3
Latsav
1 Achana thiu, nangniw meicgeihna dinhpouc sw nangh e. Kalam thu nchamloumei aniu ta sw nimei latzan hei nthuk diangc puni twmei aniu thay e. 2 Aniu meic guayna kalam mpeyna khou maanv de. Tiki thow pwni latsav khou maanv makpui mei tei thu nthuihpui mei di the khatni kapumc sinriap ngampui mei di the. 3 Aniu rui takuanh ta sinsw nuh khang kamwang khou mwangkhap louna, aniu rui kata titat nii niimei biak thangc titat e. 4 Rungh ta tei ni kakhanh zauc o. hei di daihmei rungc tei hei di tanhmei mpwan rui thui tat bam sini, maithah launa rui kaguatcna rungh thoumeipu kamei rui titat nii niimei biak titat ngam e. 5 Baley ni mi tei kumh tuang e. Mi hei meic pumc khou kalaunamei nanw bam khwan sini latdai sa e.
Mai kiak na rui ramvpuk kaw ngam tuang e twmei ning zauc o! 6 Baley hei ni mai e. Baley hei aniu pumc khou nchumh makmei mbaanv e. Mi rui aniu pumc kapwm ta sw-mphuam e. Maikwam mai mi baley khou hei towlouna mi hei rui aniu ringcpaan kapwm tikau e. 7 Maansei rui khouringh zaat guayna—nwmbangc khouringc, nruayna, nrui khatni dui khouringc kaguayna ta sw-nngiu ngam de. 8 Tiki meic gaanv khat na sini baley ta thu sw-nngiu ngam mak e. Mi hei rei reina bam thay makmei simei akhat e. Kakhou meic theic nuhmei khay rui padik e. 9 Mi hei rui aniu Pu Poubauhmei ta thuancku e khatni mi hei rui Ravguangc ta luicna damcloumei maansei ta siang e. 10 Mwang akhat na khou rui thuanhpui lat ni, syang ni pat e. Achana thiu, aniu mi kumc nina hamh e. 11 Duipuakkai akhat na khou rui dui ndeihmei ni, nkhucmei ni puak pat di nah cho? 12 Achana thiu, tadut bang rui oliv thay nthai di nah cho? Luairyn luai rui tadut thay nthai di nah cho? Ntey dui puak patmei duipuakkai khou tei rui zangv gaymei dui puak pat mak e.
Tingkauh Thangc rui Keymei Ningting
13 Nangniw pang khou ningtyng ntakmei nai bu cho? Mi tei katuang gaymei panty rui, ningtyngna niamhna taanhmei taanv rui lyan o. 14 Tiki nangniw lungc khou nkhucna mamavmei khatni kakhang khang na ningmei lungning nai e thei, nangniw tuang ningting khang tei gaengh swna nchumhmei ruc khou paapc taanc nangh e. 15 Mi kumhmei ningting tei thu tingkauh thangc rui key tuang hamh e; mbaanv tuang de, ravchaptat makmei tuang de, ravsic tuang de. 16 Kalam thu mamavmei khatni kakhang khang na ningmei tei rui agay agimei khatni simei tipat e. 17 Tiki tingkauh thangc rui keymei ningting thai thu reymei khou nthanmei, chuzaenghmei, lunghzaenghmei, katun khou na tat makmei, nzianthaymei, gaytaanv taanhmei, meickai ta ning kasic makmei khatni kalwn sw makmei e. 18 Chuzaengh khang karamhmei guay rui chuzaengh khang nrouloumei thay ravchaptatmei nthai e.