Luuti 1

Ukalata ughwa Luuti

UElimeeleki, umukashi na bhaana bhakubhuuka ku Moghwabhu

1-2 Pabhutali ngaani, abhatumuli bhwo bhakulongosha mu chiisu icha Isilaeli, akabhaamwo umundu yumo yuuyo ingamu yaake akabha ghwi Elimeeleki, umukashi uNaomi na bhaana bhaabho bhabhili abhalumyana uMalooni nu Kilooni. Bhakabha bha mu chikolo icha Efulaati mu kaaya aka Bheetelehemu mu chiisu icha Yuuta. Bhwo isala yaaghwa mu chiisu chila, po bhakatiila nu kusaamila mu chiisu icha Moghwabhu. 3 Bhwo bhiikala mu chiisu chila, uElimeeleki akafwa, akamuleka umukashi na bhaana abhalumyana bhabhili. 4 Abhaana bhala bhakeegha abhakolo abha mu Moghwabhu, yumo akabha ghwi Olipa umunine akabha ghwi Luuti. Bhwo bheegha, bhakaghona ifyinja kalongooshe. 5 Bhoope abhaana bhala bhakafwa, po uNaomi akashaala mufwile.

UNaomi nu Luuti bhakughaluka ukubhuuka ku Bheetelehemu

6 Bhwo uNaomi ali mu Moghwabhu, akapulika ukuti uMalafyale abhasayite abhandu bhaake abha mu Yuuta ni mboto iya findu. Po umwene na bhalaasagha bhaake bhakanyatuka ukufuma mu Moghwabhu ukubhuuka ku kaaya kaabho. 7 Po uNaomi na bhalaasagha bhaake bhakanyatuka nu kutiila pabhuyo bhula ukughaluka mu chiisu icha mu Yuuta. 8 Bhwo bhali mu sila, ungʼinafyala akabhabhuula abhalaasagha bhaake akati, “Bhaana bhangu, ingubhasuuma mweshi mubhuukaghe ku bhapaapi bhiinyu, uyu kukwabho, uyu kukwabho. UMalafyale abhasaye nu kubhabhombela inyiisa isa muumwo mukaambombelagha inyiisa une pamupeene na bhalume bhiinyu bhala bhakafwa. 9 UMalafyale abhasaye ukuti mweghighwe, mubhe nu lusekelo yumo yumo mu nyumba yaake.” Po uNaomi akabhafipa nu kubhalagha, loole abheene bhakakuuta nu kulila ngaani. 10 Po bhakamwamula bhakati, “Nashiku maayi, utwe tukubhuuka tweshi ku bhandu abha kukwinyu.”

11 Loole ungʼinafyala akabhabhuula akati, “Mwe bhaana bhangu, ingubhasuuma manye muungongaghe, ghaluka, bhuukagha kukwinyu. Kali, mukwinongʼona ukuti une imbaghiile ukupaapa abhaana abhalumyana abhanine ukuti bhabhe bhalume bhiinyu? 12 Mwati mughaluke mubhwelaghe kukwinyu paapo une indimughome leka, indabhaghiile ukweghighwa soona. Linga poope naatingi neeghighwe umuusughu nu kupaapa abhaana abhaliisha, 13 kali, mubhaghiile ukulindilila ukuti bhakule bhabhe bhandu bhosongo? Kali, mubhaghiile mubhe bhubhuubhwoshe chishita kweghighwa na bhaliisha abhanine? Nashiku bhaana bhangu, ishi mushimeenye ukuti ishi shitaa mbepe kukwangu, loole mbepe kukwinyu, paapo une uMalafyale aangomite.” 14 Pala pala bhakaanda ukulila soona isa pabhwandilo. UOlipa akamufipa ungʼinafyala nu kumulagha, akabhwela kukwabho. Loole uLuuti atakamulekeesha ungʼinafyala. 15 Po uNaomi akamubhuula uLuuti akati, “Ghwe Luuti, tesha umunyiinyu aabhwela ku bhandu bhaake na ku bhochaala bhaake, ingukusuuma ubhwelaghe isa paapo umunyiinyu aabhwela.”

16 Loole uLuuti akamwamula akati, “Ghwe maayi, manye ghuumbyepyeleshange ukukuleka ughwe, tukubhuuka tweshi. Kwoshi kuukwo kubhuuka, inditubhuukaghe tweshi. Kwoshi kuukwo kuya pakwikala, inditukiikalaghe tweshi. Abhandu bhaako, indibhakabhange bhandu bhangu, ghwepe uChaala ghwako, indiakabhange ghwi Chaala ghwangu. 17 Kuukwo indiukafwilaghe, kwo kuukwo nuune indiingafwile nu kushiilighwa. UMalafyale ambe ulufundo ulukulu ngaani linga naakuleka, bhwene ubhufwe bhwo bhuubhwo indibhukatulesaanie une nuughwe.” 18 Bhwo uNaomi aashaaghania ukuti uLuuti atumwile ukubhuuka naghwe, akaleka ukukaanikana naghwe.

19 Po bhooshi bhabhili bhakanyatuka ukubhuuka mu kaaya aka Bheetelehemu. Bhwo bhaafika mu Bheetelehemu, po abhandu bhooshi bhakaswigha nu kughasama ku nongwa yaabho. Po abhakolo bhakaanda ukubhuusania ukuti, “Kali, uyu ghwi Naomi?” 20 Po uNaomi akabhaamula akati, “Manye mutingi nee Naomi! Ulu munyiitishange ingamu iya Maala paapo uChaala uMwene Maka ambeliile indamyo mu bhwumi bhwangu. 21 Une ingatiila muno bhwo indi nafyo fyoshi, loole ulu uMalafyale aangalusha tukono twene. Kali, kooni mukuunyiitisha ingamu iya Naomi bhwo uMalafyale uChaala uMwene Maka ambeliile indamyo ishi soona mukeeti ghwangu?”

22 Po umwo mwo muumwo uNaomi nu mulasagha uLuuti ughwa mu Moghwabhu bhakaghaluka ku Isilaeli ukufuma ku Moghwabhu. Bhakafika mu Bheetelehemu mu kabhalilo aka ukwanda ukwinula ishayili.