Ukalata ughwa Yoona
UYoona akughela ukumukinda uMalafyale uChaala
1
Kubhwandilo, akabhaakwo umusololi yumo yuuyo ingamu yaake akabha ghwi Yoona. UYoona akabha mwana ghwa Amitaayi. Po ishiku limo uMalafyale uChaala akamubhuula uYoona akati, 2 “Ghwe Yoona, nyatuka, bhuuka mu kaaya aka akakulu aka Ninaabhi, uye ubhalumbilile nu kubhasoka abhandu paapo ishibhweni imbiibhi isha bhandu bhala nyingi leka.” 3 Loole uYoona atakabhuuka ku kaaya aka Ninaabhi isa muumwo uMalafyale akamulaghilila. Umwene akatiila nu kubhuuka mu kaaya aka Talashiishi ukuti amukinde uMalafyale uChaala. Po akiilomuka ukubhuuka ku kaaya aka Yoopa kaako kali kupiipi ni nyanja. Po akayibhona ingalabha yiiyo yikabhuukagha ku Talashiishi, akahomba indalama nu kukwela mu ngalabha ukuti abhuuke ku Talashiishi. UYoona akalondagha ukuti abhe pabhutali nu Malafyale uChaala.UYoona akutaaghighwa mu nyanja
4 Po uMalafyale uChaala akatuma ichikungu, soona shikabhoneka inguli ingulu mu nyanja yiiyo shikayipelela ingalabha ukubha papiipi ukukomanika. 5 Abhabhomba mbombo abha mu ngalabha bhooshi bhakaanda ukutetema nu kwoghopa. Po ghweshi umubhomba mbombo akiipuuta nu kusuuma ubhutuuli kwa chaala ghwake. Bhwo bhaagha ingalabha yaabha nu mushigho umungʼwamu, bhakaanda ukutiisha ifiliilo fyabho nu kutaagha mu nyanja. Loole ku kabhalilo ako uYoona akabha iilomukite paase pa ngalabha, akaghona nu kupitila.
6 Po umulongoshi ughwa ngalabha akamubhuusha uYoona akati, “Kali, kooni ughwe ughonite utulo akabhalilo aka bhwo utwe tuli mu ndamyo? Nyatuka, suuma ubhutuuli kwa chaala ghwako, lumo abhaghiile ukutupelela ichisa nu kutupoka ukuti manye tufwe.”
7 Po abhabhomba mbombo abha mu ngalabha bhakaanda ukuyughisania bheene-bheene bhakati, “Isagha, tukome ikuula ukuti tumanye yuuyo aapela indamyo ishi.” Po ikuula yila yikamughwila uYoona. 8 Po bhakaanda ukumubhuusha bhakati, “Tubhuule, kali, ghwini yuuyo aapela indamyo shooshi ishi shaatwagha utwe? Kali, kubhomba mbombo yiki? Kali, ufumite kuughu? Kali, ufumite chiisu chiki? Kali, ufumite chikolo chiki?” 9 Po uYoona akabhaamula akati, “Une nee Muhibhuli, ingwipuuta kwa Malafyale uChaala ughwa kumwanya yuuyo apelite ichiisu chooshi.”
10 Po abhandu bhala bhakooghopa ngaani, bhakoongela ukutetema bhwo uYoona aabhabhuula ukuti amukindite uMalafyale uChaala. Bhwo bhaashimanya ukuti uYoona ayikindite imbombo iya Chaala, bhakamubhuusha bhakati, “Kali, ubhombite sha kooni ishi?”
11 Akabhalilo kooshi ako inyanja yikoongelagha ukwisula akabhiibhi ngaani. Bhakamubhuusha soona bhakati, “Kali, tukubhombe kooni ukuti inyanja yibhoteele?” 12 Po uYoona akabhaamula akati, “Muumbimbe nu kuundaagha mu nyanja, po inyanja yibhaghiile ukubhoteela, paapo une niimanya ukuti ubhusobhi bhwangu bhwo bhuubhwo bhwapela ukuti indamyo ishi shibhaaghe umwe.”
13 Abhaghendesha ngalabha bhala bhakaghela ukuti bheendeshe ingalabha ukughaluka ku chiseese loole bhakapootwa, paapo inguli shikeendelelagha ukubha na maka ngaani. 14 Bhwo bhakaali ukumutaagha uYoona, bhakiipuuta ku Malafyale ughwa Yoona bhakati, “Tukukusuuma ghwe Malafyale, manye utughoghe ku nongwa iya kubhufumya ubhwumi ubhwa mundu uyu. Soona, manye utupele bhatulanongwa ku nongwa iya kukupula ibhanda ilya mundu umushita nongwa, paapo ughwe, Malafyale, ghwabhomba isha bhwighane bhwako.” 15 Po bhakamupimba uYoona nu kumutaagha mu nyanja, yoope inyanja yikabhoteela pala pala. 16 Po abhandu bhooshi abha mu ngalabha bhakaanda ukumwoghopa nu kumughindika uMalafyale ughwa Yoona. Bhakafumya ifyabhupe kwa Malafyale uChaala nu kufinga ulufingo ulwa kumubhombela.
17 Loole uMalafyale akayituma iswi ingulu ukuti yimumile uYoona. Po yikamumila, akabha mukati mu iswi amashiku matatu pabhushiku na pamuusi.