2
Zawkhu Zawru Zauhmei ta Luhmei
1 Achanathiu, nangniw Hymdaihmei Kaipouc, Jisu Khrista khou lwmmei nunc swna, meicnunc ta guhsw gahsw rio. 2 Nangniw charuangc kariumei bamv khou lungcgaymeipu rui kachaekc baanrwn runna kamanv kunghmei pheybaan piuna guang the; tiki lungcsimeipu thu pheyraan piuna guang the twna kakhanh zauc kho. 3 Khoutei pwan gay piumeipu ta tei, "Mi khou hei dungc o," twna sa the; tiki lungcsimeipu ta tei thu, "mi thangc tei ding o," hamh e thei, "Kandih khou dungc o," twna sa e thei, 4 mi hei zawkhu zawru zauhmei hamh nah cho khatni lungning simei khou rui patmei latzan hamh nah cho?
5 Nking o, nzianmei achanathiu! Lwmmei khou lungcgaymei nunc sw khang khatni kata nzianmei nunc khang tii ni twna nrianhloumei guangcdic tei laa khang, Ravguangc rui thu mbaanv mikzaw khou lungcsimei nunc ta kapah tu hamh nah cho? 6 Tiki nangniw thu lungcsimei ta mala e! Nangniw ta ni binna latzankai khou zaylou bammei hei lungcgaymei nunc rui hamh nah cho? 7 Nangniw khang tiiloumei chingkhiuhmei zanc ta malana swmei hei lungcgaymei nunc rui hamh nah cho?
8 "Nang rana nang ta nzianmei kumcna nang kai kaining kaigeimei ta nzian o," twmei nthanmei latrik khou hyloumei daihmei latdanv tei nangniw piu e thei, nangniw lat piu chuymei the. 9 Tiki nangniw rui meicnunc ta zawkhu zawru zaucna sw e thei, nangniw paapc taanc e, kumna nangniw Riakdanv twanlyammei nunc e. 10 Kalam thu Riakdanv akhat piu makmei hei kapwmna piu makmei lev nchamc de. 11 "Lungcmaanv lungcmow lak nina e," twna sameipu rui, "Meic dow lak nina e," twna ni sa e. Nangniw lungcmaanv lungcmow mak sini meic dow e thei, nangniw Riakdanv swbakmei the. 12 Aniu ta tinyngswloumei kariak latdanv thei tei layna, aniu ta latzan sw punipui zaeng rui, nangniw latsav khou khatni taanv khou suriakthay o. 13 Kalam thu nzian thay makpui mei ta zauzian maekna latzan sw puni; tiki zauzian rui latzan ta ngam e.
Lwmmei khatni Taanv
14 Achanathiu, thowkumhmei rui kakhou lwmmei nai e twna sa laki kataanv thu maek e thei, mi tei rui tabui gaeng tuang naina cho? Mi ramlum tei rui kata gulou ngam puni di nah cho? 15 Chana hamh e thei tanpui thowkumhmei nsuay mbaanv khang khatni tu zangv khang maekna bammei kakhou, kakhang kage naimei tei tiilou makna, 16 "Chuzaenghna tat tho, lumc tho, nggu tho," twna kadylou tina mi tei rui tabui gaeng tuang naina cho? 17 Mi tei kumcna, taanv kazauh makmei ramlum tei thu theihmei de.
18 Meic gaanv saekc rui, "Meic gaanv khat khou lwmmei nai e, baihmei gaanv khat khou taanv nai e," twna sa pu e thei, "Taanv kazauh makna lwmmei kiu akhou lyanlou o; ai thu ataanv rui aram lwm lyanlou puni," twna ai thu sa daw puni. 19 Ravguangc akhat na nai e twmei nang lwm e; mi tei nchumh the. Ravsic ni mi tei lwmna ping kadunh bam de. 20 He mpangmei! Taanv kazauh makmei ramlum tei thu nsa dea twmei lyanloumei ta laa nii bu cho? 21 Aniu pu Abraham ta ravchaptatmei swna laaloumei tei taanv paan rui hamh nah cho? Kamei rui kanac mpouh Isaak ta ravchabamv khou khaengpui paan rui hamh nah cho? 22 Mi khou hei lwmmei lev taanv tat nchamcmei hei nangniw how the. Taanv kazauh pwkhou karam lwm tei nthuihpui tuang e. 23 "Abraham Ravguangc ta lwm the, kumna karam lwm paan rui Ravguangc rui kata ravchaptatmei e twna laalou the," twna nthanmei latrik khou hyloumei tei mi hei the. Kumna Abraham ta Ravguangc pam twna kaw the. 24 Meic gaanv khat ta ti-nzihloumei hei taanv paan rui e; lwmmei na rui hamh e twmei nangniw how the.
25 Mi tei kumc muaina, mangcsangmeiluc Rahab ta tei ni, kamei rui Israelmei gwanrummei nunc ta laalouna chaeng baih thangc ndiulouna nkhavloumei taanv paan tei rui ravchaptatmei swna chaklou tuang e. 26 Bumaengh maekmei pumc tei thu theihmei e; mi tei kumcna taanv kazauh makmei ramlum tei thu theihmei de.