5
Poubauhmei Guang Nimei khang Chamdaanvmei
1 Chana thiu, kakwm kaganv lam khou thu nangniw khou hy dat khang kage maek khe. 2 Kalam thu Poubauhmei guang nimei hei kaihouhmei zingbangc guang kumc guang puni twmei nangniw thay the. 3 Meic nunc rui "Meic guayna chuzaenghna bam de, ramh khat sini sw ni tu hamh e," twna sa bammei ganv khou tei thay mak liangna sw kamut kamaimei kaniw khou meicpui narui thau kumc guang puni. Kaniw duak dat ngam lak khe. 4 Tiki chana thiu, mi tingmik kiu nangniw khang thu thay mak liangna kaihouhmei guang kumc patlou lak e; nangniw thu zinghmei khou bam mak e. 5 Nangniw thu gaanhmei nac nunc de; kalaanv nac nunc de. Aniu thu zingbangc mei hamh e; zinghmei mei hamh e. 6 Mi zaeng rui, meic baihmei nunc kumcna aniu zip ri bam lak nina e. Aniu rakna, ntak nrakna bam nina e. 7 Zipmei nunc tei zingbangc zip tuang de; zouh mbamei nunc tei ni zingbangc mba tuang de. 8 Tiki aniu thu kalaanv tuang mei nunc de. Kumna aniu thu ntak nrakna bam nina de. Lwmmei khatni nzianmei rui ngaengvthuapc swna, khatni guloumei ta rigwnmei tei rui rihpyrun swna piuna bam nina e. 9 Ravguangc rui aniu ta kalungpuam keylou nimei nunc khang kapahlou mak e; tiki aniu Poubauhmei Jisu Khrista paan rui ringhbamv laa khang kapahlou tuang de. 10 Kamei guang khou, aniu theic bam pwni, ringc bam pwni, kamei lev lungc nchamc khang kamei aniu khang theiclou the. 11 Mi zaeng rui, nangniw sw bammei tei kumcna khat khat ta katiu thau kary o khatni kasiamh thau kary o.
Kady Kanavmei
12 Chana thiu, nangniw pang khou taanv taancloumei, Poubauhmei khou nangniw ta chaeng zayloumei khatni nchamloumei nunc ta tei chakhwang champouh sw khang aniw rui nangniw khou zaenghuay e. 13 Kaniw tuang taanv zangv khang tei rui kaniw ta nzianna nkunna chakhwang champouh swlou o. Nangniw chuzaenghna lungc bam o.
14 Chana thiu, aniw rui nangniw khou huaycha e: aliauhmei nunc ta mphutlou o; kalung nnaumei nunc ta katiuthaulou o; suanmei nunc ta nkhavlou o, meic katana khou khaengvlou o. 15 Simei khang simei khangc riu; nangniw khat khat khou khatni meic guayna khou gaymei taanclou khang karamc tanh tan bam o.
16 Neihla tanh tan bam o. 17 Taek makna huayney bam o. 18 Si khou ni, gay khou ni thuancku bam o. Nangniw Khrista Jisu khou bammei panty khou mi tei nangniw khang Ravguangc rui kahawmei e
19 Bumaengh Nthanmei ta sw mit rio. 20 Ravmundinhmei ta ramh sak mak tuang sw rio. 21 Tiki kaguayna tei simei gaymei zauc o. Gaymei tei laalou o; 22 kumna simei guay tei ganc o.
23 Nangniw pumc, bumaengh, du kapwm Khrista guang pwkhou nthuihmei, khuay maekmei sw khang chuzaenghmei tiiloumei Racguangc rui nangniw ta sw nthanlou pw diu. 24 Nangniw ta kawloumeipu hei thu lwmnuhmei e; kamei rui mi hei taanclou puni.
25 Chana thiu, aniw khang ni huayneylou o.
26 Chana punav nzianmei tuang lyanna khat khat khang dwangay kady kary o. 27 Poubauhmei zanc khou ai rui nangniw khou sa tuang e: mi tatdyn hei chana punav guay khou paclou o.
28 Aniu Poubauhmei Jisu Khrista zauzian rui nangniw ta bam nduanghlou diu.