Inyipuuto isha Yoona
“Mukati mu ndamyo shangu ingamusuuma uMalafyale ghwangu,
ghwepe akanyaamula.
Bhwo indi papiipi ukufika ku bhushuuka, ingiipuuta ukusuuma ubhutuuli.
Nuughwe ukapulika inguuto yangu.
3 Ughwe ghwandaaghite paase pa fishibha,
mukati ngaani mu nyanja.
Umweleesho ghwa miishi ghwashunguliile une,
soona inguli shikaghendagha pamwanya papangu.
4 Une ingiinongʼonagha ukuti ghuundaaghite ukuti manye imbonekaghe mundaashi mumwako,
poope indiingakusubhaalilaghe bhwo uli pa bhwikalo bhwako ubhwelu.
5 Amiishi ghakaashunguulila nu kuumbiita ukuti manye neesheelaghe,
ifishibha ifya mu nyanja fikaangupikila lwoshi,
imitabhiilishi iya mu nyanja yikaangupikila umutu ghwangu.
6 Ingiilomuka ukufika paase pabhwandilo ubhwa fighamba ifya mu nyanja.
Ingiinongʼonagha ukuti indi mu chiisu chiicho imilyango yaake yiipingite bhwila na bhwila.
Loole ughwe, Malafyale Chaala ghwangu,
ghwabhughalusha ubhwumi bhwangu ukufuma mu bhwina ubhutali bhula.
7 Bhwo ubhwumi bhwangu bhukwanda ukutiila,
po ingakukumbuka ughwe Malafyale ghwangu,
inyipuuto shangu shikafika mu Nyumba yaako inyeelu.
8 Abhandu bhaabho bhakwipuuta ku bhochaala abha mwalwe,
bhakuchileka ichisa chaako bheene.
9 Loole une indiingwimbilaghe ulwimbo ulwa kukupaalisha
nu kukufumikisha ughwe ifyabhupe ifya kupemba,
nu kubhomba shiisho ifingite.
Paapo ubhupoki bhukufuma kukwako Malafyale ghwangu.”
10 Po uMalafyale akayilaghila iswi yila ukuti yimutapike uYoona ku chiseese, yoope yikamutapika isa muumwo uMalafyale akayilaghilila.