UYoona akukalala ku nongwa iya chisa icha Malafyale
4
Bhwo uChaala aabhahobhokela abhandu abha mu kaaya aka Ninaabhi, uYoona akakalala leka mu ndumbula yaake. 2 Po akiipuuta kwa Malafyale uChaala akati, “Ghwe Malafyale, kali, ishi shitaa sho shiisho ingashimanya ukuti indishikabhombighwe bhwo ingaali indi ku kaaya? Yo yiiyo nongwa iyi ingabhomba lubhilo lubhilo ukukindila ku kaaya aka Talashiishi. Ingamanya ukuti ughwe ghwe Chaala ughwa chisa, ughwa lughano, utaa mwengo ghwa kukalala, nakalinga utakwisa nu lufundo, kuhobhokela imbiibhi. 3 Po ulu, ghwe Malafyale, ingukusuuma ukuti ghuungoghe une, paapo shiimbaghiile une ukufwa ukukinda ukubha mwumi.” 4 Umwene uMalafyale uChaala akamwamula uYoona akati, “Kali, kubhomba akiisa paapo kukalala?”5 Po uYoona akatiilaamwo mu kaaya kala, akabhuuka nu kwikala kubhuyo ubhwa kaaya kala kuukwo isubha likufumila. Pala pala akasenga ichitembe nu kwikala mu kaafuuni aka chitembe chila, bhwo akulindilila shiisho indishibhonekaghe mu kaaya kala aka Ninaabhi.
6 UMalafyale uChaala akamesha ikokwe nu kulikusha ukuti limupe uYoona akaafuuni aka kumwifunika pa mutu ghwake nu kumutuula mu ndamyo shiisho akabha nasho. Po uYoona akahobhoka ngaani ku nongwa iya likokwe lila. 7 Loole kubhuche ishiku ilya bhubhili, uChaala akatuma imbeena ukuti yilye ikokwe, po imbeena yikalya ikokwe lila, nakalinga likuuma. 8 Bhwo isubha lyasopa, po uChaala akatuma imbepo iya mafuku amakali ukufuma kuukwo isubha likufumila. Po isubha likamwocha ngaani uYoona pa mutu, akapona nu kushilika. Po uYoona akanyonywa ukufwa, akayugha akati, “Kaali kiisa ukufwa ukukinda ukubha mwumi!”
9 Loole uChaala akamubhuula uYoona akati, “Kali, ughwe kubhomba akiisa paapo kukalala ku nongwa iya kulitiisha ikokwe ilyo?” Po uYoona akamwamula akati, “Nalooli, ingubhomba nyiisa ukukalala, soona indi nu bhukalale ubhwa kufwa!”
10 Bhwo uYoona aamwamula uChaala amashu agho, uChaala akamubhuula akati, “Ikokwe ili likamela nu kukula ku ishiku limolyene, ishiku liilyo likakongagha, ikokwe likuuma, ughwe utakalibhyala pamu ukulimesha nu kulikusha, kali, kooni kulihobhokela? 11 Kali, shitaambaghiile une ukukahobhokela akaaya akakulu aka Ninaabhi kaako kali na bhandu ukukinda abhoelufu imya yimo na malongo mabhili (120,000), bhaabho bhatabhaghiile ukushaaghania naashimo inyiisa ni mbiibhi; muumwo filiimwo ni fikanu ifyingi ngaani mula?”