Pitar
RUI HYMEI KANEIMEI TATDYN
1
1 Jisu Khrista bangc khatni katuang Latdiutatmei Simon Pitar rui—
Aniu Racguangc khatni Jisu Khrista tuang nchumhmei paan rui kunghmei aniu lwmmei tei laatow nchamcmei nunc khou hymei:
2 Ravguangc khatni Jisu Khrista ta thaymei paan rui zauzian khatni chuzaenghmei nangniw khou mbu hay hay thau bam di tho.
Ravguangc rui Kapahloumei khatni Kawloumei
3 Aniu kalingna ravchaptatmei panty khou lungc ngam khang kage naimei guay Ravguangc pumtan rui aniu khang tiilou the. Mi hei katuang hymdaihmei khatni karamgay lay laa khanga aniu ta kawloumeipu ta thaymei paan rui laatow tuang e. 4 Mi kumcna kamei rui aniu khang tii ni twna nrianhloumei daihmei khatni kunghmei kaipat tei aniu khang tiilou the. Aniu ta swkasic nimei mbaanv tuang simei ta kahawmei khou rui mi paan rui aniu duak patna, Ravguangc lwnlung lay laa ngam khang e. 5 Mi zaeng rui nangniw khou naimei lwmmei ruc khou kheiliak gaymei; kheiliak gaymei ruc khou thaymei; 6 thaymei ruc khou pumh sinriapmei; pumh sinriapmei ruc khou khaengvthaymei; khaengvthaymei ruc khou ravningchuymei; 7 ravningchuymei ruc khou chana punav ta nzianmei; chana punav ta nzianmei ruc khou nzianmei nkimlou khang karamc o. 8 Mi gunc guay hei nangniw khou nai ni tuang e, kumna mi guay hei nangniw khou mbu thaupui thei layna, nangniw Jisu Khrista ta thaymei tuang thay, mi guay hei rui nangniw khou ti-nthailou ni tuang e. 9 Tiki mi gunc guay hei nai makpui mei tei thu how duc ngam makpui mei e khatni mik tiatmei e, kumna katuang tat kanmei ganv tuang paap guay tei sw-nthanlou the twmei kamei ningtow dat mak khe.
10 Mi zaeng rui, achana thiu, nangniw ta kawloumei khatni kapahloumei tei nthanna thay khang karamc ranv o. Mi kum pwkhou, nangniw phaysuy dat lak khe.a 11 Kumna aniu Poubauhmei Guloumeipu Jisu Khrista tuang tingsaengzaeng guangcdic khou gut khang giuga dat lak khe.
12 Mi zaeng rui, mi guay hei nangniw thay tangna, nangniw laaloumei nchumhmei khou tei ntipna ding bam sini, mi guay hei ai nangniw ta tiningtow dat dat bam puni. 13 Ai ringc bamv saanv, mi guay hei nangniw ta tiningtow bammei hei nchumh e twna ai ning e. 14 Aniu Poubauhmei Jisu Khrista rui akhou dincloumei thei layna, ai mi mbaanv pumc hei mpatlou nimei ganv asaanh mak khe twmei ai thay the. 15 Ai theic kan sini nangniw mi guay hei amuc makna ningtow bam nuh khang ai swlou puni.
Mik rui How Kahakmei Khrista tuang Hymdaihmei
16 Aniw rui nangniw khou dincloumei hymdaicna Poubauhmei Jisu Khrista guang nimei latdyn hei maansei lungning khou rui patmei damc duancpui pary hamh e. Katuang hymdaihmei tei aniw mik kahak rui how the. 17 Kamei kapu khou rui champouhmei khatni hymdaihmei laapui ganv khou, Kauh Liangmei Hymdaihmei khou rui, "Mi hei alung kwnmei, ai nzianmei Nac Mpouh e!" twna kauc key khou aniw bam khwan e. 18 Aniw kamei lev nthanmei chyng but khou bam khou, mi tingkauh thangc rui kauc keymei khwan tei aniw chu the. 19 Mi zaeng rui, muhzwng nunc rui dincloumei lat hei aniu lwm ntip hay hay khang nai the. Nangniw mi khou tei lungc louna bam e thei, nangniw gay puni. Kalam thu mi hei, nangniw khang laukhwan gaanphiu pat mak saanv, tinggaanh mak saanv zinghmei khou gaanc bammei maibungc tei kumh tuang e. 20 Rey liangmei khou nangniw thay nimei thu, Nthanmei latrik khou naimei dinc kasuakcloumei guay tuang kabac hei meic gaanv khat na sini karana rui hanc nina hamh e. 21 Kalam thu muhzwng nunc rui saloumei lat hei maansei lungning khou rui pat tu hamh e; tiki Ravguangc khou rui patmei lat tei Bumaengh Nthanmei rui maansei ta tisa tuang e.