1 Thesalonikamei 2

Thessalonika khou Paul tuang Taanv

¹ Chana thiu, aniw nangniw khou guangmei tei nsa taan mak khe twmei nangniw thay bammei tei the. ² Aniw Thessalonika khou gut nimei hu khou tei Philippi kaidai khou aniw ta swkasicna sw zak kasiclou the. Kumna aniw ta thinghmei azuh nai khwan sini, Ravguangc tuang gaychamv tei nangniw khou dinclou khang, Ravguangc rui aniw ta tibauclou the twmei nangniw thay bammei tei the. ³ Aniw rui nangniw ta gaychamv laalou khang katiumei tei nangniw ta zay mbiangh khang nthan makmei lungning rui, ramh e thei guatna sa tu hamh e. ⁴ Tiki Ravguangc rui aniw ta lwmna gaychamv nsinloupui thei layna aniw sa bam tuang e. Aniw meicnunc ta tipian khang sw tuang hamh e; tiki aniu lung zauhmei Racguangc ta tipian khang de. ⁵ Aniw meic nuhgay khang luanhna sa tuang hamh e twmei nangniw thay e. Aniw khang gaeng khang sw bam tuang hamh e twmei ni Ravguangc rui thay e. ⁶ Nangniw rui pwni, meic baihmei rui pwni, maansei rui thuancloumei ta aniw kahaw mak e. ⁷ Mi tei sw nina e twna aniw Khrista tuang Latdiutatmei nunc swna sa nuh khwan sini, aniw sa mak e. Tiki nacpui rui kanac nunc ta makuat kumc, aniw nangniw pang khou lungc niamhna bam kan e. ⁸ Aniw nangniw ta nzianpui zaeng rui, nangniw khang Ravguangc tuang Gaychamv tiiloumei na hamhna, aniw panty kahak tiilou the. Aniw nangniw ta heidikamv nzian e.! ⁹ Chana thiu, aniw akumhna taanc ruaicna lungc kan tu cho twmei nangniw ningtow bam kan e. Aniw nangniw khang Ravguangc tuang Gaychamv dinh khang nangniw khang puatcrith tiilou nii makpui zaeng rui, aniw zingbangc kalaanv taanv taancna lungc kan e.

¹⁰ Lwmmei nangniw khou aniw khuay maekmei e khatni nchumh makmei tuang swlou kanmei maek e twmei nangniw ni, Ravguangc ni thay e. ¹¹ Pu akhat rui kanac nunc khang swloumei kumcna, aniw rui nangniw kathuic khang swlou kanmei tei nangniw thay e. ¹² Aniw rui nangniw ta katiulou kan e, lungc tithaulou kan e, khatni katuang guangcdic khatni hymdaihmei laa khang nangniw ta kawloumei Racguangc ta tipianna lungh khang nangniw ta katiu ranvna salou kan e.

¹³ Aniw Ravguangc ta thuancku bammei lam akhat dat rui, nangniw aniw khou rui Ravguangc lat chumei ganv khou tei, maansei lat e twna laa makna, Ravguangc lat e twna laalou the. Kalingna mi hei lwmmei nangniw khou taanv taanclou bammei Racguangc lat e. ¹⁴ Chana thiu, Judia kandih khou bammei Ravguangc tuang phwamling mei nunc, Khrista Jisu mei nunc khou pat kanmei kahak tei nangniw khou ni pat bammei tuang e. Kaniw Jihudimei baanc bangc khou ryanramei ariw kanmei kumcna, nangniw ni nangniw zaat makaemv baanc khou ryanramei ariw the. ¹⁵ Jihudimei nunc hei rui Poubauhmei Jisu ta khatni muhzwng nunc ta swluai the, kumna aniw ta ni swkasic khang sw the. Ravguangc rui ni, maansei rui ni zauczihpui taanv kaniw taanc the. ¹⁶ Jentailmei nunc khou ni kaniw khang ringhbamv phungc guang nimei chamv tei dinh mak khang, aniw ta thingh khang kaniw sw the. Mi kumna kaniw paap guay tei lou padik mak saanv kanganv tanghmei paap taanc the. Kumna nkhamh khou kaniw khou Ravguangc lungpuam keylou the.

Paul Kaniw Daeng khou Guang Niimei

¹⁷ Chana thiu, aniu lungning khou ntamv mak sini, pumh khou matak khat ntamvna bammei khou hei, aniw nangniw ta ningna, nangniw zaw how dat niina karamc ranv sih bam e. ¹⁸ Aniw nangniw daeng khou guang dat niina, Paul ai karamc dat dat the, tiki Seitan rui aniw chaeng thingc bam e. ¹⁹ Aniw khang rigwnmei, neihlamei, khatni Poubauhmei Jisu Khrista guang pwkhou kahu khou zawkauhmei pykhim sw nimei kiu nangniw hei the. ²⁰ Aniw hei aniw tuang hymdaihmei khatni neihlamei e.