Yesus Kristus eemi koro watu pondasi
2
1 Etumo, tadimi humawee ingku to nadaa, nemopa mebagiu, nemopa mabelo wongko, nemo mui mohiri, pade nemo mepakudaa. 2 Kalentorami mangepe oa lolita Alatala to nakono, kana ewa ngana to lako iote to mingki oa'i manginu koro ue huhu tinana, bona mompene peparahayami pade rapakahalama komi. 3 Apa lairasaimi motomi bewa kabelo Pue. 4 Karatamo komi hi Kristus apa Hiami watu to natuwu, to laitadi manuhia naupawee laipelihi bo laibila i tingoo Alatala. 5 Komi kana ewa watu to natuwu ee, to mamala rapobabei hou Alatala. Komi mei mawali imam to matuwu muntu hi Alatala to mampopewai kurban ewa laipatuduka-Nata Inoha to Nagaha to laipomambela Alatala habana Yesus Kristus. 6 Apa naria laitulihi i rara Buku to Nagaha iwei,“Hilo! Laiboliku i Bulu Sion to naria i Yerusalem hangu watu to laipelihi-Ku.
Watu ee mai koro watu pondasi to nahuli,
pade hema to meparahaya hi Hia,
moma'i rapakaea.”
7 Etumo hi komi to neparahaya, watu ee nahuli. Naupawee hi hira to moma neparahaya, nadupami lolita ei,
“Watu to laitadira tuka hou
watu ee laumi to nawali koro watu pondasi,”
8 pade
“watu ee nawali watu to nepakatehunu,
to nepakanawu.”
Natehunura i watu ee, apa momara nanturuhi lolita Alatala, pade laipakatantu amiramo ewa ee.
9 Naupawee komimile todea to natepelihi, imam to nampobagoka Magaumi, todea to nagaha pade todea to laikami Alatala. Alatala nampelihi bo nangkio komi mehuwu lako kalimaua mehua i rara baa-Na to nepakahera, hante patuju bona mipotolele kareba nangkambelai hangu hangaa to nepakahera to laibabei-Na.
10 “Ilodo, moma komi todea Alatala.
Naupawee, tempo ei nawali todea-Namo komi.
Ilodo moma komi nantarima ahi rara Alatala.
Naupawee, tempo ei laitarimamimi ahi rara Alatala.”
Matuwu halaku todea rara poparentaa Alatala
11 Ompi-ompi to laipotoweku, mpuu-mpuu ku'ulika komi, halaku to rata to no'oha hangoni i dunia, nemo mituku dota rarami to nampaewa dota inohami. 12 Kana mabelo ingkumi i tingoora tauna to moma nangincani Alatala. Bona naupa raraira komi nobabei ingku to moma nabelo, rahilora motomi ingkumi to nabelo pade rapemabohera Alatala ane tempo-Napi Pue marata nculi.
13 Habana Pue, kana matundu komi hi humawee to poparenta i dunia ei. Belo Magau Bohe, 14 belo mui gubernur-gubernur to laitudona mampahuku tauna to nadaa ingkura bo mampabila to nabelo ingkura. 15 To laipodota Alatala, mabelo ingkumi, bona hante ingkumi to nabelo matewunta ngudura tauna to nampakudaa komi bo moma napa ncanira. 16 Katuwumo ewa tauna to moma laipobatua. Naupa moma hema nampobatua komi, nemo etu mipowali tance mampopalerui ingku to nadaa. Katuwumo komi halaku batua Alatala. 17 Bila humawee tauna, potowera ompi-ompimi to hangu kaparahayaa hi Kristus, mengkoru komi hi Alatala pade bila magau.
Mantuku kahehaa Kristus
18 Komi to nawali batua, matundu pade mibila mpuu maradikami, moma wuwu hi to nabelo bo to nadole, naupawee hi to naheke mui. 19 Apa Alatala mei mampokagoe komi ane mikolo kahehaa to kakonona moma mahipato mikolo habana laincanimi napa dota Alatala. 20 Apa moma komi raune ane raweba habana nadaa ingkumi. Naupawee ane mabelo ingkumi pade mikolo kahehaa, Alatala mampokagoe komi. 21 Etu pade laikio komi. Apa Kristus naheha habana komi pade laipahiloi-Namo komi ingku to nabelo bona mituku.
22 “Moma-'I nobabei doha,
pade moma-'I naria nebagiu.”
23 Tempo-Na laipopore, moma-'I nehawa nepopore, tempo-Na laipakaheha moma-'I nepararai, naupawee laijuju-Na woto-Na hi Alatala to moma nantomo hamika pobotuhi-Na. 24 Laikolo-Nami dohata hante woto-Na i kau salib bona matebakahata lako baraka doha pade matuwuta mobabei ingku to nanoro. Baka-baka Kristus eemi to nampakauri komi. 25 Apa ilodo komi nahalatara ewa bimba, naupawee tempo ei nanculimo komi hi to Poewu to nampiara inohami.