Samuwɛli ya Dawuda tìre na pye saan
16
A Tɛhɛnɛ Baa Kilɛ di Samuwɛli pye: «Fo tuun wekɛ ni mu di wa da gori yaha da mɛɛ suu Sɔli kaa na wɛ? Ta nɛ she xɔ wu ni jo wu da bye nige saan Izirayɛli ɲuŋɔ ni-i wɛ? Ma yenɛ li lɔ mʼa li ɲi sìnmɛ na, mʼa koo lɔ. Bɛtilɛhɛmu shɛɛn Zhese puga nʼa da ma tun. Wu ja wa nɛ shɔɔnri lɔ wee di ba bye saan.» 2 A Samuwɛli di jo: «Dii nɛ di da já zhɛ wɛ? Sɔli bu yee logo, go wu da na gbo.» A Tɛhɛnɛ Baa Kilɛ di jo: «Nupya wa co mʼa se, ma shɛ jo na saraga mʼa pa di ba wolo Tɛhɛnɛ Baa Kilɛ mu. 3 Mʼa shɛ Zhesea yiri saraga ki na. Mʼa yaa na lemu pye ge, nɛ na ba lee shɛ ma na. Wemu nʼa da ba zhɛ ma na ge, mʼa wee tìre na mɛgɛ na.»4 Tɛhɛnɛ Baa Kilɛ ya lemu jo ge, a Samuwɛli di lee pye. Ba wʼa nɔ Bɛtilɛhɛmu ni wɛ, a kulo li nɔhɔlɛɛ pu fyaara wuu di ba wu ɲuŋɔ círi, na jo: «Li nidaan na mʼa ma wù mu ya?» 5 A Samuwɛli di jo: «Uun, li nidaan na nʼa ma. Saraga nʼa ma di ba wolo Tɛhɛnɛ Baa Kilɛ mu. Yi yiyɛ pye fɛɛfɛɛ, yʼi ba wù ba binnɛ saraga ki wolo.» A wu Zhese ni wu nagoo pu pye fɛɛfɛɛ, na pu bɛ yiri saraga ki wolo wu na. 6 Ba pʼa nɔ wɛ, a Samuwɛli di Eliyabu ɲa na jo wuyɛ funŋɔ ni na: «Nakaara baa wemu Tɛhɛnɛ Baa Kilɛ ya shɔɔnri lɔ ge, wee niyerege ki wa mɛ wu ɲaha tàan.» 7 Ga a Tɛhɛnɛ Baa Kilɛ di Samuwɛli pye: «Ma ganha bu wu wii wu ceepuuro te, kelee wu tɔɔngɔ ke ni wɛ, nɛ ta sɔɔ we na wɛ. Nɛ ya keree jate kɔɔn ba sipyiyawyii ɲɛ-ɛ wɛ. Kpɛɛngɛ ɲɛɲaa jate sipya ya gɔɔn, Tɛhɛnɛ Baa Kilɛ di zɔ jate kɔɔn.»
8 Wee tuun wu ni a Zhese di Abinadabu yiri na wu pa doro Samuwɛli ɲaha tàan. Ga a Samuwɛli di jo: «We bɛ ɲɛ Tɛhɛnɛ Baa Kilɛ wo ɲidaan wo wu wɛ.» 9 A Zhese di Shama pye wʼa toro, a Samuwɛli di jo: «We bɛ ya pye Tɛhɛnɛ Baa Kilɛ wo ɲidaan wo wu wɛ.» 10 A Zhese di wu jalaa gbarashuun wu bɛɛri pye pʼa toro mu nigin nigin na Samuwɛli ɲahagbaa na, a Samuwɛli di jo: «We wa shishiin ya pye Tɛhɛnɛ Baa Kilɛ wo ɲidaan wo wu wɛ.» 11 Lee kadugo na a Samuwɛli di Zhese pye: «Mu wo jalaa pu bɛɛri pu ɲɛ piiri ya?» A Zhese di wu pye: «Kurogo wo wu wʼa kori, ga wee di ɲɛ yatɔɔnahama ni.» A Samuwɛli di Zhese pye: «Wa tun shɛ wu yiri, wèe wʼa da li wɛ, fo wu bu shɛ nɔ naha.»
12 Wee tuun wu ni a Zhese di tuduro tun pʼa shɛ wu yiri na pa. Wu bi ɲaaŋa, wu ceepuuro ti lemɛ dʼa ɲɔ, wu ɲìi ki bɛ dʼa ɲɔ. A Tɛhɛnɛ Baa Kilɛ di Samuwɛli pye: «Yìri mʼa we tìre, wee wu wa.» 13 A Samuwɛli di yenɛ li lɔ, na sìnmɛ pu taga wu tìre wu ɲahafɛɛ pu niŋɛ ni. Na co kee caŋa ki na, a Tɛhɛnɛ Baa Kilɛ wo Munaa lʼi digi Dawuda na ni fanha ni. Samuwɛli wi ge, a wee di guri kari Arama kulo li ni.
Dawuda ya kapyeŋɛɛ pyi Sɔli mu
14 Ayiwa, a Tɛhɛnɛ Baa Kilɛ wo Munaa lʼi Sɔli yaha, a munakuunɔ la di jé wu ni na yìri Tɛhɛnɛ Baa Kilɛ yíri, na ganha na wu kana. 15 A Sɔli wo kapyebyii pʼi wu pye: «Li wii, Tɛhɛnɛ Baa Kilɛ ya munakuuŋɔ la yaha li na mu kana. 16 Wù kafɔɔ, wʼà nuri ma ɲɔ na, wèe wa ma yahama ni, ná wemu wʼa koni ɲaha cɛ xuuni ge, wù na zhɛ wee wa sha ba. Tɛhɛnɛ Baa Kilɛ ba munakuunɔ li yaha lʼa pa jé ma ni tuun wemu ni, wee na da koni wu kpɔɔn, lee na ma ɲaha ɲiŋɛ.» 17 A Sɔli di pu pye: «Ná wemu wʼa koni cɛ xuuni ge, yi wee wa sha pa na kan.»
18 A kapyebye wa di jo: «Nɛ Bɛtilɛhɛmu shɛɛn Zhese wo ja wa cɛ, wee ya sii koni cɛ xuuni. Kashɛnŋmɔ wʼa wii bɛ, kashɛn naŋmaga. Wʼa jomɔ cɛ xuuni, na ɲɛ naɲisaana, Tɛhɛnɛ Baa Kilɛ bɛ di ɲɛ ni wu ni.» 19 A Sɔli di tudunmɔɔ yaha pʼa shɛ yi jo Zhese mu na: «Ma ja Dawuda we wu wa dubyaa pu fɛni ge, wu yaha pa na kan.» 20 A Zhese di kafaŋa ka co, na ki tugo buuri na, na duvɛn le forogo ni na taha wà, na sikapige taha wà, na yee kan wu ja Dawuda mu wu shɛ gan Sɔli mu. 21 A Dawuda di shɛ nɔ, na labye ɲɔ kɔn Sɔli mu. A wu kaa di daan Sɔli ni fo xuuni, a Sɔli di wu pye wu kashɛn yagboyo yi lɔvɔɔ. 22 A Sɔli di tuduro yaha shɛ jo Zhese mu na: «Nʼa ma ɲɛɛri jo ma Dawuda yaha na mu, bani wu kaa lʼa dan na ni.» 23 Ba Tɛhɛnɛ Baa Kilɛ ya munakuunɔ li yaha tigi Sɔli na tuun bɛɛri ni wɛ, Dawuda na koni wu lɔ, na ganha na wu kpɔɔn. Ba lee ya pye wɛ, Sɔli na wuyɛ ta, wu xakili wu na dɛɛn, munakuunɔ li ma laha wu na.