Matuwu mampemabohe Alatala
4
1 Aji, apa nahehami Kristus rara katuwua-Na halaku manuhia, komi mui kana mampakaroho rarami bona mahadia komi maheha ewa Kristus. Apa hema-hema to maheha rara katuwuana halaku manuhia, momami madota mobabei doha. 2 Aji, tempomi natuwudipi i dunia ei, nemopa komi mokaingku mantuku dota manuhia, naupawee mantuku dota Alatala. 3 Apa naganamo loga to laipakemi nantuku dota tauna to moma nangincani Alatala. Nadea ngaa pogau hala laibabeimi. Laitukumi gaga dota rarami to nadaa, nalangu-langu, nobabei huha to nantuku dota rara, nobabei huha to mepakalangu, pade nepue hi pue ntanina to moma nahipato rapue. 4 Naherara tauna to moma nangincani Alatala, apa moma komi nantuku ingkura to nobabei oa doha to nelabi kadaana. Etu pade laipakudaara komi. 5 Naupawee hira mei kana mampehonoka ingkura hi Alatala to nahadiami mampabotuhi tauna to natuwu pade tauna to namate. 6 Etu pade Kareba Belo laiparata mui hi tauna to namateramo, bona naupa namateramo ewa kabiahaa humawee manuhia, inohara matuwu moto ewa Alatala natuwu.7 Kahudua dunia hante humawee ihina namohumi. Etumo, pakanoto rarami pade tanee dotami bona mamala komi mohambaya. 8 Pelabinapi kana momepotowe mpuu komi hadua bo hadua. Apa ane momepotoweta, kahalaa tauna to nadea hi kita momami talinga. 9 Kana mometarima komi hadua bo hadua i houmi hante moma mongudu. 10 Laiwaika-Natamo Alatala pampakulea to moma nahibali. Etumo, pakemi pampakulea etu halaku to pobago to nanimpu, mantulungi tau ntanina. 11 Hema-hema to laiwai pampakulea mawali to pojarita, kabelo-belona mojarita'i ewa to noparata lolita Alatala. Hema-hema to mantulungi tau ntanina, kabelo-belona metulungi'i hante roho to laipopewai Alatala, bona rara hangu hangaa to laibabei, rapemabohemi Alatala habana Yesus Kristus. Hiami to nabaraka pade mahipato rapemabohe duu kahae-haena! Amin.
Maheha halaku to pantuku Kristus
12 Ompi-ompi to laipotoweku, nemo komi mahera ane mikolo kahehaa to napepa ewa karani baa apu narata nampehori komi, ewa naria kahehaa to moma nabiaha namparumpa komi. 13 Naupawee kagoemo komi apa laikolomimi kahehaa ewa kahehaa Kristus. Apa magoe mpuu komi mei ane rapahiloidimi kabohe baraka Kristus. 14 Morahimo komi ane habana hanga Kristus rapopore komi, apa Inoha Alatala to nabohe baraka-Na naria hi komi. 15 Nemo maria hadua lako hi komi to maheha habana nepatehi, nangio, nadaa ingkuna ba nampaumpui uruhia doo. 16 Naupawee ane maheha komi habana namparahaya Kristus, nemo komi maea. Unemi Alatala habana komi laiuli to pantuku Kristus. 17 Namohumi tariina pobotuhia rapamula, pade ana-ana Alatala olu to pamulana rabotuhi. Ane pobotuhia rapamula lako hi kita, bewami mei kahuduara hira to moma namparahaya Kareba Belo lako hi Alatala? 18 Rara Buku to Nagaha laitulihi wei:
“Ane tauna to nanoro ke nono moma rapakahalama,
bewa tauna to nadoha pade to moma nangincani Alatala?”
19 Etumo, ane maria tauna to maheha habana laipodota Alatala, nabelopi ane nababei oa ingku to nabelo pade najuju humawee katuwuna hi Alatala to Pejadi, to moma naria nangkalingani tipa-Na.