Yesus nampahalaira to nataualu buku Taurat pade to Farisi
23
1 Tempo ee Yesus nangulikara todea pade ana-ana guru-Na iwei, 2 “Poncunaa Musa laiponcunaira to nataualu buku Taurat pade to Farisimi. 3 Etumo, turuhimi humawee napa to laipatudukara komi. Naupawee nemo mituku ingkura, apa hira ee moma laipoingkukara napa to laipatudukara todea. 4 Hira nampakoloi todea hante atura pade ada to nantomo, naupawee hira moto momara nadota nantulungi todea bona mantuku atura pade ada to laibabeira ee.5 Humawee to laibabeira, bona rahilo tauna moto. Pakabohera pobolia lolita Alatala to laikaloroi pade laipoura i woora, pade renda warura laipakanoera. 6 Pokonora noncuna i poncunaa tauna to laibila ane raura i hou pepuea ba i pohuhaa. 7 Pokonora laibila i pasar, pade pokonora mui laikio ‘Rabi.’
8 Naupawee komi, nemo komi mingki rabila pade rakio ‘Rabi,’ apa hadua aga Gurumi pade humaweemi to po'ompi. 9 Pade nemo maria tauna to mipemabohe gaga i dunia ei pade mikio tuama, apa hadua aga Tuamami, Hiami to i huruga. 10 Nemo mui komi mingki rakio to pangkeni. Apa hadua aga to pangkenimi, Hiami Magau to Pepakahalama to laitipa Alatala. 11 Hema to neliu pobununa lako hi komi, hia kana mampalayani to ntanina. 12 Hema to mampemabohe wotona moto, hia rapemakodi. Hema to mampemakodi wotona moto, hia rapemabohe.
13 Mahilakamo komi to nataualu buku Taurat pade komi to Farisi. Komi tauna to nabelo wongko. Komi nampalawa tau ntanina mawali todea i rara poparentaa Alatala. Komi moto, moma komi nadota nehua i rarana. Komi wule nampalawara tauna to mingki mehua i rarana.
[ 14 Mahilakamo komi to nataualu buku Taurat pade komi to Farisi. Komi tauna to nabelo wongko. Laibagiumira bangkele to nabalu pade houra lairampakimi, pade ingkumi to nadaa ee laitabuhinimi hante hambaya-hambayami to nalanga. Etu pade komi mei kana mantarima pehuku to nelabi kantomona.]
15 Mahilakamo komi to nataualu buku Taurat pade komi to Farisi. Komi tauna to nabelo wongko. Na'awa mpuu pomakoami hampena nedipo tahi bo lorena puramo komi, nampali tauna naupa hadua aga to madota mantuku agamami. Pade hangka laitukunapi agamami, laibabeimi tauna ee nawali todea naraka, to kadaa ingkuna neliu-liupi lako hi komi moto.
16 Mahilakamo komi to pangkeni to nahibali hante to naburo to nopanuntu tau ntanina. Komi nanguli, ‘Hema to nosumpa nangkahangai Hou Alatala, hia moma natepou hante sumpana ee. Naupawee hema to nosumpa hante nangkahangai bulawa rara Hou Alatala, hia laipou hante sumpana ee.’ 17 He, komi to nadoyo pade naburo, umapi to neliu pobununa, bulawadi ba Hou Alatala to nampakagaha bulawa eedi? 18 Iulimi mui, ‘Hema to nosumpa nangkahangai meja pantunua kurban, hia moma natepou hante sumpana ee. Naupawee hema to nosumpa hante nangkahangai to laipopewai i meja pantunua kurban, hia laipou hante sumpana ee.’ 19 Hee, komi to naburo, umapi to neliu pobununa, to laipopewai i lolo meja pantunua kurbandi, ba meja pantunua kurban to nampakagaha to laipopewai eedi? 20 Etumo, hema to nosumpa nangkahangai meja pantunua kurban, hia ee moma wuwu nosumpa nangkahangai meja pantunua kurban, naupawee nosumpa mui'i nangkahangai humawee napa to naria i meja pantunua kurban ee mai. 21 Pade hema to nosumpa hante nangkahangai Hou Alatala, hia ee moma wuwu nosumpa nangkahangai Hou Alatala, naupawee nosumpa mui'i nangkahangai Hia to no'oha i rarana. 22 Pade hema to nosumpa hante nangkahangai huruga, nosumpa mui'i nangkahangai poncunaa Alatala i huruga pade nangkahangai Hia to noncuna i poncunaa ee.
23 Mahilakamo komi to nataualu buku Taurat pade komi to Farisi. Komi tauna to nabelo wongko. Wungka hinua to neliu kakodina, ewa rampa-rampa pangkoni, laipopewaimi pura hampulu paraheena hi Pue. Naupawee to koropokona lako patudu Taurat moma laipoingkukami, ewa ma'ahi rara, matigu pade moma mantomo hamika. Aji, bona mincani kakonona to hangu kana rababei pade to ntanina nemo rakalingani. 24 Hee, komi to buro to nopanuntu tau ntanina. Karomu rara ue inumi lailalimi, naupawee unta laiome mpatami.
25 Mahilakamo komi to nataualu buku Taurat pade komi to Farisi. Komi tauna to nabelo wongko. Laikabohimi hangkiri pade huraya wuwu hawalikuna aga, bo i rarana moma nagaha, naponu hante rewa-rewa to lairampakimi pade kaliu gantami. 26 Hee, komi to Farisi to naburo, pakagaha olu rara hangkiri bo huraya etu, bona mali hawalikuna mui magaha.
27 Mahilakamo komi to nataualu buku Taurat pade komi to Farisi. Komi tauna to nabelo wongko. Komi ewa dayo to laipakabula hante kapuru, to lainaa nabelo mali hawalikuna, bo i rarana naponu hante wuku to mate pade humawee to nehoa. 28 Wee moto mui hante komi, hawalikuna laihilo tauna ane komi tauna to nanoro i tingoo Alatala, bo i rarami naponu hante kabelo wongko pade dota rara to nadaa.
29 Mahilakamo komi to nataualu buku Taurat pade komi to Farisi. Komi tauna to nabelo wongko. Nabelo mpuu pobabeimi dayo nabi-nabi pade tauna to nanoro ingkura owi. 30 Pade iulimi, ‘Kami ei, ane ke nariapa kami tempo katuwura tumpuloko kami owi, natantu amimi momara kituku nampatehi nabi-nabi.’ 31 Aji, hante pangulimi lauria, nangaku motomo komi ane komi mulira to nampatehi nabi-nabi etu. 32 Etumo, padolami pade pahudu motomi humawee doha to laibabeira tumpulokomi.
33 Hee, komi muli ule to narahua! Nemo mipekiri mamala komi mopalewa huku naraka. 34 Epe belo komi. Aku mampahuro nabi-nabi, tau-tauna to nanoto, pade guru-guru to nopatudu lolita Alatala hi komi. Habagia lako hi hira mipatehi pade misalib. To ntanina miduahi rara hou pepueami pade midapa lako hangu ngata rau ngata ntanina. 35 Etu pade komi kana mangkolo pehuku habana humawee tauna to nanoro i tingoo Alatala to laipatehi. Popatehi ee nopamula lako Habel duuna Zakharia ana Berekhya. Zakharia laipatehi tumpulokomi i olo Hou Alatala pade meja pantunua kurban. 36 Mpuu-mpuu Ku'ulika komi, komi to natuwu tempo ei rahuku habana humawee to nadaa to laibabeira tumpulokomi owi!”
Towe rara Yesus hi todea Yerusalem
37 “Hilo, komi to Yerusalem, laipatehimikona nabi-nabi pade laiwunumira tauna to laihuro hi komi hampe namate! Nadea ngkani-'Amo madota mopahiromu komi, nahibali hante tua manu namparuruta ana-anana i une kapina, naupawee moma komi nadota. 38 Hilo, Hou Alatala ei mei Napalahi Alatala pade mawali malino mpii. 39 Bona mincani, mopamula lako welau, moma-'Amo mihilo, duuna miuli, ‘Laitiroimi Hia to narata halaku huro Alatala!’ ”