Thesalonikamei
KHOU Paul RUI HYMEI REYMEI TATDYN
1
Chaengriw Lat
1 Paul, Sila, khatni Timothi rui—
Pu Ravguangc khatni Poubauhmei Jisu Khrista mei, Thessalonikamei phwamling mei nunc khou hymei:
Zauzian khatni chuzaenghmei nangniw khou naimei sw diu.
Thessalonikamei nunc tuang Lwmmei khatni Panty
2 Aniw huayneymei khou nangniw khang ningtow tanh tan bam e, kumna nangniw khang Ravguangc ta thuancku tanh tan bam e. 3 Nangniw tuang lwmmei taanv, nzianmei taanv khatni Poubauhmei Jisu Khrista khou ntipna rigwn bammei, mi guay hei aniu Pu Ravguangc hu khou ningtow bam e. 4 Ravguangc rui nzianmei chana thiu, kamei rui nangniw ta kapahlou the twmei aniw thay e. 5 Kalam thu aniw rui nangniw khou gaychamv phungc guangmei tei lat na hamhna, Bumaengh Nthanmei tuang pumtan kazauhna mi tei kaling siakmei the twmei lyanlou kan the. Aniw nangniw daeng khou bam khou tei akumhna lungc kan tu cho twmei nangniw thay e. Mi tei nangniw khang e. 6 Nangniw aniw thei khatni Poubauhmei thei lay nzeic o. Kalam thu nangniw ryanramei mpeyna ariw sini, Bumaengh Nthanmei tuang neihlamei lev kazauhna lat tei nangniw laalou kan the. 7 Kumna nangniw hei Makedoniamei khatni Akhaiamei lwmmei nunc khang lay nzeic nuhmei sw the. 8 Poubauhmei lat hei nangniw khou rui Makedonia khatni Akhaia kandic kapwm khou tii patmei na hamhna, nangniw Ravguangc khou lwmmei chamv hei ni kabamv kathuic khou chu lik tat kan the. Kum thena aniw sa dat khang kage maek khe. 9-10 Aniw guangpui ganv khou tei nangniw aniw ta akumhna laalou kan tu cho khatni kalingmei ringhmei Racguangc tuang siamruai sw khang, khatni Ravguangc rui tiringcthaulou datmei, Ravguangc lungpuam khou rui aniu ta gulou nimeipu kanac mpouh Jisu tingkauh thangc rui guang nimei ta nkhwan khang, nangniw akumhna ravmaengc khou rui Ravguangc khou guang kan tu cho twmei kaniw rac bam e.