UYoona akulwitika ululaghilo ulwa Chaala
3
UMalafyale uChaala akamubhuula uYoona ulwa bhubhili akati, 2 “Ghwe Yoona, bhuuka ku kaaya akakulu aka Ninaabhi, uye ulumbilile ku bhandu amashu ghaagho indiingubhuule.” 3 Po uYoona akiitika, akanyatuka ukubhuuka ku Ninaabhi isa muumwo uMalafyale akamubhuula. Akaaya aka Ninaabhi kakabha kakulu ngaani, ubhukulu bhwake bhukabha bhwa kughenda amashiku matatu. 4 Po uYoona akiingila mu kaaya kala. Bhwo aaghenda ishiku limo, akaanda ukulumbilila akatingi, “Mwe bhandu abha Ninaabhi umwe, ghaashaala amashiku amalongo mannaashe (40) ukuti uChaala abhapyute abhandu abha mu kaaya kooshi aka Ninaabhi!” 5 Po abhandu abha mu Ninaabhi bhakalipulika ishu ilya Chaala nu kumwitika uMalafyale. Po bhakafumusha kwoshi kwoshi ukuti abhandu bhooshi bhiiyiime ukulya ifindu. Abhandu bhooshi abhosongo na bhakeke bhakulondighwa bhafwale imyenda iya maghunila ukulangisha ukuti bhiilaatite imbiibhi shaabho.6 Po inongwa ishi shikamufikila umalafyale ughwa mu Ninaabhi, akanyatuka nu kutiila pa chitengu icha bhunyafyale. Akafuula umwenda ghwake ughwa bhunyafyale, akafwala imyenda iya maghunila nu kwikala pa lyoto ukulangisha ukuti akwilata imbiibhi shaake. 7 Po umalafyale uyo akalaghila ku bhandu bhaake bhooshi akati, “Une pamupeene na mafumu ghangu, tukufumusha ukuti ghweshi umundu iiyiime ukulya ifindu. Soona chooshi ichinyamaana icha kusugha manye chilyange pamu ukungʼwa chooshi chila. 8 Abhandu bhooshi bhafwale imyenda iya maghunila ukulangisha ukuti bhiilaatite imbiibhi shaabho. Soona mufyifunike amaghunila ifinyamaana ifisughighwa fyoshi. Ghweshi umundu amulilile ku maka uChaala nu kupinduka. Ghweshi umundu ashileke imbombo shaake imbiibhi. 9 Kali, ghwini yuuyo ameenye? Lumo uChaala ku chisa chaake abhaghiile ukusanusha inyinongʼono shaake nu kuleka ukutukalalila ukuti manye tupyutighwe.”
10 Bhwo uChaala aashitesha shiisho bhakushibhomba ukuti bhaaleka ukubhomba imbiibhi, akasanusha inyinongʼono shaake, atakabhapyuta isa muumwo akabhaatikila.