Jakob
RUI HYMEI TATDYN
1
1 Ravguangc khatni Poubauhmei Jisu Khrista bangc Jakob ai rui, ginramdic thangc lungc phak tat kanmei kaikhwang ruhna kanei khou hymei: dwangay kady e.
Lwmmei khatni Ningting
2 Achana thiu, nchanvmei kaza kaza nangniw khou guang pwkhou sangaymei e twna neihla o. 3 Kalam thu mi kumcna nangniw ramlum ta nchanvmei hei rui nangniw ta sw ntiplou e twmei nangniw thay e. 4 Nangniw tuang khaengvthaymei tei kachanh dat makna khaengv suak o, kumna ramh gaat tuang maekna nthuihmei sw khang sw o. 5 Tiki nangniw thowkumhmei khou ningting maek e thei, neihlana tiilou punimeipu Ravguangc khou ney o; nzav tuang maekna tii puni. 6 Kamei lwmsi tuang maekna, lwmna ney nina e. Lwmsipui mei tei thu duipui khou mpwan rui phungc pat phungc gut tat bammei dui luat tei kumh tuang de. 7-8 Mi kumhpui mei, kachwn pat pat gut gut bampui mei, kalung kadyng ding makpui mei tei thu Poubauhmei khou rui ramh khat sini laatow ni tu hamh e.
Lungcsimei khatni Lungcgaymei
9 Lungcsimei Khristian chana tei kata Ravguangc rui zay kauh thauloumei khou tei neihla bam kan diu, 10 khatni lungcgaymei Khristian chana tei Ravguangc rui kata ti-nthyam keyloumei khou tei kamei neihla bam kan diu. Kalam thu lungcgaymei tei puc pwang kumcna tuai nuangc kan ni de. 11 Neih thiu tei mai kumc chaengc pat pwkhou, puc bwan guay tei ngguaih key kan the; kapwang guay tuai kan the, kumna karamgai maan kan the. Mi tei kumcna, lungcgaymeipu tei ni lanv ntaanvna ntaanvna tuai kan ni de.
Nchanvmei khatni Nthiammei
12 Nchanvmei khou ding ngampui mei tei sangaymei e. Kalam thu Ravguangc rui kata nzianmei guay khang nrianhloumei swan pykhim—ringcsuangmei kamei laa puni. 13 Nchanvna nthiammei guang pwkhou, "Mi nthiammei hei Ravguangc rui e," twna sa lak nina e. Kalam thu Ravguangc ta thu simei taanh khang nthiam ngam mak e; kamei rui ni meic gaanv khat na ta sini simei taanh khang nthiam mak e. 14 Tiki meic gaanv khat ta nthiammei hei kalung khou naimei kahawmei tei rui nthiam pat tuang e. 15 Mi kumna kahawmei tei naguamna paapc puanc the, paapc tei daic thauna theihmei puanc the.
16 Nzianmei chana thiu, nangniw ta tiguat rio. 17 Gaymei khatni nthuihmei kaipat guay hei tingkauh thangc rui, bw neih, gaanchuangcna damcloumeipu, kalaic bammei sung rui tizingc dat makmeipu Ravguangc rui tii keymei kaipat e. 18 Kamei rui aniu ta katuang nchumhmei lat tei rui, kamei rui ningmei thei layna puanclou the. Mi hei kamei rui damcloumei katana ruc khou aniu hei nthai reymei thai sw khang e.
Chumei khatni Taanhmei
19 Nzianmei chana thiu, mi hei ningtow o! Meic katana chumei khou katumc o; tiki samei khou khatni lunghpuamhmei khou nzaeng o. 20 Kalam thu lungc puamhmei rui nchumhmei, Ravguangc ningmei taanc ngam mak e. 21 Mi zaeng rui, mphuammei lwnlung khatni simei kheiliak guay ganc o, kumna nangniw lungc khou lingclou kanmei, nangniw ta gulou nimei lat tei niamh keyna laalou o.
22 Nangniw rana nangniw ta guatna lat tei chu nana taanh makmei sw rio. Mi guay tei piuna taanc o. 23 Lat tei chu lana taanh makpui mei tei thu maengzau khou kazaw zauclouna taanmei tei kumh tuang de. 24 Kamei kazaw zauclou lana tat pat dat kan e thei, kalwn akumh cho twmei kamei amuc dat the. 25 Tiki thow pwni, meicnunc ta tinyngswloumei nthuihmei Ravguangc lat hei chakuth tancna kathai lana, mi tei thaylouna taanmei na hamhna, mi khou tei kalung gutlouna piu bampui mei ta tei kataanv guay khou tei Ravguangc rui suaihiamlou puni.
26 Thowkumhmei rui kamei ravchaptatmei e twna ning laki kabaley sinriap ngam mak e thei, katuang ravchap ramtat tei nsa de; karana kata guat bam tuang de. 27 Pu Ravguangc khang nthanmei khatni nthuihmei ravchaptatmei kiu thu: nruna nunc khatni may nunc ta kaniw ryanra zaucloumei khatni mi mbaanv rui kata sw-mphuam makmei hei e.