4
1 Nangniw pang khou suc rih khatni agay agimei pat bammei hei tabui khou rui cho? Mi hei nangniw lungc khou adow bammei kahawmei khou tei rui hamh nah cho? 2 Nangniw kahaw e, tiki laatow mak e; kum tina nangniw meic dow the. Nangniw laa nii e, tiki laatow mak e; kum tina nangniw agay agi the, khatni suc rih sw the. Nangniw khang maek e; kalam thu nangniw Ravguangc khou ney mak e. 3 Nangniw ney e tiki laatow mak e; kalam thu mi tei nangniw rui kahawmei, simei khou sinsw khang ney the. 4 Lwmnuh makmei thiu! Mbaanv ta pam swmei hei Ravguangc rui zauczihmei e twmei nangniw thay mak nah cho? Mi zaeng rui, thow pwni mbaanv ta rupswpui mei tei, karana kata Ravguangc khang zauczihmei tiswlou the. 5 "Kamei rui aniu khou tilungcloumei bumaengc khang, kamei mamavna kahaw ranv sih bam e,"a twna nthanmei latrik rui samei hei nsa lat de twna nangniw ning nah cho? 6 Tiki Ravguangc rui tiimei zauzian hei thu daic ranv di he. "Daihriw swmei ta Ravguangc nuh mak e; tiki niamhmei ta suaihiamlou e," twna nthanmei latrik rui sa e.
7 Mi zaeng rui, Ravguangc bangc bam o. Ravsic ta ndyangna akhangv o. Kum ti thei kamei nangniw khou rui pak kan puni. 8 Ravguangc daeng na guang o; kumc e thei kamei nang daeng na guang puni. Paapcmei nunc, nangniw baanc khiu nthan o; lungning kaneimei nunc, nangniw lungning sw-nthan o. 9 Nangniw lungh kabiuna latluna kap o. Nuihmei phaan kap o; neihlamei phaan lungh ryanra o! 10 Poubauhmei hu khou niamh key o. Kum e thei kamei rui nangniw ta zay kauh thaulou puni.
Khristian Makaemv Khat Khat ta Latzan Swmei
11 Chana thiu, nangniw khat khat ta sakasicna sa rio. Thow pwni kachana ta sa kasicmei hamh e thei latzan swmei kamei tei Riakdanv ta nuh makmei e khatni Riakdanv latzan sw tu e. Nangniw rui kariak latdanv ta latzan sw e thei, nangniw kariak latdanv piumei nunc hamh the; mi ta tei latzan swmei nunc di the. 12 Kariak latdanv tiiloumeipu khatni latzanpouc thu Ravguangc na de. Kamei na rui gulou ngam e khatni swmaan ngam e. Nangniw makaemv ta latzan sw khang nangniw thow na cho?
Thei Hu Kakhanh Thay o
13 "Aseic hamh e thei nthuanh, mi kumh mi kumhmei kaidai thangc tingkwm akhat tat lana syan mpeyna ntaanv ni," twna sa bammei nangniw mi hei nking o. 14 Nang panty khou nthuanh tabui pat puni cho twmei nangniw thay mak e! Nangniw panty hei thu matak khat na chiclou lana maan kanmei muangluc na kumh tuang de. 15 "Poubauhmei rui ningmei thei layna ringc bam e thei, mi hei hamh e thei mi tei taanc ni," twna nangniw sa ni tuang e. 16 Tiki nangniw gaenghswna ramhkhe sw bam e. Mi hei kum lak nina e.
17 Nchumhmei ta thayna taanh makmei tei paapc e.