UBhoghwasi akumwegha uLuuti ukubha mukashi
4
Po uBhoghwasi akabhuuka pabhuyo ubhwa kubhombela ulukomaano, pa mulyango ughwa kaaya kala, akiikala paase. Po ughwa chilingo ughwa mu chikolo icha Elimeeleki yuuyo uBhoghwasi akamuyughagha, akaghenda papiipi naghwe. UBhoghwasi akamwitisha akati, “Isagha panu mumanyani twikale.” Ughwa chilingo yula akiisa nu kwikala naghwe. 2 Po uBhoghwasi akaghiitisha amafumu kalongo (10) agha kaaya kala, akaghasuuma akati, “Isagha nuumwe mwikale panu.” Bhoope bhakiikala. 3 Po uBhoghwasi akamubhuula ughwa chilingo yula akati, “UNaomi yuuyo iisile ukufuma ku chiisu icha mu Moghwabhu, akughulisha umughunda ghuughwo ghwali ghwa mukamu ghwitu uElimeeleki. 4 Une niinongʼonite ukuti ingumanyishe nu kukubhuula ukuti ughule umughunda ughu mundaashi mu bhosongo abha chikolo chiitu na mundaashi mu bhandu abhanine bhooshi abha. Linga kughulonda umughunda, po ughughule nu kughwegha. Linga utaghughanite uyughe, paapo umughunda ughu ghubhaghiile ukughulighwa nuughwe, ughwe uli ghwa kwanda ukughughula, linga ghwapootwa une indi ghwa bhubhili ukughughula.” Po umukamu yula akiitika akati, “Imbaghiile ukughula umughunda ghula.”5 Po uBhoghwasi akati, “Ishiku liilyo kuya pakughula umughunda ghula, ukufuma mu tukono utwa Naomi, indiukamwingile nu Luuti ughwa mu Moghwabhu ukuti abhe mukashi ghwako, yuuyo mukolo mufwile ukuti uyishuushe ingamu iya mufwe yula nu mughunda ghula ghushaale mu tukono utwa chikolo icha mufwe.” 6 Po ughwa chilingo yula akamwamula akati, “Linga bhwo shili, indabhaghiile ukughula umughunda ughu ku nongwa iya kuti linga naamwingila ichilingo, ichilingo icha bhaana bhangu indichikakomanike. Po kaali kiisa ukuti ingupe yughweghwe ughughule umughunda, paapo une indabhaghiile.”
7 Mu tubhalilo tula mu chiisu icha Isilaeli linga abhandu bhakughulisha nu kutaana fimo, lwali lwiho lwabho umundu umwene chuuma ukufuula ichilato chaake nu kumupa umundu yuuyo akughula. Ulwiho ulu ku Bhaisilaeli lukalangishanga ukuti abhandu bhala bhabhili bhaapulikana. 8 Po umundu yula akamwamula uBhoghwasi akati, “Naakusuumagha ukuti ughule yughweghwe.” Po akafuula ichilato chaake, akamupa uBhoghwasi.
9 Ghwepe uBhoghwasi akaghabhuula amafumu na bhandu bhooshi akati, “Umuusughu umwe muli bhakeeti ukuti une niitika ukughula mu tukono utwa Naomi fyoshi fiifyo fyali fya Elimeeleki, Kilooni nu Malooni. 10 Soona, niitika ukumwingila ichilingo uLuuti, uMumoghwabhu yuuyo akabha mukashi ghwa Malooni ukubha mukashi ghwangu. Linga naamwegha, ingamu iya mufwe yula yitakusobha mu chikolo chaake ukuti ichuuma chishaale mu tukono utwa chikolo icha mufwe nu kuti ingamu yaake yishaale ku silikali. Umwe mweshi muli bhakeeti umuusughu.”a
11 Po amafumu na bhandu bhooshi bhaabho bhakabhaapo pa mulyango ughwa kaaya kala, bhakaamula bhakati, “Nalooli utwe tuli bhakeeti paapo twashibhona shooshi shiisho shaabhombighwa. Umwene uMalafyale amupele umukolo yuuyo indiingilaghe mu nyumba yaako abhe na bhaana abhingi isa ghwi Laaheli nu Leeya, bhaabho bhabhili abha, mwo muumwo aBhaisilaeli bhaafumiile. Nuughwe usayighwange, ubhe nafyo fyoshi, mu chikolo icha Efulaati nu bhufumukwe mu kaaya aka Bheetelehemu. 12 Abhaana bhaako bhaabho uMalafyale indiakusayaghe mu mukolo uyu, bhabhange bhingi mu chikolo isa abha mu luko ulwa Peelesi, yuuyo aali mwana ghwa Yuuta yuuyo uTamaali akamupaapila uYuuta.”
UBhoghwasi ni fikolo fyake
13 Po uBhoghwasi akamwegha uLuuti ukubha mukashi ghwake. Po uMalafyale akamusaya uLuuti, akabha pa bhungʼwamu nu kupaapa umwana umuliisha. 14 Bhoope abhakolo abha mu kaaya kala bhakamubhuula uNaomi bhakati, “Apaalighwange uMalafyale, yuuyo aakupa umuusughu umundu umuliisha ughwa chikolo ughwa kukusunga ughwe. Umwana uyu abhe ghwa kughindikighwa mu Isilaeli mwoshi. 15 Ghwe yuuyo indiakakupe ubhwumi ubhupya nu kukusunga ughwe mu bhughome bhwako. Umulaasagha ghwako yuuyo aakupaapila umwana uyu akughanite, soona abhombite inyingi kukwako ukukinda abhaana bhahaano na bhabhili (7) abhaliisha.” 16 Po uNaomi akamwegha umwana yula akamupakata nu kubha musungi ghwake. 17 Abhakolo abhapalamani abha Naomi bhakati, “Umwana apaapiighwe kwa Naomi.” Bhakamwita ingamu yaake Oobheti. Bhwo uOobheti aakula, akamupaapa uYeese yuuyo akabha ghwi ghwise ghwa Ndaabhiti.
18 Ichi cho chiicho chikolo cha Peelesi ukwisa kufika pa Ndaabhiti:
UPeelesi akamupaapa uHesolooni,
19 uHesolooni akamupaapa uAalamu,
umwene uAalamu akamupaapa uAminandabhu,
20 umwene uAminandabhu akamupaapa uNaashoni,
umwene uNaashoni akamupaapa uSalumooni,
21 umwene uSalumooni akamupaapa uBhoghwasi,
uBhoghwasi akamupaapa uOobheti,
22 umwene uOobheti akamupaapa uYeese,
ghwepe uYeese akamupaapa uNdaabhiti.