ULuuti akumwagha umuliisha
3
Ishiku limo uNaomi akamubhuula uLuuti akati, “Shiimbaghiile une ukukulondela ubhweghi ukuti ubhe na kaaya kaako. 2 Kali, umundu uyo uBhoghwasi yuuyo ukabha na bhabhombi bhaake abhakolo, ataa ghwa mu chikolo chiitu? Isagha, pulikisha, mwana ghwangu, umuusughu namasubha indiabhe pakughulusha ishayili pa lubhaasa. 3 Ughwe ghwoghe, upakale inyemba nu kufwala akiisa, po ubhuuke pa lubhaasa ulwa kukubhila ishayili. Loole manye ghwilangishe kwa Bhoghwasi, ulindilile, amale ukulya nu kungʼwa. 4 Soona, utendeele paapo akuya pakughona, linga aapitila, ghwise unyanyaatuke nu kubhuuka paapo aghonite, ghwifunule ku nyaayo shaake, po ghwise ughone pala pala. Linga umwene aakubhona, indiiise akubhuule isha kubhomba.”5 Po uLuuti akamwamula akati, “Indiimbombe shooshi shiisho ghwambuula.” 6 ULuuti akabhuuka pa lubhaasa ulwa kukubhila ishayili, akabhomba shooshi isa muumwo ungʼinafyala akamulaghilila. 7 Bhwo uBhoghwasi aalya nu kungʼwa, indumbula yaake yikasaasamuka, akabhuuka papiipi ni chilunda icha shayili nu kughona. Po uLuuti akanyanyaatuka ukubhuuka pala pala paapo uBhoghwasi akaghona, akiifunula ku tulundi nu kughona papiipi ni nyaayo shaake. 8 Pabhushiku pakati uBhoghwasi akanyomoka nu kusanuka, po akaswigha bhwo aagha umukolo aghonite papiipi ni nyaayo shaake. 9 Po uBhoghwasi akabhuusha akati, “Kali, ghwe ghwini ughwe?” ULuuti akamwamula akati, “Une nee Luuti, umubhombi ghwako. Paapo ughwe ghwe yumo ughwa chilingo ughwa chikolo icha mulume ghwangu nalooli. Po ingukusuuma ukuti ghuunyiifunike ichipeto icha mwenda ghwako ukulangisha ukuti indiukaanyiingile ichilingo.”
10 Po uBhoghwasi akati, “Mwana ghwangu, uMalafyale akusaye. Ulu ghwalangisha ulughindiko ulukulu ngaani ku chikolo icha mulume ghwako ukukinda muumwo ukalangisha kubhwandilo. Paapo utalondite ukweghighwa na bhalumyana abhakabhi pamu abhalondo. 11 Ulu mwana ghwangu, manye upaashange, indiingupange fyoshi fiifyo kusuuma. Mu kaaya aka, abhandu bhooshi bhakameenye akayiilo kaako akiisa. 12 Ishi sho shiisho sha nalooli ukuti une indi mukamu ghwako ughwa papiipi soona imbaghiile ukukwingila ichilingo ughwe, loole aliipo yuuyo ghwa papiipi ngaani yuuyo abhaghiile ukubha ghwa chilingo ukukinda une.a 13 Paapo ulu bhushiku, po ughone, loole pangeelo indiingateshe umundu yuuyo abhaghiile ukukwingila ichilingo. Linga iitika, po shibhaghiile ukubha nyiisa. Loole linga aakaana, une ingufinga mu ngamu iya Malafyale umwumi, une ingwitika ukukwingila ichilingo. Po ulu ughone panu panu ukufika pangeelo.”
14 Po uLuuti akaghona papiipi ni nyaayo isha Bhoghwasi nu kulamusha kubhuche, paapo uBhoghwasi atakalondagha umundu naayumo amanye ukuti umukolo aliipo pa lubhaasa pala. 15 Po uBhoghwasi akamubhuula akati, “Eegha umwenda ghwako ghuughwo ghwibhighite, aalisha paase.” Bhwo aalisha, uBhoghwasi akeegha nu kumupa ishayili iya kufwana ilebhe limo nu kwongelaapo, akamwitwika. Po uLuuti akanyatuka, akabhwela kukwabho. 16 Bhwo aafika ku kaaya, ungʼinafyala akamubhuusha akati, “Ghwe mwana ghwangu, kali, shaali bhuleele ukwo?” Po uLuuti akamulingaania shooshi shiisho uBhoghwasi aamubhombiile. 17 ULuuti akamubhuula ungʼinafyala akati, “UBhoghwasi ambuulite aatiile, ‘Utabhaghiile ukubhwela tukono twene ku nyokofyala, po aambiile ishayili iyi.’ ” 18 Po uNaomi akati, “Mwana ghwangu, ulindilile taashi, uteshe shiisho shibhaghiile ukubhoneka, paapo atabhaghiile ukusumbaashe, umwene indiashimaliishe shooshi umuusughu.”