Ewumi bimba Alatala
5
1 Aku ei penatua ewa komi, to nampahilo mata kahehaa Kristus pade to mantarima mui bagia ane rapahiloidimi mei kabohe baraka Kristus. Kuperapi hi komi penatua, 2 ewura bimba Alatala to naria hi komi. Nemo komi ewa to laipahuru, naupawee ewura bimba etu hante goe rara mantuku dota Alatala. Nemo mobago bona mamparata tomo, naupawee pobago komi habana nabohe mpuu rarami. 3 Nemo komi ewa to moparenta hi hira to laiparahayaka komi, naupawee pakabelo ingkumi rahilora, bona mamala rapenaura. 4 Ane maratadimi to Poewu Koropokona, mitarimami mei patoko tanda pepabeta to moma malau.5 Wetu moto mui komi to nangura, matundu komi hi totua. Pade humaweemi, nemo komi momekahomboi. Apa naria laitulihi rara Buku to Nagaha:
“Alatala nampodaa tauna to nahombo,
naupawee nampotowe tauna to moma nahombo.”
6 Etumo nemo mahombo i tingoo Alatala to nabaraka, bona Napemabohe komi ane temponapi. 7 Popewaimi humawee kamere rarami hi Alatala, apa Hia to nampiara komi.
8 Pakanoto rarami pade maingahawo. Apa Magau Heta balimi nodadao nampali tauna bona napakagero parahayana, ewa hamaa singa to noau pade nomako rau rumai nampali to nakoni. 9 Kana miewa'i hante peparahaya to naroho, apa laincanimi ane humawee ompimi to hangu kaparahayaa i humangkulili dunia nangkolo kahehaa nahibali hante komi. 10 Mohambaya'a bona ane mahudupa komi maheha hangoni, Alatala mampakabeloki komi, mampakaroho peparahayami, mampakaroho rarami pade mampakaroho pentidami. Apa Alatalami puu towe to nangkio komi mamparasai kabohe baraka-Na to moma maria kahuduana habana komi nohangu rara hante Kristus. 11 Hiamile to nabaraka duu kahae-haena! Amin.
Tabe kahuduana
12 Laitulihikaku komi hura to naboko ei hante petulungi Silwanus, ompita to namala raparahaya. Mingki'a mampakaroho wukumi pade mampakanotoka komi ane humawee ei mpuu-mpuu kabohe towe Alatala. Pakarohomi pentidami rara kabohe towe Alatala.