Hura Petrus to Pamulana
Tabe
1
1 Lako Petrus, rasul Yesus Kristus. Hura ei laipakatuku hi komi jumaa to laipelihi Alatala to natida i propinsi-propinsi: Pontus, Galatia, Kapadokia, Asia pade Bitinia. 2 Humaweemi laipelihi mantuku liwo Tuamata Alatala, to laipatani bo laipakagaha Inoha to Nagaha bona matigu komi hi Yesus Kristus pade dohami Na'ampuni hante raa-Na. Mohambaya'a bona kabohe towe pade katuwu to nanone lako Alatala ratambaika komi hampe melabi.Harumakaa nangkambelai katuwua to moma maria kahuduana
3 Maita mampaune Alatala, Tuama Pueta Yesus Kristus to hante kabohe ahi rara-Na, laiwaika-Nata katuwua to nabou hante katuwu nculi Yesus Kristus lako kamatea-Na, hampena naroho peharumakata. 4 Taharumaka ane takami humawee rahi to laipahadiaka Alatala hi jumaa-Na, to laiboli-Na i huruga, to moma mamala maropu, moma makahalaia bo moma malau. 5 Apa neparahaya komi hi Yesus, laipodoo-Na moto komi Alatala hante baraka-Na hamalimi nampopea kahalamaa to nahadiami rapakarawa i kahudua dunia. 6 Kagoe mpuumo komi habana humawee lauria, naupa tempo ei kana madua rarami hangoni habana nengila pehori namparumpa komi. 7 Patujuna humawee pehori ee, bona rahilo ane neparahaya mpuu komi. Apa nelabipi kahuli oli peparahayami lako bulawa. Apa bulawa ee moma nantaha duu kahae-kahaena, naupawee ane rapareha kabelona hante apu, marawami ane bulawa mpuu'i. Etu pade peparahayami kana rapehori mui bona marohoki. Apa ane wee, komi mei raune, rapemabohe pade rabila tempo Yesus Kristus mampopahiloi woto-Na. 8 Naupa poma-'I naria laihilomi, laipotowemi-'I. Laiparahayami-'I naupa welau ei moma-'I laihilomi. Etu pade nagoe komi pade kagoemi ee nelabi mpuu hampena moma'i nateuli, 9 apa lairatamimi patuju peparahayami, etumi kahalamaami.
10 Kahalamaa eemile to laipareha belo pade laipegurui mpuu nabi-nabi to nangkewo nangkambelai rahi to Nawaika komi Alatala. 11 Inoha Kristus to natida i rarara nangkewo ane Kristus kana mamparata kahehaa pade mapu ee rapemabohe pade rapopahiloi baraka-Na. Laipehimukuira mpuu nopareha belo bewa pade bulauma ee mai madupa. 12 Nabi eera mai noparata napa to welau ei laiepemi lako to pekarebai Kareba Belo hi komi hante baraka Inoha to Nagaha to laitudu lako huruga. Alatala nangkewokara nabi ee ane to laiulira ee moma laipatujuka hi hira, naupawee laipatujuka hi komi. Malaeka-malaeka Alatala moto mingki mampaha mpuu humawee to laiparata ee.
Katuwu to nagaha pade towe mo'ompi
13 Etumo, kana mahadia pekirimi pade mainga oahawo. Harumaka mpuumi rahi to rawaika komi tempo Yesus Kristus narata karongkanina. 14 Katuwumo halaku ngana to natigu hi Alatala. Nemo mituruhi dota rarami to laibabeimi ilodo, kapomami nangincani Alatala. 15 Naupawee kana magaha katuwumi, apa Alatala to nangkio komi mawali todea-Na ee mai nagaha. 16 Apa naria laitulihi rara Buku to Nagaha iwei, “Magaha komi, apa Aku nagaha.” 17 Rara hambayami laikiomi Alatala ee Tuama. Naupawee kana milinga ane Alatala ee mai moma nampelihi tauna. Laibotuhi-Na tauna mantuku ingku tauna ee moto. Etu pade kana mengkoru mpuu komi hi Hia, tempomi natuwu hangoni i dunia ei. 18 Apa laincanimi ane laibayari mpapu-Namo komi Alatala bona matebakaha komi lako katuwumi to moma naria bununa to nahibali hante katuwu tumpulokomi. Pobayari ee moma hante parewa to mamala magero, ewa bulawa ba halaka, 19 naupawee hante raa to nahuli, etumi raa Yesus Kristus to nahibali hante raa ana bimba to nalori pade moma nakahalaia laijuju hi Alatala. 20 Hia laipelihi Alatala amimi kapomana dunia ei laipajadi. Naupawee lau kahudua dunia eidimi pade narata-'I bona rapakahalama komi. 21 Habana Yesus eemi pade neparahaya komi hi Alatala to nampakatuwu nculi-'I lako kamatea pade nampakabohe hanga-Na. Etu pade peparahayami bo peharumakami hi Alatala.
22 Apa natigu komi nampoingkuka patudu to nakono nangkambelai Yesus Kristus nagahami wotomi lako doha, hampena namala komi nampotowe ompimi to hangu kaparahayaa hante kabuloli rarami. Etu pade kana momepotowe mpuu komi hadua bo hadua. 23 Habana laitarimamimi katuwua to nabou, moma lako manuhia to mamala mamate naupawee lako Alatala to natuwu duu kahae-haena. Katuwuami to nabou ee narata lako lolita Alatala to naria dola pade moma naria pobaliana. 24 Apa naria laitulihi rara Buku to Nagaha iwei,
“Humawee manuhia ewa kawoko
pade karambana ewa bunga kawoko.
Kawoko nalau, pade bungana narona.
25 Naupawee, lolita Pue batena moto'i duu kahae-haena.”
Lolita eemile Kareba Belo to laikarebai hi komi.