2
Mu kaaya aka Bheetelehemu, akabhaamwo umundu yumo yuuyo ingamu yaake akabha ghwi Bhoghwasi. Umundu uyo akabha mukabhi soona mundu mwinufu ughwa chikolo icha Elimeeleki, umulume ughwa Naomi. 2 Po ishiku limo uLuuti ughwa mu Moghwabhu akamusuuma uNaomi akati, “Ghwe mayifyala, ingukusuuma ghuunyiitikishe imbuuke mu mighunda pakusalaala fiifyo fikushaala munyuma, lumo yumo abhaghiile ukuumbelela ichisa.” UNaomi akamwamula akati, “Bhuukagha, mwana ghwangu.” 3 Po uLuuti akanyatuka ukubhuuka mu mighunda, akakongagha nu kusalaala munyuma mu bhaabho bhakiinulagha ishayili. Ku lusako ulwisa, akaagha ali mu mughunda ughwa Bhoghwasi yuuyo akabha mukamu ghwa Elimeeleki.
4 UBhoghwasi akiisa ukufuma ku kaaya akakulu aka Bheetelehemu, akafika pabhuyo bhula bhuubhwo bhakiinulagha nu kubhalamuka akati, “UMalafyale abhe nuumwe.” Bhoope bhakamwamula bhakati, “UMalafyale akusaye nuughwe.” 5 UBhoghwasi akamubhuusha umwimilili ughwa bhiinuli akati, “Kali, umulindu yula ghwini?” 6 Umwimilili ughwa bhiinuli akamwamula akati, “Umulindu yula Mumoghwabhu yuuyo akiisa nu Naomi ukufuma mu chiisu icha Moghwabhu. 7 Asuumite ukuti imwitikishe, akongaghe nu kusalaala munyuma mu bhaabho bhakwinula. Po iisile, twabhomba naghwe imbombo ukwanda pangeelo ukufika ulu. Po ulu, ali pakutuusha mu chitembe.”
8 Po uBhoghwasi akamubhuula uLuuti akati, “Pulikisha, ghwe mwana ghwangu, ughwe manye ubhuukaghe mukusalaala mu mighunda iminine. Soona, manye utiilagheepo panu, loole ghwikalaghe papiipi na bhabhombi bhangu abhakolo. 9 Ubhateshange abhalindu bhaabho bhakwinula ukuti ukonganaghe nabho. Naabhalaghilila abhalumyana abha ukuti manye bhakutamyange. Linga ghwagha inyoota yaakukola, ubhuukaghe, ungʼwange amiishi ghaagho abhalumyana bhasembite nu kughabhiika mu ngumbe.”
10 Po uLuuti akafughamila paase mundaashi mwa Bhoghwasi nu lwiyiisho akati, “Ghwe malafyale ghwangu, une indi muheesha muno. Kali, kandu kaki kaako kaapela ukuti ghuumbelele ichisa?” 11 Po uBhoghwasi akamwamula akati, “Imbulikite shooshi shiisho ukamubhombelagha unyokofyala, isha chisa bhwo umulume ghwako aafwa. Soona, isa muumwo ukabhaleka abhapaapi bhaako ni chiisu icha kukwinyu, isa muumwo ukiisila pakwikala na bhandu bhaabho utakabhamanya naalumo. 12 Paapo ughwe ghwalonda ubhutuuli nu bhuponelo ubhwa bhwumi bhwako kwa Malafyale uChaala ughwa Isilaeli, umwene uMalafyale akusaye, akuhombe inyiisa ku shooshi shiisho ubhombite.” 13 Po uLuuti akamwamula akati, “Ghwe malafyale, indagha ghwambombela ubhwisa ubhukulu ngaani ubhu. Naahobhoka paapo ghwasaasamusha nu bhwoloolo bhwako pamupeene nu kuti une indagheliile na bhabhombi bhaako.”
14 Bhwo kaafika akabhalilo aka kulya ifindu, uBhoghwasi akamwitisha uLuuti akati, “Isagha kuno ulye umukati nu kusaasila mu musuni ughu.” Po uLuuti akiikala pamupeene na bhabhombi. Po uBhoghwasi akamupa ifindu fiifyo fikashinge, akalya, akiikuta, fikashaala fimo. 15 Bhwo aalya, akanyatuka soona ukubhuuka pakusalaala. Po uBhoghwasi akabhalaghilila abhabhombi akati, “Muleke ukuti asalaalaghe mukati mu filunda ifya shayili, manye mumukaanishange. 16 Ukwongelaapo pa shishiishi, mughuusilaghe ifisaasali fimo ukufuma mu ngosa, muleke asalaalaghe, manye mumukaanishange.” 17 Umwene uLuuti akeendelela ukusalaala mu mughunda ukufika namasubha. Bhwo aakubha nu kughulusha, akakaagha akapombo kamu aka shayili nu kwongelaapo. 18 Po akiitwika, akabhwela ku kaaya nu kumulangisha ungʼinafyala fiifyo akasalaala, soona akamupa ni findu fiifyo fikashaala bhwo iikuta. 19 Ungʼinafyala akamubhuusha akati, “Kali, ghwasalaalagha kuughu umuusughu? Kali, ghwali ku mughunda ghwani? UChaala amusaye umundu yuuyo akupokeelite.” ULuuti akamwamula uNaomi akati, “Umundu yuuyo nabhombaghaakwo umuusughu ghwi Bhoghwasi.” 20 UNaomi akamwamula umulaasagha akati, “UMalafyale amusaye! UMalafyale atakuleka ichisa chaake ku bhandu bhaake bhaabho bhali ku bhwumi na bhaabho bhafwile.” Soona, akoongelaapo ukumumanyisha akati, “Umundu uyo mukamu ghwitu ghwa papiipi, ghwe yumo mu bhaabho bhabhaghiile ukukwingila ichilingo.”
21 Soona, uLuuti ughwa mu Moghwabhu akoongeleshaapo ukumupangila ungʼinafyala akati, “Sha nalooli, umundu yuyuuyo aambuulite ukuti bhwilaashe imbange pamupeene na bhabhombi bhaake ukufika pabhumalilo ubhwa kwinula kwoshi.” 22 Po uNaomi akamubhuula uLuuti akati, “Eena, mwana ghwangu, sho shiisho nyiisa ukubhomba imbombo pamupeene na bhakolo abhanyiinyu mu mughunda ughwa Bhoghwasi, lumo ngali ghwataamighwa ukubhomba mu mughunda ughwa mundu umunine.”
23 Po uLuuti akabhombagha papiipi na bhabhombi abha Bhoghwasi abhakolo, akasalaalagha nabho ukufika kubhumalilo ubhwa kwinula ishayili ni ngano. Akabhalilo kooshi uLuuti akasunganagha nu ngʼinafyala.