Yesus nojarita hante hadua bangkele lako Samaria
4
1 Hira to Farisi nangepe kareba ane nadeapi tauna to laidiu Yesus pade nawali to pantuku-Na lako Yohanes to Pediu. 2 Kakonona moma Yesus to nediu, naupawee ana-ana guru-Na. 3 Laincani-Napi Yesus ane ieperami to Farisi kareba lauria, palahi-Nami Yudea pade nanculikimi rau i Galilea. 4 Rara pomakoa-Na rau Galilea, Hia kana mantara i Samaria. 5 Lauparia, narata-'Imi i hangu ngata i Samaria to laikahangai Sikhar. Ngata Sikhar ee mai namohu hante tana to owi laipopewai Yakub hi Yusuf anana. 6 I ngata Sikhar naria tomua Yakub. Yesus nentuu pade noncuna i wiwi tomua ee mai, apa nalengemi nomako. Tempo ee mai ba maria tinti hampulu rongu mpoeo lia.7 Naratami hadua bangkele lako Samaria madota mantomu ue i tomua ee mai. Yesus nangulika bangkele ee mai, “Waika-'Akuwo ue Kuinu.” 8 Tempo ee mai ana-ana guru Yesus rau i rara ngata mangoli pangkoni.
9 Bangkele lako Samaria ee mai nangulika Yesus, “Napa pade nerapi ue inu hi aku-Ko? Iko to Yahudi, bo aku to Samaria.” (Pade iwee iulina bangkele ee mai, apa to Yahudi momara nadota nampogalo to Samaria.)
10 Nehono Yesus hi hia, “Ane ke ncanimu nangkambelai kabohe towe to Napopewai Alatala pade hema-'I to nerapi ue inu hi iko, natantu ami muperapimi hi Hia pade kana Nawaikako ue to nampawai katuwua hi manuhia.”
11 Iuli bangkele ee hi Yesus, “Tuama, moma naria parewa to Mupake mantomu, pade nandala mpuu tomua ei mai. Lako rima Murata ue to mampawai katuwua hi manuhia etu? 12 Yakub tumpuloko kami to nampawaika kami tomua ei. Hia moto nanginu lako tomua ei. Wee moto mui ana-anana bo humawee ewuana. Iuli-Mu Iko neliupa-Ko lako Yakub?”
13 Nehono Yesus hi hia, “Hema to manginu ue ei mai, mabaikidipi wuuna. 14 Naupawee hema to manginu ue to Kuwaika hi hia, momami mabai wuuna duu kahae-haena. Habana ue to Kuwaika hi hia, mawali mata ue i rara wotona, to moma'i maria mentuu moili pade mampawai'i katuwua to moma maria kahuduana.”
15 Iuli bangkele ee hi Yesus, “Tuama, waika'a ue etu, bona momami mabai wuuku pade moma'amo marataki i hei tumai mantomu ue.”
16 Iuli Yesus hi hia, “Koimoko, kio balailomu pade karatamo komi i hei.”
17 Iuli bangkele ee mai, “Moma'a nabalailoa.”
Iuli Yesus hi hia, “Nakono iulimu, ane moma naria balailomu, 18 apa alima ngkanimoko nobalailo pade to laipodohemu tempo ei moma'i balailomu. Nakono to iulimu.”
19 Iuli bangkele ee hi Yesus, “Tuama, nengkao'amo ane Iko ei mai hadua nabi. 20 Tumpuloko kami nepue i bulu ei mai, naupawee komi to Yahudi nanguli ane Yerusalem riadi pepuea.”
21 Iuli Yesus hi hia, “Peparahayamoko hi Aku. Marata moto mei tempona komi mepue hi Alatala Tuama moma i bulu ei pade moma mui i Yerusalem. 22 Komi to Samaria nampapue napa to moma incanimi. Kami to Yahudi nampapue napa to incani kami, habana kahalamaa lako Alatala laitarima manuhia lako to Yahudi. 23 Naupawee marata mei tempona pade kakonona tempo ee naratami, ane to pepue-to pepue to nakono kana mepue hi Alatala Tuama hante petulungi Inoha to Nagaha mantuku patudu to nakono, habana to pepue ewa eemi to laipodota Alatala Tuama. 24 Alatala ee mai Inoha pade hema-hema to mepue hi Hia, kana mepue hante petulungi Inoha to Nagaha mantuku patudu to nakono.”
25 Nehono bangkele ee mai hi Yesus, “Laincaniku ane marata-'I mei Magau to Pepakahalama to laitipa Alatala, to laiuli Kristus. Ane marata-'I mei, hangu hangaana Napakanoto hi kami.”
26 Iuli Yesus hi hia, “Aku to nampojaritakako ei mai, Akumile Tauna to iulimu etu.”
27 Tempo ee mai narataramo ana guru Yesus. Naherara nampahilo Yesus bula-Na nojarita hante hadua bangkele. Naupawee moma hema haduaa lako ana guru-Na to nepekune, “Napa to laipodota-Mu?” Pade moma muira nepekune, “Napa to laipojarita-Mu hante hia?” 28 Lauparia bangkele ee mai nampalahi parewa to laipakena nantomu i hee pade raumi rara ngata nangulika tau-tauna to i ria, iwei, 29 “Hilo! Ee ria hadua Tauna. Laincani-Na pura hangu hangaa to ibabeiku! Ba Hia eimidi ria Magau to Pepakahalama to laitipa Alatala?” 30 Lauparia rau puraramo i hawaliku ngata nampahilo Yesus.
31 Raupi bangkele lako Samaria ee i rara ngata, ana-ana guru Yesus nampaena Yesus mangkoni, iulira, “Rabi, pangkonimo-Ko olu.”
32 Naupawee iulika-Nara, “Hi Aku naria konia to moma incanimi.”
33 Nangepe lauria ana-ana guru-Na nonepekune, “Ba nariadi tauna nangkenika-'I konia?”
34 Iuli Yesus hi hira, “Mobabei dota Alatala to nampahuro-'A pade mopahudu bago-Na to laiwaika-Na-'A Kupobago, eemi konia-Ku. 35 Apa moma komi motomi to nanguli, ‘Opo mulapi, maratami tempona mosangki’? Naupawee Ku'ulika komi, hilo humangkulilimi pade pantomi bone-bone to narangkuni to temponami rasangki. 36 Tempo ei mai to posangki laitarimanami tomona pade laitobuna wua katuwua to moma maria kahuduana, bona to pohawu pade to posangki magoe hingkani-ngkani. 37 Nangkambelai to ei mai, nakonomi pangengko to iuli iwei, ‘To hadua nohawu pade to ntanina nosangki.’ 38 Aku nampahuro komi mosangki napa to moma itudami. Tau ntanina nampehimukui notuda, komi to nampalimpuru wua to laitudara.”
39 Nadea to Samaria lako ngata Sikhar ee mai neparahaya hi Yesus habana jarita bangkele ee mai, to nanguli, “Laincani-Na pura hangu hangaa to ibabeiku.” 40 Karatara to Samaria ee mai hi Yesus, perapira hi Hia bona mo'oha dohera-'I. Lauparia no'ohami Yesus dohera i hee, romengi kahaena. 41 Natetambaikimi kadea tauna to neparahaya hi Yesus, habana iepera motomi to laiuli-Na. 42 Iulira hi bangkele ee mai, “Laiparahaya kami, naupawee momami habana napa to iulimu, apa iepe kami moto-'Imi pade incani kami, ane mpuu-mpuu Hiami to nampakahalama manuhia.”
Yesus nampakauri ana hadua to pobago i hou magau
43 Naliupi romengi Yesus no'oha i ngata Sikhar, neongko-'Imi rau i Galilea. 44 Naria amimi wengi laiuli Yesus ane hadua nabi moma'i laibila i ngatana moto. 45 Karata Yesus i Galilea, tau-tauna to i Galilea nantarima belo-'I, habana kariara i Yerusalem laihilorami hangu hangaa to laibabei Yesus tempo eo bohe Paskah to Yahudi.
46 Rauki muimi Yesus i ngata Kana to i Galilea. I ngata Kana ee wengi, Yesus nobabei ue nawali anggur. Tempo ee mai i ngata Kapernaum naria hadua to nobago i hou magau, anana balailo bulana nadua. 47 Pangepena ane naratami Yesus i Galilea lako Yudea, rau'imi hi Yesus nerapi bona Yesus rau i Kapernaum mampakauri anana, apa anana ee mai ke nono mamatemi. 48 Yesus nangulika'i, “Ane ke moma ihilomi tanda to nepakahera to laibabei-Ku, moma komi meparahaya.”
49 To nobago i hou magau ee mai nangulika Yesus, “Tuama, karatamo-Ko kapomana anaku mamate.”
50 Iuli Yesus hi hia, “Panculimoko, matuwu moto anamu!” Laiparahayana tauna ee mai napa to iuli Yesus hi hia, pade nanculimi. 51 Lentongo dala'idipi narataramo batuana nangkeni kareba ane naurimi anana. 52 Laipekunenara tinti hangkua anana ee mai nopamula nauri. Nehonora, “Tinti hangu mpoeo wengi wei momami nangkalengi.” 53 Lailinganami tuama ngana ee mai ane tinti hangu eemi Yesus nangulika'i, iwei, “Matuwu moto anamu.” Nopamula lako hee, to nobago i hou magau ee mai hante humaweera to i rara houna neparahayaramo hi Yesus. 54 Eemi karongkanina Yesus nanculi lako Yudea rau Galilea pade nobabei mui tanda to nepakahera.