Patudu Yesus bewa mohambaya
11
1 Hangkani tempona Yesus nohambaya. Nahudupi nohambaya, hadua lako ana guru-Na nangulika-'I, “Pue, patudukii kami mohambaya ewa Yohanes nopatudukiira ana guruna.” 2 Iulika-Nara Yesus, “Ane mohambaya komi, ulimi iwei,‘Tuama, rapemabohemi hanga-Mu to nagaha,
Moparentamo-Ko i dunia halaku Magau,
3 Waika kami pangkoni to iparaluu kami butu eona,
4 pade ampuni kami lako doha-doha kami,
ewa kami mui noampuni humawee tauna to nahala hi kami.
Pade nemo kami Mupalele rapehori.’ ”
5 Napu ee iulika-Na muira Yesus, “Ane rapana maria komi to rau i hou balemi ntongo bengi pade merapi iwei, ‘Bale, wai'akuwo tolu ongu roti, 6 habana naria hadua baleku narata hi aku lako podadaoana pade moma naria napa-napaku to kujujuka'i.’ 7 Rapana tumpu hou ee mehono, ‘Nemo megangoi. Laiwuntami womo, noturu'amo hante ana-anaku. Moma'a madota memata mampawaikako napa to iperapimu.’ 8 Ku'ulika komi, nau balenako, moma'i madota memata mampawaikako to iperapimu. Naupawee apa momako naea nerapi dola, kana memata'i mampawaikako to iparaluumu.
9 Aji, Ku'ulika komi, perapimi, kana rawaika komi. Palimi to iparaluumi, kana mirata moto'i. Kadomi womo, kana rabeaka komi. 10 Habana butu tauna to merapi, kana rawaika. Butu tauna to mampali, kana mamparata, pade butu tauna to mokado womo, kana rabeaka. 11 Moma ami komi naria to tuama ane anami merapi roti miwaika watu, merapi bau miwaika ule, 12 merapi ntolu manu, miwaika ntole. 13 Aji, ane komi to nadaa ingkumi laincanimi nampawaika anami to nabelo, neparauli Tuamami to i huruga. Hia kana mampawaika Inoha to Nagaha hi tauna to nerapi hi Hia.”
Yesus pade Beelzebul
14 Hangkani tempo, Yesus nampopalai anudaa to nampehuai hadua tauna, hampena tauna ee mai nabobo. Hangka nehuwupi anudaa ee mai, namalami tauna ee nojarita. Nampahilo lauria, humawee tauna to i ria nahera. 15 Naupawee, bahangkua duara nanguli, “Hante baraka Beelzebul, magau humawee heta, laipopalai-Na anudaa.” 16 To ntanina nampehori-'I, nerapi bona Nababei tanda to nepakahera mampopahiloi ane baraka-Na lako Alatala.
17 Naupawee, ncani-Na Yesus napa to laipekirira, etu pade iulika-Nara, “Butu kamagaua to moma nahintuwu kana magaro, pade butu to pohancou to moma nahintuwu natantu amimi moma'i mantaha pohancoura. 18 Wee moto mui ane Magau Heta mampopalai heta-heta ntanina, hia nampaewa wotona moto. Ane iweedimi magaromi kamagauana. Aku nanguli ei apa komi nanguli ane Aku nampopalai anudaa hante baraka Beelzebul. 19 Naupawee naria muira ana gurumi nampopalai anudaa. Ane Aku nampopalai anudaa hante baraka Beelzebul, ulika-'A, hante baraka hemara ana gurumi nampopalai anudaa? Apa moma hante baraka Alatala muirahawo nampopalai anudaa? Aji, to laibabeira ana gurumi motomi to nampopahiloi ane peraimi etu nahala. 20 Naupawee, ane Aku nampopalai anudaa hante baraka Alatala, kakonona nampakanoto ane nopamulami Alatala noparenta hi komi.
21 Ane hadua tauna to naroho pade nagana parewa pohiwalina nampodoo houna, natantu amimi moma hema to mamala mangala ihi houna. 22 Naupawee, ane maria hadua to nelabi karohona mampohiwalika'i pade mampadagi'i, tauna to nelabi karohona ee mangala humawee parewa pohiwali to iporohona pade motira-tira to lairampakina ee hi dohe-dohena.
23 Hema to moma nopahamika hi Aku, hia nampaewa-'A, pade hema to moma nantulungi-'A rara bago-Ku nangkeni tauna hi Alatala, hia nampakagero bago-Ku.”
Panculia anudaa
24 “Ane anudaa nehuwu lako hadua manuhia, hia mei rau modadao i kabangiana mampali po'ohaana. Naupawee hangka moma lairatana po'ohaana, anudaa ee nanguli iwei, ‘Manculiki'a rau i hou to laipalahiku.’ 25 Lauparia rau'imi pade lairatana hou ee nagahami bo nateaturu. 26 Napu ee, raumi anudaa ee mai nampabawai papitu anudaa to ntanina to nelabipi kadaara lako hia pade nehuaramo i rara hou ee, no'oha i hee. Alaana, natetambaikimi kapepa iepe tauna ee mai lako to pamulana.”
Hema to norahi
27 Bula Yesus nojaritadipi, nongaremi hadua bangkele lako lentongo todea nangulika-'I iwei, “Norahi mpuu bangkele to nampoanaka pade nopahuhu-Ko.”
28 Naupawee Yesus nanguli, “Neliupi porahi tauna to nangepe bo nampoingkuka lolita Alatala.”
Tanda Yunus
29 Tempo nadea tauna nahiromu natiku humpii Yesus, iulika-Naramo, “Tauna to natuwu tempo ei, tauna to nadaa ingkura. Nerapira tanda, naupawee moma maria tanda ntanina to Nawaikara Alatala, wuwu tanda to nadupa hi nabi Yunus owi aga to Nawaikara.a 30 Ewa Yunus nawali tanda hi hira to Niniwe, iwee moto mui Ana Manuhia mei mawali tanda hi tauna to natuwu tempo ei. 31 Tempo eo pobotuhia, magau bangkele lako Syeba rapakatuwu nculi hingkani-ngkani hante tauna to natuwu tempo ei, pade hia mei mampahalai pokaingkura. Habana hia narata lako wuntu dunia nangepe noto Magau Salomo. Naupawee, i hei naria hadua to nelabi lako Magau Salomo. 32 Tempo eo pobotuhia, to Niniwe mei matuwu nculi hingkani-ngkani hante komi to natuwu tempo ei. To Niniwe ee mei mampahalai pokaingkumi, apa nancororamo lako doha-dohara pangepera kareba to laiuli Yunus. Kakonona, i hei naria to nelabi lako Yunus.”
Poindo woto
33 “Moma naria haduaa to notutuni poindo pade noboli i kaleruana. Moma mui laibolina une loya. Kana naboli i poboliana ami, bona tauna to marata mamala mampanaa baana. 34 Matamu eemi poindo wotomu. Ane matamu nabelo, humawotomu mui nabaa, bo ane matamu nadaa, nalimau mui humawotomu. 35 Etumo, maingahawo bona baa to i raramu moma mawali malimau. 36 Ane humawotomu mabaa pade moma maria to malimau, humawotomu ee mabaa ewa to laiwantaki poindo.”
Yesus nampahalaira to Farisi pade to nataualu buku Taurat
37 Nahudupi Yesus nopatudu, hadua to Farisi nampaoka-'I rau mangkoni i houna. Lauparia, rau mpuumi Yesus i hou to Farisi ee pade noncuna mangkoni. 38 Hangka to Farisi ee nampahilo Yesus nangkoni moma nowano ncala ewa to ipoadakara to Farisi, nahera'i.
39 Naupawee iuli-Na Pue Yesus, “Komi to Farisi, nokabohi hangkiri pade huraya wuwu hawalikuna aga, bo i rarana moma nagaha, naponu hante rewa-rewa to lairampakimi pade kadaa ingkumi. 40 He, komi to nadoyo. Alatala to nopajadi to hawalikuna pade to i rarana. 41 Aji, nemo madoko bo madaa ingku. Waikaramo to nakahiahi napa to naria hi komi bona magaha mpuu komi i tingoo Alatala.
42 Mahilakamo komi to Farisi, habana natigu komi nampopewai hampulu parahee hi Pue lako wunga baone bo rampa uta ntanina, naupawee moma komi nanoro bo nampotowe Alatala. Aji, bona mincani kakonona to hangu kana rababei pade to ntanina nemo rakalingani.
43 Mahilakamo komi to Farisi, habana pokonomi noncuna i poncunaa tauna to laibila i hou pepuea. Pade pokonomi ane maria tauna mampatabe komi i pasar. 44 Mahilakamo komi, apa komi ewa dayo to moma laitandai hampena tauna to nomako i wongkona moma nangincani. Wee moto mui komi, i hawalikuna nabelo naupawee i rarami nadaa.”
45 Lauparia hadua lako to nataualu buku Taurat nangulika Yesus, “Guru, ane wetu panguli-Mu, hante kami mui laipopore-Mu.”
46 Nehono Yesus, “Mahilakamo komi to nataualu buku Taurat, habana komi nampakoloi tauna hante patudu-patudu to nakoro rapoingkuka, bo komi moto bonau hangkoa karawe, moma komi nadota nantulungi tauna nampoingkuka patudu ee mai. 47 Mahilakamo komi, habana komi nobabeiki dayo nabi-nabi to laipatehi tumpulokomi. 48 To ibabeimi ee mai, nampopahiloi ane komi nawali habi pade nahituju hante napa to laibabeira tumpulokomi. Apa tumpulokomi nampatehi nabi-nabi ee, bo komi nobabeiki dayora. 49 Etu pade hante noto-Na Alatala nanguli nangkambelai komi, ‘Aku mei mampahuro hi hira nabi-nabi pade rasul-rasul, naupawee habagia mei rapatehira pade to ntanina rahehakira.’ 50 Aji, tauna to natuwu tempo ei kana mangkolo pehuku, habana raa humawee nabi to nabubu hinungkai dunia laipajadi, 51 nopamula lako raa Habel duu raa Zakharia to laipatehi i olo meja pantunua kurban hante Hou Alatala. Hangkanipi Ku'ulika komi, komi to natuwu tempo ei kana mangkolo pehuku habana humawee kahalaa lauria.
52 Mahilakamo komi to nataualu buku Taurat, habana komi nobihoki kataualua bo komi moto moma nadota nehua i rarana, pade tauna to nampehimukui mehua lailawami.”