Yesus nepakauri tempo eo Pentuua to Yahudi i Wuhu Betesda
5
1 Napu ee mai neongkomi Yesus rau i Yerusalem, apa tempo ee naria eo bohe to Yahudi laibabei i ria. 2 I Yerusalem, namohu hante womo pehuaa rara ngata to laikahangai Womo Pehuaa Bimba, naria wuhu hante alima bamaru pengkanaoluana. Wuhu ee mai rara baha Ibrani laikahangai Wuhu Betesda. 3 I bamaru-bamaru pengkanaolua ee mai nadea tauna to nohaki noturu i hee. Naria to naburo, to nakejo pade naria mui to napungku. [Hira ee nampopea wuhu ee mai mategonta. 4 Habana naria tempona malaeka Pue nehompo rara wuhu ee pade nogonta uena. Kategonta ue wuhu ee, hema to moilodo mehua rarana, mauri'i nau napa hakina.] 5 I hee naria hadua tauna to napungku, tolu mpulu walu mpaemi kahaena. 6 Hangka Yesus nampahilo tauna ee mai noturu i hee pade laincani-Na ane nahaemi tauna ee mai nadua, Yesus nangulika'i, “Madotako mauri?”7 Nehono to nadua ee hi Yesus, “Tuama, moma naria tauna to nampopehompo'a rau i rara wuhu ee mai tempo uena nopamula nategonta, pade bulaku mahadia mehompodipi nariami to ntanina nampelodoi'a.”
8 Iuli Yesus hi hia, “Pokangkoremoko, ongkomi alimu, pade pomakomoko.” 9 Tempo ee mui naurimi tauna ee, laiongkonami alina pade nomakomi.
Eo ee mai nambela eo Pentuua to Yahudi. 10 Etu pade hira to pangkeni to Yahudi nangulika tauna to lako nauri ee mai, “Welau ei eo Pentuua, momako mamala mopahaa alimu.”
11 Naupawee laihonoinara, iulina, “Tauna to nampakauri'a, Hiami to nangulika'a, ‘Ongkomi alimu pade pomakomoko.’ ”
12 Nepekunera hi hia, “Hema to nangulikako, ‘Ongkomi alimu pade pomakomoko’?”
13 Naupawee tauna to lako nauri ee mai moma incanina hema Tauna to nampakauri'i, apa Yesus nehua i lentongo kadea tauna halaumi. 14 Napu ee Yesus notomu hante to lako nauri ee i karawaa Hou Alatala. Yesus nangulika'i, “Hilo, naurimoko. Nemopa mobabei doha bona nemo mawali hi iko to melabipi kadaana.” 15 Tauna ee mai nehuwu pade nangulikara to pangkeni to Yahudi ane Yesus to nampakauri'i.
16 Nopamula lako hee, hira to pangkeni to Yahudi ee mai nampehimukui mampahehaki Yesus apa Hia nampakauri tauna tempo eo Pentuua to Yahudi. 17 Naupawee Yesus nangulikara, “Tuama-Ku Alatala nobago duu ei mai. Wee moto mui Aku, kana mobago dola-'A.” 18 Pangepera to iuli Yesus lauria, laipehimukuikira to pangkeni to Yahudi nampali dala bona rapatehira-'I. Laipoliwoira ewa ee, apa Yesus moma wuwu nantiboki atura eo Pentuua to Yahudi, naupawee iuli-Na mui ane Alatala Tuama-Na. Hante to iuli-Na lauria Yesus nampahibali woto-Na hante Alatala.
Panguli Yesus nangkambelai woto-Na
19 Lauparia, Yesus nangulikara to pangkeni to Yahudi ee mai, “Mpuu-mpuu Ku'ulika komi, Ana Alatala moma mamala mobago mantuku dota-Na moto, naupawee napa to laihilo-Na laipobago Tuama-Na, eemi to laipobago-Na. Apa napa to laipobago Tuama-Na, ee moto mui to laipobago-Na. 20 Habana Tuama nampotowe Ana-Na, pade laipahiloika-Na-'I hangu hangaa to laipobago-Na. Moma wuwu ee, Natudoka mui-'Idipi mei bago-bago to neliupi kabohena lako bago-bago to laipobago-Na ee, bona mahera komi. 21 Habana nahibali hante Alatala Tuama nampakatuwu nculira tauna to namate pade nampawaikara katuwu to nabou, wee moto mui Ana-Na mampawaika katuwu to nabou hi hema to Napodota. 22 Moma hema to Nabotuhi Tuama, apa baraka mampabotuhi tauna laipopewai-Na hi Ana-Na purami, 23 bona humawee tauna mampabila Ana-Na, nahibali hante pampabilara Tuama. Hema to moma nampabila Ana-Na, moma mui laibilana Tuama to nampahuro-'I.
24 Mpuu-mpuu Ku'ulika komi, hema to mangepe napa to iuli-Ku pade meparahaya hi Hia to nampahuro-'A, hia mamparata katuwua to moma maria kahuduana pade moma'i rahuku, habana laibakahami lako baraka kamatea pade noencu rau rara katuwua. 25 Mpuu-mpuu Ku'ulika komi, marata mei tempona, pade tempo ee naratami, ane tau-tauna to namate mangepe napa to laiuli Ana Alatala, pade hira to mangepe-'I mamparata katuwu to mabou. 26 Apa Alatala Tuama nabaraka mampopewai tuwu, wee moto mui Ana-Na laiwaika-Na baraka mampopewai tuwu. 27 Pade laiwaika-Na mui-'A baraka mobotuhi manuhia, habana Akumi to laiuli Ana Manuhia.
28 Nemo komi mahera nangepe to iuli-Ku lauria, habana marata mei tempona ane humawee to namateramo mangepe pekio-Ku, 29 pade rapakatuwu nculi. To nabelo ingkura mamparata katuwua to moma maria kahuduana, pade to nadaa ingkura mamparata pehuku lako Alatala. 30 Moma-'A mamala mobabei hangu hangaa mantuku dota-Ku moto. Aku nobotuhi nantuku napa to iepe-Ku pade pobotuhi-Ku moma nantomo hamika, habana moma dota-Ku moto to laituku-Ku, naupawee dota Alatala to nampahuro-'A to laituku-Ku.
31 Ane hadua-Ku moto nampojarita woto-Ku, jarita-Ku ee mai moma'i nakono. 32 Naupawee Alatala mui nojarita nangkambelai Aku, pade laincani-Ku ane jarita-Na ee mai nakono.
33 Laitudumimi huro rau hi Yohanes to Pediu pade iulinami Yohanes jarita to nakono nangkambelai Aku. 34 Kakonona moma iparaluu-Ku manuhia mampakanoto hema-'A kakonona. Iulika-Ku komi to iuli Yohanes lauria bona rapakahalama komi. 35 Yohanes etu mai ewa poindo to nabaa pade newanta, naupawee hangoni komi aga nampokagoe baana to newanta ee mai.
36 Nariapi pohabi ntanina to nampakanoto hema-'A kakonona, to neliupi lako pohabi Yohanes nangkambelai Aku. Pohabi ee mai bago to laiwaika Alatala Tuama hi Aku. Bago eemi to laipobago-Ku tempo ei pade nampakanoto ane Alatala Tuama to nampahuro-'A. 37 Alatala Tuama to nampahuro-'A, Hia motomi to nojarita nangkambelai Aku. Poma-'I naria laiepemi nojarita, pade lence-Na mui poma'i naria laihilomi, 38 pade lolita-Na moma'i natida i rarami, apa Aku to laihuro-Na moma iparahayami. 39 Laipeguruimi belo Buku to Nagaha, apa iulimi hante wee mirata katuwua to moma maria kahuduana, bo Buku to Nagaha ee mai nampojarita nangkambelai Akudi. 40 Naupawee moma komi nadota narata hi Aku bona mirata katuwua to moma maria kahuduana ee mai.
41 Moma-'A nampali pebila manuhia. 42 Naupawee nangkambelai komi, laincani-Ku mpuu ane i rarami moma naria towemi hi Alatala. 43 Aku narata hante baraka Tuama-Ku Alatala, naupawee moma komi nadota nantarima-'A. Ane tau ntanina narata hi komi hante barakana moto, nadota komi nantarima'i. 44 Ane komi wule mampali pebila lako tau ntanina pade moma komi madota mampali pebila lako Alatala to hadudua, bewa komi meparahaya hi Aku?
45 Nemo miuli ane Aku mei mampangaduka komi i tingoo Tuama-Ku. To mampangaduka komi mei Musa to laiharumakami mampotunui komi. 46 Apa ane neparahaya komi hi Musa, natantu amimi neparahaya mui komi hi Aku, habana laitulihinami Musa nangkambelai Aku. 47 Naupawee ane moma iparahayami napa to laitulihi Musa, bewa miparahaya to iuli-Ku?