Katuwu moncamoko
3
1 Wetu moto mui komi totua bangkele, matundu komi hi balailomi. Bona ane mariara balailomi to moma neparahaya, mawali meparahayaramo hi lolita Alatala habana ingkumi to nabelo ee, nau momapi napa miulikara, 2 apa laihilora komi bangkelera nengkoru hi Alatala pade moma nakahalaia ingkumi. 3 Ramba wotomi nemo to narawa i hawalikuna, ewa mampetari wulua meliu ntani, mampake ramba bulawa, ba mampake waru to nahuli. 4 Naupawee ramba wotomi kana meumba lako rarami to moma laihilo. Ramba ee mai narata lako rarami to nabelo bo nanone. Etumi ramba to moma maronto to nahuli mpuu olina i tingoo Alatala. 5 Apa owi, ewa eeramole totua bangkele to neparahaya pade nampaharumaka Alatala nampetari wotora. Natundura hi balailora, 6 ewa Sara neturuhi hi Abraham pade nanguli ane Abraham ee mai maradikana. Komi etumi ana-ana Sara ane mabelo ingkumi pade moma komi naeka naupa rapararai.7 Wetu moto mui komi totua balailo, mipekiri belo bewa komi matuwu hante bangkelemi, apa moma nahibali rohomi. Bilara bangkelemi, apa hirami doomi mantarima katuwua to moma maria kahuduana to Nawaika komi Alatala. Poingkukami humawee lauria bona nemo matelawa hambayami.
Towe pade kanonea
8 Kahuduana, kana mohangu baha komi, mohangu rara, mampotowe ompimi to hangu kaparahayaa, ma'ahi rara pade nemo mahombo. 9 Nemo mobalahi ingku to nadaa hante ingku to nadaa, mepopore hante mepopore, naupawee kana miperapikara rahi, apa etumile pade laikio-Na komi Alatala bona mirata rahi. 10 Apa naria latulihi rara Buku to Nagaha iwei,
“Hema to mingki mabelo katuwuna,
pade mingki mampomakoi eo to nabelo,
kana najagai dilana lako jarita to nadaa
pade wiwina lako jarita to nekalowoni.
11 Kana nabakaha ingku to nadaa,
pade mobabei to nabelo,
kana napehimukui mohingkabelo hante tau ntanina,
pade napehimukui mamparata kanonea.
12 Apa Pue nenaa oa hi tauna to nanoro,
pade Pue nangepe oa hambayara nerapi tulungi,
naupawee Pue nampaewa tauna to nadaa ingkura.”
Mohabara rara kahehaa
13 Ane maraji komi moingku belo, hema to moingku daa hi komi? 14 Naupa maheha miepe habana mobabei to nabelo, morahi mpuu komi. Etumo, nemo komi maeka hi hema-hema pade nemo mamere rarami. 15 Kristus aga to mipemabohe i rarami apa Hiami Pue. Kahadia oa komi mampahonoi butu tauna to mampekune komi nangkambelai napa to laiharumakami. 16 Naupawee kana malusu pehonomi bo mebila, pade hante kagaha rarami, bona maea motoramo tauna to nopakudaa komi habana ingkumi to nabelo nantuku Kristus. 17 Nabelopi maheha habana nobabei to nabelo, ane kahehaa ee laipodota Alatala, nemo maheha habana nobabei to nadaa. 18 Apa Kristus, hangkani aga namate habana humawee dohata manuhia. Hia to nanoro, namate habana to moma nanoro, bona Nakenita rau hi Alatala. Woto-Na laipatehi, naupawee Inoha to Nagaha nampatuwu nculi-'I, 19 pade hante baraka Inoha to Nagaha rau-'I nangkarebai Kareba Belo hi inoha to i rara tarungku i po'ohaara to mate, 20 etumi inohara to moma neturuhi hi Alatala tempo katuwua Nuh. Tempo ee Alatala nohabara moto oa-'I hamali Nuh nobabei kapala tahi to nabohe. Hodi aga tauna to nehua i rara kapala tahi to nabohe ee mai. Walu duara aga to laipakahalama rara kajadia ue mowo to nampakatala dunia. 21 Kajadia ee mai nampagambarakata bewa pediu to tempo ei nampakahalama komi. Pediu ee moma laibabei bona magaha wotota lako to nakotoro, naupawee pediu ee mai halaku tipami hi Alatala lako rarami to nagaha. Pediu ee nampakahalama komi, apa Yesus Kristus natuwu nculimi lako kamatea, 22 pade nengkahe rau huruga noncuna mali pangkana Alatala. Tempo ei Hia noparenta hingkani-ngkani hante Alatala. Humawee malaeka Alatala pade humawee roho bo baraka i roelawa natundu hi Hia.