Saulus nancoro
9
1 Tempo ee mui newuke mpuu rara Saulus nepararai mampatehira to neparahaya hi Pue Yesus. Rau'i hi Imam Bohe 2 namperapi hura kuasa nakenika hi to pangkeni i hou-hou pepuea to Yahudi i Damsyik, bona ane maria napotomuka balailo ba bangkele to neparahaya hi Yesus, nahokora pade nakeni rau i Yerusalem. 3 Rara pomakoa Saulus rau i Damsyik, namohupi i ngata ee mai, ngkali newanta baa lako langi i humangkulilina. 4 Nadungka'i pade iepena to pojarita nangulika'i, “Saulus, Saulus, napa pade laipakahehamu-'A?”5 Nehono Saulus, “Hema-Ko Pue?”
Nehono to pojarita ee, “Akumi Yesus to laipakahehamu. 6 Welau, pematamoko pade koimoko i rara ngata. Rakewokadamoko mei i ria napa to mubabei.”
7 Nahera mpuura dohe hampomakoa Saulus hampena momara natepojarita. Apa iepera to pojarita ee, naupawee moma naria tauna laihilora. 8 Lauparia, nokangkoremi Saulus. Laibungena matana, naupawee momami namala nampanaa napa-napa. Alaana dohena hampomakoa ee nampanini'i nehua ngata Damsyik. 9 Tolu eo'i Saulus moma nenaa. Tolu eo mui'i moma nangkoni bo nanginu.
10 I Damsyik naria hadua to neparahaya hi Pue Yesus, hangana Ananias. I rara hangu pehiloa, Pue nololita hi Ananias iwei, “Ananias!”
Nehono Ananias, “Io, Pue.”
11 Lolita Pue, “Kahadiako pade peongkomoko rau i dala to ikahangai Dala Nanoro. Pali i hou Yudas tauna to ikahangai Saulus lako Tarsus. Tauna etu ritu bulana nohambaya, 12 pade rara hangu pehiloana, laihilona hadua tauna to laikahangai Ananias narata nampadama woona bona mamala'i menaa nculi.”
13 Nehono Ananias, “Pue, nadeami tauna to ipangepeiku kareba nangkambelai tauna etu. Nadea mpuumi ingkuna to nadaa nampakahehara jumaa-Mu i Yerusalem. 14 Pade tumai'i hante hura kuasa lako imam-imam to i matana bona rapaliu'i mampahoko humawee tauna to nepue hi Iko.”
15 Naupawee Pue nololita hi Ananias, “Koimoko, apa tauna etu mei mawali parewa to laipelihi-Ku mobago mangkarebai nangkambelai Aku hi tau-tauna to moma Yahudi, hi hira magau pade hi to Israel. 16 Pade Kupahiloika'i mei ane madea mpuu kahehaa to kana nakolo habana mangkarebai nangkambelai Aku.”
17 Lauparia raumi Ananias nehua i hou Yudas. Laidamana woo Saulus pade iulina, “Saulus ompiku, Pue Yesus to nerawa hi iko i pomakoamu, nantudu'a tumai hi iko bona mamalako menaa nculi pade mantarima Inoha to Nagaha.” 18 Hampiniri mata nehuwumi to ewa ruke bau lako mata Saulus hampena namalami nenaa nculi. Napu ee nokangkoremi Saulus pade laidiu. 19a Napupi nangkoni, nanculimi rohona.
Saulus nopamula nangkarebai Kareba Belo
19b Bahangkua eora Saulus hante to neparahaya hi Yesus no'oha i Damsyik. 20 Tempo ee mui pamulanami Saulus nangkarebai i hou-hou pepuea to Yahudi ane Yesus ee mai Ana Alatala. 21 Humawee tauna to nangepe lauria nahera. Iulira, “Apa moma hia eimi to mingki mampatehi tauna to nepue hi Yesus i Yerusalem? Apa moma karatana ei mai tumai mampahoko pade mangkenira to nepue hi Yesus rau i tingoora imam to i matana?” 22 Naupawee, kahaa-haea natetambaiki dola tauna to ne'epe hi Saulus hampena naingura to Yahudi to natida i Damsyik. Naingura, apa namala laipahiloina hi todea ane Yesus eemi Magau to Pepakahalama to laitipa Alatala.
23 Bahangkua kahaena lako hee, noliburamo to Yahudi pade noliwo mampatehi Saulus. 24 Naupawee laincanina Saulus liwora to nadaa ee mai. Eona bo bengina to Yahudi nampodoo humawee womo pehuaa ngata ee bona mamalara mampatehi Saulus. 25 Naupawee hangkani ngkawengiana, to pantukuna nangala'i pade laiulura lako tembo ngata nampake karanci bohe rau i hawaliku ngata.
26 Napu ee Saulus rau i ngata Yerusalem. Karatana i Yerusalem, laipehobana nehua dohera tauna to neparahaya hi Yesus. Naupawee humaweera nampokaeka'i, apa moma laiparahayara ane Saulus ee mai neparahayami hi Yesus. 27 Naupawee Barnabas nantarima Saulus pade nangkeni'i rau nampotomukara rasul. Barnabas nampotuturakara rasul ee bewa Saulus nampahilo Pue i lentongo dala pade bewa Pue nampojaritaka Saulus. Tuturana mui bewa kabia Saulus nangkarebai kareba nangkambelai Yesus i Damsyik. 28 Lauparia no'ohami Saulus dohera rasul i Yerusalem pade nabia'i nangkarebai kareba nangkambelai Pue. 29 Saulus mui nojarita pade nonebili hante to Yahudi to nobaha Yunani, naupawee hira ee mai nampehimukui mampatehi'i. 30 Hangka laincanira ompi-ompi to hangu kaparahayaa liwora ee mai, laikenira Saulus rau i Kaisarea pade laipopeongkora'i rau i Tarsus.
31 Tempo ee, nanonemi ka'adaa jumaa i humangkulili Yudea, Galilea pade Samaria. Jumaa eera nantambai karoho peparahayara pade nengkoru hi Pue. Nantambaiki kadeara to neparahaya apa laitulungi Inoha to Nagaha.
Petrus nampakauri Eneas pade nampakatuwu nculi Dorkas
32 Tempo ee mai Petrus nomako noliliko rau butu ngata nantungkai jumaa. Rara pomakoana ee mai Petrus nehani nampotomukara jumaa Pue i ngata Lida. 33 I hee lairatana hadua balailo to ikahangai Eneas to walu mpaemi noturu i poturua, habana napungku. 34 Petrus nangulika'i, “Eneas, Yesus Kristus mampakauriko. Pematamoko pade panimpumi poturuamu!” Tempo ee mui mai nematami Eneas. 35 Humawee todea i ngata Lida pade ngata-ngata i Saron nampahilo Eneas, alaana neparahaya purara hi Pue.
36 I ngata Yope naria hadua bangkele to laikahangai Tabita. Hia ee neparahaya hi Yesus. Hangana rara baha Yunani Dorkas. Hia ee mai tauna to nabelo oa ingkuna pade naharo'i nantulungi tauna to nakahiahi. 37 Tempo ee mai, naduami Dorkas pade namate. Watalokana laidiura pade laidulera i kamara to i lolona. 38 Ngata Yope ee mai moma'i na'awa lako ngata Lida. Pangepera tauna to neparahaya hi Yesus i Yope ane i ngata Lida ria'i Petrus, laitudura rodua tauna rau hi Petrus nerapi iwei, “Tuama, dungku rauko olu i Yope.”
39 Lauparia, dungku nangkanimpumi Petrus pade neongko dohera to laitudu ee rau i ngata Yope. Karatana i ria, laikenirami Petrus rau i kamara to i lolona. Humawee bangkele to nabalu nokangkore i humpiina pade hamalira nakeo laitudokara Petrus humawee waru to nanoe bo waru ntanina to laidaukanara Dorkas tempona natuwudipi.
40 Humaweera to i rara kamara ee laitudu Petrus mehuwu. Napu ee notingkodumi Petrus pade nohambaya. Laipeilina wataloka ee mai pade iulina, “Tabita, pematamoko!” Lauparia, laibungenami Tabita matana. Hangka laihilona Petrus, nematami pade noncuna. 41 Petrus nangkakamu palena pade nantulungi'i nokangkore. Napu ee Petrus nangkiora jumaa Pue hante bangkele to nabalu to naria i hee pade nampahiloira ane Dorkas natuwu nculimi. 42 Kareba nangkambelai katuwu nculi Dorkas ee mai notolele i humangkulili ngata Yope, hampena nadea tauna neparahaya hi Pue Yesus. 43 Lako hee nahaedipi Petrus no'oha i ngata Yope, i hou tauna to laikahangai Simon to nobago nampakalusu kuliba binata bona mamala rapokae.