओस् ।"3 तब अय्यूबले परमेश्वरलाई जवाफ दिए र यसो भने,4 "हेर्नुहोस्, म नगण्य छु । मैले तपाईंलाई कसरी जवाफ दिन सक्छु र ? म आफ्नो हातलाई आफ्नो मुखमा राख्छु ।5 मैले एकपल्ट बोलेँ, अनि म अब जवाफ दिनेछैनँ । वास्तवमा दुई पकट बोलेँ, तर म अरू अगाडि बढ्नेछैनँ ।"6 तब परमप्रभुले प्रचण्ड आँधीबाट अय्यूबलाई जवाफ दिनुभयो र भन्नुभयो,7 "अब एक जना मानिसले झैँ आफ्नो कम्मर कस्, किनकि म तँलाई प्रश्नहरू सोध्नेछु, र तैँले मलाई जवाफ दिनैपर्छ ।8 के म अन्यायी छु भनेर तँ साँच्चै भन्छस् ? तैँले आफू ठीक छु भनी दाबी गर्नलाई तँ मलाई दोष लगाउँछस् ?9 के तँसँग परमेश्वरको जस्तो पाखुरा छ ? के तँ उहाँको जस्तो आवाजले गर्जन सक्छस् ?10 अब महिमा र इज्जतले आफैलाई सुसज्जित पार । आदर र ऐश्वर्यले आफैलाई सुसोभित पार ।11 तेरो रीसको झोँक छरपष्ट पार् । हरेक अहंकारीलाई हेर अनि उसलाई तल झार् ।12 हरेक अहंकारीलाई हेर अनि उसलाई तल झार् । दुष्ट मानिसहरू खडा भएकै ठाउँमा तिनीहरूलाई कुल्ची ।13 तिनीहरूलाई एकसाथ जमिनमा गाडिदे । तिनीहरूका अनुहारहरूलाई लुकाइएको ठाउँमा कैद गर् ।14 तब तेरो दाहिने हातले तँलाई बचाउन सक्दोरहेछ भनेर म तेरो विषयमा स्वीकार गर्नेछु ।15 अब मैले तँलाई बनाउँदा बनाएको बहेमोथलाई विचार गर् । एउटा गोरुले झैँ त्यसले घाँस खान्छ ।16 हेर्, त्यसको बल त्यसको कम्मरमा हुन्छ । त्यसको शक्ति त्यसको पेटको मांसपेशीमा हुन्छ ।17 त्यसले आफ्नो पुच्छर देवदारुको रूखझैँ बनाउँछ । त्यसको तिघ्राका नसाहरू कसिएका हुन्छन् ।18 त्यसका हड्डीहरू काँसाका नलीहरूझैँ हुन्छन् । त्यसका खुट्टाहरू फलामका गजबारहरूझैँ हुन्छन् ।19 परमेश्वरका सृष्टिहरूमध्ये त्यो मुख्य हो । त्यसलाई बनाउनुहुने परमेश्वरले मात्र त्यसलाई पराजित गर्न सक्नुहुन्छ ।20 किनकि पहाडहरूले त्यसलाई खानेकुरो जुटाउँछन् । वन-पशुहरू त्यसकै नजिक खेल्छन् ।21 कमलको फुलमुनि त्यो लुकेर बस्छ । निगालोको झाडीको छाया र सिमसारहरूमा त्यो लुक्छ ।22 कमलको फुलको छायाले त्यसलाई ढाक्छ । खोलाका लहरे पीपलहरूले त्यसलाई चारैतिर घेर्छ ।23 नदीको बाढी उर्लेर किनारमा आयो भने त्यो काँप्दैन । यर्दन नदी नै उर्लेर आई त्यसको मुखमा पस्यो भने पनि त्यो निर्धक्क हुन्छ ।24 के कसैले त्यसलाई बल्छीले पक्रन सक्छ ? अथवा पासो थापेर त्यसको नाक छेड्न सक्छ ?