5
Lungcgaymei nunc ta Kakhimloumei
1 Lungcgaymei nunc, nangniw nking o! Nangniw ruc khou keylou punimei ryanra ryanriumei khang tei rui kangiuhna kap laa tho. 2 Nangniw tuang lanv guay raem ngam the khatni nangniw tuang pheybaan nthumc tu ngam the. 3 Nangniw tuang daandi kachaekc sauc ngam the. Kumna mi sauhmei raemv tei rui nangniw khuay ndauh puni, kumna mi tei rui nangniw ta mai kumcna tu puni. Mi nkhamhmei ganv khou hei nangniw lanv peic mpunglou bam the. 4 Nangniw lau tay phihmei nunc tuang phy tii makna lou bammei lanv tei rui nangniw khuay kauc ndauh bam e, khatni nangniw lau taymei nunc rui kauhmei khwan tei Ngamparimei Poubauhmei nukuanc chu tangc the. 5 Nangniw mbaanv khou mathac malacna, ramh ningtow makna lungc the. Nangniw rana nangniw ta dowluai nimei khouringc gy kumc bam the. 6 Nangniw rui ravchaptatmei nunc ta khuay nkhamlouna swluai the; kaniw nangniw ta akhangv mak e.
Khaengvthaymei khatni Huayneymei
7 Mi zaeng rui, achana thiu, Poubauhmei guang mak saanv khaengv thayna bam o. Zauc lo, lautaanhmei nunc rui kathai laa khang khaengvthayna tingsei mun khatni lauphwnswan ting ta nkhwan bam e. 8 Nangniw ni khaengvthay nina e. Ding ntip bam o; Poubauhmei guang nimei tingmik na the.
9 Chana thiu, nangniw ta latzan sw mak khang, nangniw chana punav khat khat ta khanc bam rio. Zauc lo, latzanpouc chaengmun khou ding bam the. 10 Chana thiu, Poubauhmei tuang muczwng nunc ta tei ningtow o. Ryanra khaengvmei khou kaniw kumcna khaengvthay o. 11 Aniu rui kaniw ta sangaymei nunc twna kaw e; kalam thu kaniw khaengvthaymei nunc e. Job rui khaengv kanmei tei nangniw chu kan the, khatni nkhamh khou Poubauhmei rui kakhang tiilou dat kanmei tei nangniw thay the. Poubauhmei thu zauzian khatni nzianmei rui padik e.
12 Achana thiu, nangniw tingkauh ta pwni, kandih ta pwni, baih baihmei ta pwni zay saancna syangdyng sw rio. Nangniw Ravguangc latzan khou keylou mak khang, kum ni thei "kum ni" khatni kum lak e thei "kum lak e" twna sana taan o.
Huayney o
13 Nangniw pang khou thowkumhmei ryanra bammei nai tu cho? Kamei huayney kan diu. Thowkumhmei neihla bammei nai tu cho? Kamei Ravguangc ta thuancna swan kan diu. 14 Nangniw pang khou thowkumhmei nnau bammei nai tu cho? Poubauhmei zanc khou kakhou thauh teylouna kakhang huayneylou khang phwamling gaandaic guay ta kaw kan diu. 15 Lwmna huayneymei tei rui kata tigaylou puni, kumna Poubauhmei rui kapumc tigaylou dat puni khatni kamei paapc taanclou e thei kuaklou puni. 16 Nangniw ta suc numei khou rui tigaylou khang, nangniw paap khat khat khou kalauhna khat khat khang huayney kary o. Ravchaptatmei tuang ravsuai pumtan nai e khatni taanvdaih taanc ngam e. 17 Elija hei ni aniu kumhmei maansei de; tiki kamei rui ting riu mak khang lunghgutna huayney pwkhou, tingkwm kathumh bw charuk ting riu keylou mak khwan e. 18 Kamei rui huayneylou dat pwkhou tingpuk rui ting tikey dat the, kumna kandih khou phunling nthai dat the.
19 Achana thiu, nangniw thowkumhmei chaeng maanvna nchumhmei khou rui ducna tat kanmei ta phungc guanglou dat e thei, 20 thow pwni paapcmei ta katuang nchumh makmei chaeng khou rui phungc guanglou datmei kamei tei rui paapcmei bumaengcd ta tei theihmei khou rui gulou puni khatni kapaap heizumei tei kuaklou puni twmei kamei thay kan diu.