3
1 Nkhamh khou aniw khaengv ngam mak khena, aney rana Athen khou bam duc lana, 2 Khrista tuang gaychamv dinhmei khou Ravguangc tuang siamruai sw nchamcmei chana Timothi ta ndiuloumei gay the twna aniw ning the. Kumna nangniw ta lwmmei khou titanclou khang khatni katiulou khang kata ndiulou kan the. 3 Mi kiu, mi rairiumei zaeng rui nangniw gaanv khat na sini hanc dat mak khang e. Mi kumhmei rairiumei hei ni aniu khang Ravguangc rui ningmei akhat de twmei nangniw thay e. 4 Aniu rairiumei ariw puni de twna aniw nangniw daeng khou bammei ganv khou tei salou kanmei tei, kachangcna guang tangclou the twmei nangniw thay e. 5 Nthiammeipu rui nangniw ta nthiam bowna, aniw lakh nsa taan pw ramc e twna lungc geicna, ai reih reina bam ngam mak khena, nangniw ramlum akumh bam tu cho twmei thay niina Timothi ta ndiulou kanmei tuang e.
6 Ntaw Timothi nangniw khou rui guang datna, nangniw lwmna khatni nzianna bam de twmei gaymei chamv phungc guang the, khatni nangniw aniw ta nzianna ning bam de, kumna aniw nangniw ta how dat niimei kumcna, nangniw ni aniw ta how dat niina bam e twna kamei rui raclou the. 7 Chana thiu, aniw ryanramei khatni katuakcmei ariw bam khou nangniw rui aniw ta tineihlalou e. Nangniw lwmmei khou ntipna bammei tei rui aniw ta tineihlalou e. 8 Nangniw Poubauhmei khou ntipna bam e thei, aniw chaengc ringc bam puni. 9 Ntaw nangniw zaeng rui Ravguangc ta thuancku e. Nangniw zaeng rui kahu khou neihlana bammei khang sa dat khang thay makna neihla e. 10 Aniw nangniw zaw how datna nangniw khang lwmmei khou kage naimei tei ti-nthuihlou khang, zingbangc kalaanv Ravguangc khou aniu lungsyng khou rui huayney bam e.
11 Aniw nangniw daeng khou guang dat khang aniu Pu Ravguangc khatni aniu Poubauhmei Jisu rui aniw khang chaeng laanclou pw diu o! 12 Aniw rui nangniw ta nzianmei kumcna nangniw ni khat khat ta khatni meic guayna ta nzian khang Ravguangc rui nangniw khou nzianmei ti-mbu thaulou pw diu. 13 Mi kumna, aniu Poubauhmei Jisu kamei guaya lev guang pwkhou, aniu Pu Ravguangc hu khou nangniw khuay maekmei khatni nthanmei sw khang kamei rui nangniw khou pumtan tiilou khang e.