3
Poubauhmei Guang Nimei
1 Nzianmei thiu, mi hei ai rui nangniw khou hymei kaneimei tatdyn the. Mi tatdyn kanei khou hei, mi guay hei tiningtowlouna nangniw tuang nthanmei lungning nchyang thaulou khang sw tuang e. 2 Nthanmei muhzwng nunc rui dinc kasuakcloumei lat guay khatni Latdiutatmei nunc rui dincloumei Poubauhmei Guloumeipu tuang latdanv guay tei ningtow o.
3 Rey liangmei khou mi hei thay o, twmei thu nkhamhpui ganv khou, kaniw pumc rui kahawmei khou lunghmei sinnui sinnumei nunc guang puni. Kaniw rui sinnuina, 4 "Kamei guang puni twna nrianhlou tu hamh nah cho? Aniu pupouc nunc theic ngam kan the. Mbaanv damclou rap khou rui thauna ramh guayna kiuc likna tat key bam de. Kamei guang nimei kiu tabui tei thah?" twna sa puni. 5 Ravguangc lat rui tingpuk kandih hei damh tuang e twmei kaniw thay zihna thay mak tuang e. Mbaanv hei dui khou rui khatni dui rui kasiamh tuang e, 6 khatni reydouc mbaanv tei dui rui, twmei thu duidai rui swmaan kanmei tuang e. 7 Tiki ntaw nai bammei tingpuk khatni kandih hei mai rui swmaan khang Ravguangc latdanv thei layna nai bam tuang e. Rav ta thay makmei nunc ta latzan swna swmaan nimei nungc khang mi hei lou bam tuang e.
8 Nzianmei thiu, nangniw mi hei thaylou o: Poubauhmei khang thu zaeng neih khat hei tingkwm ching khat kumh tuang de, khatni tingkwm ching khat hei zaeng neih khat kumh tuang de. 9 Poubauhmei hei kalatryan taanc pat khang nzaeng the twna meic gaanv saekc rui ningmei kumcna kamei thu nzaeng mak e. Kamei nangniw ta nkhwan bam tuang e. Kalam thu meic gaanv khat na ta sini swmaan kanmei ta kamei laa nii mak e; meic katana lunghlaihmei ta laa nii e.
10 Tiki Poubauhmei tuang Tingmik hei thu kaihouhmei guang kumc guang puni. Mi nungc kiu tingpuk hei khwan ranvna maanv kan puni; tingpuk khou nai bammei guay hei chaengc maan kan puni, khatni kandih lev mi khou naimei guay hei raw maan kan puni.a 11 Ramh guayna hei mi kumna maan kan puni. Kum e thei, aniw thu akumh kho cho? 12 Nangniw Ravguangc tingmik—tingpuk raw maan nimei tingmik khatni tingpuk khou nai bammei guay chaenghmei rui nungc maan nimei tingmik ta nkhwanna, mi tingmik tei tiguang zaih khang nangniw ngammei kasang karamc bam khou hei; ravningchuyna khatni panty nthanna lungc nina e. 13 Aniu thu Ravguangc rui aniu khang nrianhloumei, ravchaptatmei bamv, tingpuk kathanc khatni kandih kathanc ta nkhwan bam e. 14 Nzianmei thiu, nangniw mi Tingmik ta tei nkhwan bampui zaeng rui, nangniw ta Ravguangc mikzaw khou nthanmei khatni khuay maekmei swna khatni chuzaenghna ariw khang ngammei kasang karamc o. 15 Poubauhmei rui khaengvlou bammei ta hei zauc o. Mi hei nangniw guloumei laa kan khang e twmei chak o. Aniu nzianmei chana Paul rui Ravguangc rui kakhou tiiloumei ningting thei layna mi kahak hei nangniw khang hy kanmei tei the. 16 Kamei rui katuang tatdyn guay khou mi lam khou hy pwkhou, kamei rui sa bammei kiu mi hei the. Katuang tatdyn khou kabah thay kunghmei bamv asaekc nai e. Mi kumhmei khou tei thay makmei khatni kadyng ding makmei nunc rui, baihmei Nthanmei Latrik bamv guay khou ni sw bammei kumcna, kabah hanc kadatna kaniw rana kaniw ta maanmei khou tikeylou the.
17 Tiki nzianmei thiu, nangniw thu mi hei thay rey the. Kum thena kariak tat makmei nunc tuang nchumh makmei latdyn tei rui nangniw ta zay mbiangh patna nangniw tuang ntipmei phaydyng tei tikachac mak khang ramhthay o. 18 Ravguangc zauzian khou khatni aniu Poubauhmei Guloumeipu Jisu Khrista ta thaymei khou daicthau bam o. Hymdaihmei hei ntaw khatni tingsaengzaeng kakhang e! Amen