4
Ravguangc ta Tipianloumei Panty
1 Nkhamh khou, chana thiu, Ravguangc ta tipian khang nangniw akumhna lungc nina cho twmei aniw rui nangniw khou nchamlou kan the. Mi tei kumcna, nangniw lungc bammei hei mbu hay hay thau khang Poubauhmei Jisu zanc khou, ntaw nangniw ta zaenghuay e, khatni katiu e. 2 Kalam thu Poubauhmei Jisu zanc khou aniw rui nangniw khou nchamlou kanmei tei nangniw thay the. 3 Nangniw nthanmei swna khatni lungcmaanv lungcmowmei khou rui ducna bammei hei Ravguangc kahawmei e. 4 Nggaanvmei nangniw, nangniw now lev akumhna nthanmei khatni chingkhiuhmei lwnlung khou lungc nina choe twmei thay nina e. 5 Ravguangc ta thay makmei Jentailmei nunc kumcna nthah boulahna lungc nina hamh e. 6 Kumna mi lam khou hei, meic gaanv khat na sini chana nchamc khou nkhuaimei taanv hamh e thei, guatmei taanv taanc lak nina e. Aniw rui nangniw khou kasiaththay khang salou kanmei tei kumcna, mi kumhmei nunc khou tei Poubauhmei latzan keylou puni. 7 Ravguangc rui aniu ta kawloumei thu mphuamna lungh khang hamh e, nthanna lungh khang de. 8 Mi lat ta hei ramh sak makpui mei tei thu, maansei ta hamhna nangniw khou katuang Bumaengh Nthanmei tiiloumeipu Ravguangc ta ramh sak mak tuang e.
9 Chana punav ta nzianmei lam khou thu hy dat bam khang kage maek khe. Kalam thu khat khat ta nzian khang nangniw khou Ravguangc rui nchamlou the. 10 Kumna Makedonia khou bammei chana punav guay khou nangniw swlou bammei tei the. Mi zaeng rui, chana thiu, nangniw mi lam khou hei mbu thau khang huaycha e. 11 Aniw rui dinclou kanmei tei kumcna kakhang kakhang reih reina lungc bam khang karamc o. Kataanv kataanv khou lungc gut bam o, khatni kabung kabung khang taancna lungc o. 12 Mi kumna ravning makmei nunc rui nangniw ta chakhwang swlou khang khatni nangniw meickai khou ngangvlou mak khang sw o.
Lwmmei Swna Theic Kanmei nunc Lam
13 Nangniw, chana thiu, rigwnmei maekmei nunc kumcna zaengsina bam mak khang, theic kanmei nunc lam khou tei nangniw thay nthan kanmei ta aniw kahaw e. 14 Jisu theiclouna ringcthau dat kan the twmei aniu lwm e. Mi zaeng rui Jisu khou lwmlouna theic kanmei guay ta thu Ravguangc rui Jisu thei tiguang dat puni twmei aniu lwm e.
15 Aniw rui ntaw nangniw khou dinc bammei hei Poubauhmei tuang latdyn e. Mi kiu thu: Poubauhmei guangpui nungc kiu ringc bammei aniu, theic kanmei nunc hu tat kasuakc ni tu hamh e. 16 Poubauhmei kamei kahak tingkauh thangc rui keyna kauh baanchara daihmei khwan rui, Ravguangc tuang tiangka rui kauc puni. Mi khou kiu, Khrista khou lwmlouna theic kanmei nunc ringcthau rey puni. 17 Mi tangv, mi ganv khou kiu ringc bammei aniu ta ni tingpuk khou Poubauhmei ta ariw khang kaniw ta lev muangh khou laa thau puni. Kumna aniu Poubauhmei lev tingsaengzaeng bam puni. 18 Mi lat hei rui nangniw khat khat ta swm kary o.