2
1 Guatmei muczwng nunc tat kanmei ganv khou meicnunc pang khou nai kan the. Mi tei kumcna nangniw pang khou ni kachangc hamhmei dinhpouc nunc nai puni. Kaniw rui meicnunc ta swkasic nimei, nchumh makmei riakdyn phungc guang puni, kumna kaniw ta liuloumeipu Kaipouc ta kaniw nuh mak puni. Mi tei rui kaniw rana kaniw ruc khou katumcna maanmei phungc guang puni. 2 Kumna kaniw tuang nthah boulahmei chaeng khou meic mpeyna lay tat puni. Kaniw zaeng rui nchumhmei Chaeng ta hei sakasic puni. 3 Mi kumna kaniw rui luanhpui pary nangniw khou racloumei khou rui agaemvna nangniw khou rui kuat tu puni. Kaniw ta latzan sw khang kahunungc rui chamdaanv guang kanmei tei nsa taan ni tu hamh e, kumna kaniw ta nsa mpatlou ni tu hamh e.
4 Paapc taanhmei kauh baanchara guay ta tei Ravguangc rui nsa mpatlou mak e; kaniw ta taruaihram khou phaiclou kan the, kumna latzan tingmik tangh mak saanv kaniw ta mi zinghmei khou tei kangriang rui bangclou bam e.a 5 Ravguangc rui reydouc mbaanv ta tei nsa mpatlou kan mak e; ravning makmei mei nunc kandic khou tei duidai tii guang khwan e. Khoutei ravchaptatmei lat dinhmei Noa khatni baihmei gaanv chanei na ta gulou khwan e. 6 Ravguangc latzan Sodom khatni Gomorra ruc khou keylouna mi kaidai kanei tei mai rui swmaan kan the, kumna mi hei rav ta thay makmei nunc khang sw nchinloupui tuang sw bam e. 7 Mi khou tei mi kariak tat makmei nunc tuang nthah boulahmei kheiliak ta tei kalung kabiuna bammei ravchaptatmei Lot ta gulou khwan e. 8 Meic nunc tuang simei taanv guay tei chu pwkhou khatni how pwkhou, kaniw pang khou lungc bammei, mi ravchaptatmeipu tei tingmik pum kalung ryanrana bam khwan e. 9 Kumna Poubauhmei thu ravningmei nunc ta simei khou rui gulou e khatni meicsimei nunc ta latzan tingmik tangh mak saanv riapna bangclou e. 10 Mi hei nkunna meic pumc rui kahawmei, mphuammei panty khou lungc bammei khatni kapy ngamv ta ramh sak makmei nunc ta e.
Mi dinc mbianghmei nunc hei bauc e khatni ramhkhe sw e, kumna kauh thangc bammei hymdaihmei nunc ta nganv sakasic khang ping mak e. 11 Tiki kaniw khang suangc tanhmei khatni ngammei kauh baanchara nunc rui nganv kaniw khuay Poubauhmei hu khou kalauhna kaniw ta tizak lou kan mak e. 12 Kaniw hei swluai sw tiat khang na puancloumei, si gay kakhanh makna kamei taanc nii niimei na taanc bammei khouringh nunc tei kumc the. Kaniw khang kabah thay makmei guay ta tei kaniw sakasicna athwng the. Numbangc khouringc nunc ta kumcna kaniw ta ni swmaan puni. 13 Kaniw rui meicnunc ta swkasicloumei khang kaniw ta ni swkasiclou puni. Kalaanv boulahna chakin swmei hei kaniw khang pianmei e. Kaniw nangniw tu zangv kariumei khou kazauh e; tiki kaniw kheiliak tei zakpui tuang e, khatni malapui tuang e. Mi kumna nangniw ta guatmei hei kaniw khang neihlamei e. 14 Kaniw mikzaw khou lungcmaanv lungcmowmei rui padik e, kaniw paapc taanc niimei kiu pianmei nai dat mak khe. Kadyng ntip makmei nunc ta kaniw phac khou timanc e. Agaemvmei hei kaniw chav swlou the. Kaniw ruc khou Ravguangc syang nai the! 15 Kaniw hei ntyngmei chaeng gaanclouna chaeng maanv tat kanmei nunc the. Syan kahawpui zaeng rui nkhuaimei taanv taanh khang tat kanmei Beor nac mpouh Balaam chaeng tei kaniw lay tat kan the. 16 Tiki Balaam ta tei thu katuang twanlyammei khang tei luh khwan e, khatni katuang kuanniam rui maansei khwan rui lat sana mi muhzwng ta tei katuang mbamei taanv tei ti-nthanlou kan mak e.
17 Mi mei nunc hei dui maekmei duipuakkai e, khatni pwanzingh rui phungc tat bammei muangc e. Ravguangc rui kaniw khang zinghmei bamv chamdaanvlou the. 18 Kaniw mpangmei lat rui gaengh sw e; simei kheiliak khou lungc bammei pang khou rui duak pat chanahna bammei nunc ta manh khang meic pumc tuang boulahmei rui nthiam e. 19 Nyngswmei tiilou puni twna kaniw rui meicnunc khou nrianhlou e, tiki kaniw kahak kaniw ta swmaan nimei kheiliak tuang bangc sw bam e. Kalam thu meic gaanv khat hei kata ngam bammei tuang bangc tei e. 20 Kalam thu thowkumhmei aniu Poubauhmei khatni Guloumeipu Jisu Khrista ta thaymei paan rui mbaanv tuang mphuammei khou rui duak pat tangv lana, mi khou tei manclou datna mi guay tei rui kata ngam datna bam e thei; mi kumhmei nunc hei thu kaniw tuang lwnlung tei kahunungc suangc nkhamhmei tei rui si diangc the. 21 Kaniw nchumhmei chaeng tei thayna kaniw khang tiiloumei nthanmei latdanv tei laalou makna mi khou tei rui tat patmei suangc, nchumhmei chaeng tei thay mak khammei rui kaniw khang gay ni tuang e. 22 "Si thu kamei rui nruy patloumei tu dat e," khatni "guak ta duilowlou tiki bih niangc dat e," twna samei nchumhmei latchap hei kaniw khou guang tangc tuang the.