4
Katiuloumei
1 Mi zaeng rui, ai ningna bammei, nzianmei achana thiu, ata tineihlalou nimei, atuang swan pykhim sw nimei, ai nzianmei nangniw, mi tei kumcna Poubauhmei khou ding ntip bam o.
2 Euodia lev Suntukhe nang ney khou ai huaycha e; nang kai swanrey nei Poubauhmei khou chwn chamc o. 3 Lwmnuhmei ai lev boudu nchamcmei nang ni mi tanpui nei ta hei nkhavlou o. Kaney hei Klemen khatni baihmei ai lev taanv sw nchamcmei ringhmei latrik khou kaniw zanc naimei nunc lev gaychamv dinhmei khou ai lev taanv ranvna taanc guangmeipui nei e.
4 Nangniw Poubauhmei khou neihla tanh tan bam o. Ai rui sa dat e: neihla o! 5 Nangniw lunghzaenghmei tei meic guayna khou lungc lyan o. Poubauhmei guang zaic puni the. 6 Nangniw ramh lam akhat na khang sini lungc katuakc bam rio; tiki nangniw huayneymei kathuic, nangniw khang kage naimei guay tei Ravguangc khou poulou o, thuanckuna ney o. 7 Kumna maansei rui thay tangh makmei Ravguangc tuang chuzaenghmei tei rui Khrista khou nangniw lungc khatni lungning ta dinggaeklou puni.
8 Nkhamh khou, chana thiu, kalingmei, chingkhiuhmei, nchumhmei, nthanmei, meic nzianmei khei, mi kumhmei gaymei thuanckulou biuhmei gunc guay ta hei nangniw lungning khou machunhna bam o. 9 Ai rui nangniw khou lat swna nchamlou kanmei khatni akheiliak rui lungc lyanlou kanmei guay tei nangniw taanc bam o. Kum pwkhou, chuzaenghmei tiiloumei Racguangc rui nangniw ta bam duanghlou puni.
Kaipat khang Thuanckumei
10 Kaganv tingsaengc sihmei tangv, nangniw akhang ningtowlou datmei khang tei ai Poubauhmei khou neihla e. Nangniw akhang ningtowlou taan the twna sa tu hamh e; nangniw khang kadouchamei ariw lamc makna de. 11 Mi hei akhang ramh maek khena lungc ryanra the twna sa tuang ni hamh e. Akhou tiilou loumei lwnlung khou tei ai pian thay the. 12 Lungcsina akumhna lungc nina cho, lungcgayna akumhna lungc nina cho twmei ni ai thay the. Kumna nggu pwni, ndaepc pwni; katitna nai pwni, liamh laihna nai pwni, ai pian thay the. 13 Khrista rui akhou tiiloumei pumtan paan rui ai ramh guayna ngam the.
14 Tiki ai ryanramei dam hei nangniw ni phungc nchamcloumei hei gaymei taanv the. 15 Philippimei nangniw thay bammei tei the: ai gaychamv dinc guang reymei douc tei, ai Makedonia khou rui tat datmei ganv khou tei ata nkhavloumei phwamling kiu nangniw na de. Gaengmei, rumhmei khou phungc nchamcmei kiu nangniw na de. 16 Ai Thessalonika khou bam khou, luan guayna hamhna akhang kage nai bam khou, nangniw rui nkhavloumei tei tii guang khwan e. 17 Mi hei ai kaipat laa niina sa tu hamh e; nangniw tuang taanv tei ti-mbu thau khang twna de. 18 Nangniw rui tii guangmei guay na tei laatow the. Akhang kage naimei suangc liamh laihna laatow the. Nangniw rui Epaphroditas khou rui tii guangmei kaipat tei rui akhang gaat tuang nai dat mak khe. Mi tei namh gaymei agaw, Ravguangc rui pianmei khatni laalou nuhmei khaengpui puat the. 19 Ramh khat sini gaat tuang maekmei aRacguangc rui Khrista Jisu paan rui nangniw khang kage naimei guay tiilou puni. 20 Aniu Pu Ravguangc tingsaengzaeng hymdaihmei sw diu. Amen.
Dwangay Kadymei
21 Khrista Jisu khou Ravguangc mei guay ta dwangay kady e. Ai lev bammei chana nunc rui nangniw ta dwangay kady e. 22 Ravguangc meic guayna rui nkunna Kaisar tuang guangckai khou bammei guay rui dwangay kady e.
23 Poubauhmei Jisu Khrista zauzian nangniw khou naimei sw di tho.