Sɔli ya se ta Amalɛki shi wu na
15
Caŋa ka a Samuwɛli di ba Sɔli pye: «Go nɛ Tɛhɛnɛ Baa Kilɛ bi tun nɛ shɛ mu tìre† na pye wu wo sipyii pu wo saan, pee piimu pu ɲɛ Izirayɛli shɛɛn pu ge. Ayiwa, niwegee shan nimɛ ni Tɛhɛnɛ Baa Kilɛ wo jomɔ pu ni.a 2 Yemu Kashɛn Keye yi Fɔɔ Tɛhɛnɛ Baa Kilɛ ya jo ge, yee yi wa mɛ: ‹Lemu Amalɛki shi wʼa pye Izirayɛli nagoo pu na ge, nʼa da li foo tɔ pu mu. Tuun wemu ni Izirayɛli nagoo pʼa foro Misira fiige ki ni na ma ge, wʼa pa pu koo pari.b 3 Ayiwa, shɛ nimɛ Amalɛki shi shɛɛn pu fɛni, mʼa shɛ pu ni pu keŋɛ yaŋmuyɔ yi bɛɛri kyɛɛgi fɛɛfɛɛ Tɛhɛnɛ Baa Kilɛ mu. Ma ganha bu da zhɛ ɲuŋɔ ɲaari pu na wɛ. Pu namaa ni pu cèe, nɔhɔpiire ni pubinŋɛɛ, niiyɛ ni dubyaa ni sikaa, ɲɔhɔyɔ ni kafaya, yi shɛ yi bɛɛri gbo.› » 4 A Sɔli di wu kashɛnŋmuu pu bɛɛri yiri pa binnɛ, na pu tɔrɔ Telɛmu kulo li ni. A pʼi bɛ ni kashɛnŋmuu tɔdiiye fɛɛ kabɔfoŋɔɔ xhuu shuun (200.000) ni. A Zhuda wo gbawege ki wuu pʼi bye kabɔfoŋɔɔ kɛ (10.000). 5 A Sɔli di gari ni pu ni fo Amalɛki shi shɛɛn kulo le, na shɛ ŋma le wà faaya yi tɛ fawii li ni. 6 A wu Keni shi shɛɛn pu pye: «Yi foro Amalɛki shi shɛɛn pu tɛ ni, yʼi waa laha pu na, kɔnhɔ di ganha bu yi ɲuŋɔ pinnɛ dugo ni pu ni wɛ. Bani tuun wemu ni Izirayɛli nagoo pu bɛɛri ya foro Misira fiige ki ni ge, yee ya pye ɲɔmɛhɛɛ fɛɛ pu shizhaa na.» A Keni shi shɛɛn pʼi laraga kɔn Amalɛki shi wu na.7 Ayiwa, a Sɔli di kashɛn ki ŋmɔ ni Amalɛki shi wu ni, na pu gbo ma lɔ Xhavila kulo li na fo na shɛ nɔ Shuri tajege ki na, Misira fiige ki Kilɛ-nɔhɔ ki na. 8 A wu Agagi ɲìi wo co, Amalɛki shi wu wo saan we, ga na sipyiire tisara bɛɛri gbo. 9 Ga le bɛɛri funŋɔ ni, Sɔli ni kashɛnŋmuu pu ya ta Agagi gbo wɛ. Yapɔrɔyɔ yemu yi ɲɛ nijeye sìnmɛ woyo dubyaa ni sikaa ni niiyɛ ni dubyapiye yi ni ge, pu ya yee bɛ gbo wɛ. Yaŋmuyɔ yemu bɛɛri yi ɲɛ nijeye ge, pu ya yee kyɛɛgi wɛ. Yemu yi ɲɛ yi ya ɲɔ wɛ, ni yemu bɛɛri yi ɲɛ ɲuŋɔ baa ge, a pʼi yee kyɛɛgi.
Kilɛ ya she saannaa Sɔli ni
10 Wee tuun wu ni a Tɛhɛnɛ Baa Kilɛ di Samuwɛli pye: 11 «Nɛ na Sɔli pye saan li daajeŋɛ kʼa jé nɛ ni, bani wʼa ɲuŋɔ nari nɛ na, wu ya nɛ jomɔ pu logo wɛ.» A pee jomɔ pʼi Samuwɛli luu yirige, a wu piige ki bɛɛri pye na Tɛhɛnɛ Baa Kilɛ ɲɛɛri. 12 Ɲimuguro ti na a Samuwɛli di ba sɔɔ yìri, na gari Sɔli fɛni. Na wu yaha koo li na, a pʼi wu pye: «Sɔli ya kari Karimɛli ni, na shɛ beni wa yereŋɛ wà wemu na da wu funŋɔ tirige ni wuyɛ kaa ni ge. Lee kadugo tàan a wu guri kari Giligali ni.» 13 Ayiwa, ba Samuwɛli ya pa shɛ Sɔli ɲa wɛ, a Sɔli di jo: «Kilɛ wu duba ma mu! Tɛhɛnɛ Baa Kilɛ ya yemu jo ge, nɛ yi koo ɲaari.» 14 Ga a Samuwɛli di wu pye: «Li bi ɲɛ mu, dubyaa ni niiyɛ yemu wo mɛhɛɛ nʼa nuri mɛ ge, kee di ɲɛ kiikɛ wɛ?» 15 A Sɔli di wu pye: «Amalɛki shi shɛɛn pu yíri kashɛnŋmuu pʼa yìri ni yi ni. Bani pʼa yapɔrɔyɔ yi bɛɛri nijeye shɔɔnri, na pʼi ba yi pye saraga Tɛhɛnɛ Baa Kilɛ, ma Kilɛ wu mu. Yisaya yi yi ge, wèe ya yi bɛɛri kyɛɛgi.»
16 A Samuwɛli di din Sɔli na na: «Yere mɛ! Yemu Tɛhɛnɛ Baa Kilɛ ya jo nɛ mu nibiige ki ni ge, yere di yee jo ma mu.» A Sɔli di jo: «Yi jo!» 17 A Samuwɛli di jo: «Tuun wemu ni mu bye nɔhɔcɛrɛɛ wemu ya shoo wuyɛ ni ge, ta wee tuun wu ni bɛ mu ya pye Izirayɛli gbaweye yi bɛɛri ɲuŋɔfɔɔ wɛ? Ta Tɛhɛnɛ Baa Kilɛ bɛ wʼa mu tìre na pye Izirayɛli wo saan wu wɛ? 18 Tɛhɛnɛ Baa Kilɛ ya mu tun, na mu pye na mu wu shɛ ye sipyikuuyo ye bɛɛri kyɛɛgi laha wà fɛɛfɛɛ, pee piimu pu ɲɛ Amalɛki shi shɛɛn pu ge, na mu wu shɛ kashɛn kɔn pu na, mʼa pu gbo, mʼa pu shi tɔ fɛɛfɛɛ. Ta di bɛ-ɛ? 19 Ayiwa, ni li ɲɛ mu, ɲaha na mu di ya ta Tɛhɛnɛ Baa Kilɛ ɲɔmɛɛ co-e wɛ? Ɲaha na mu da gburogi tɔ naafuu na, na kakuunɔ pye Tɛhɛnɛ Baa Kilɛ na wɛ?»
20 A Sɔli di Samuwɛli pye: «Nɛ Tɛhɛnɛ Baa Kilɛ jomɔ pu logo dɛ! Koo lemu Tɛhɛnɛ Baa Kilɛ ya le nɛ tàan ge, lee nɛ ɲaari. Nɛ Amalɛki shi shɛɛn pu bɛɛri gbo, na Agagi co na pa, pu wo saan we. 21 A kashɛnŋmuu pʼi yapɔrɔyɔ yi nijeye shɔɔnri kashɛn ki yaŋmuyɔ yi ni, na pʼi ba yee wolo saraga ma Kafɔɔ Tɛhɛnɛ Baa Kilɛ wu mu naha Giligali ni.»
22 Ga a Samuwɛli di jo:
«Saraya nizogoyo ni saraya yatii bɛ,
ta yee wo keree kʼa bɛ Tɛhɛnɛ Baa Kilɛ mu
na toro Tɛhɛnɛ Baa Kilɛ yɛpyaa wo ɲɔmɛcoro tàan?
Bada! Na Tɛhɛnɛ Baa Kilɛ ɲɔmɛɛ co,
lee ya ye saraga na.
Na mayɛ tirige Tɛhɛnɛ Baa Kilɛ mu,
lee ya ye dubyapee sìnmɛ na na pee wolo saraga.
23 Nakaara baa, ma nʼa she le mayɛ ni,
lee ni celɔbyii wo jurumu wu bɛɛri wu ɲɛ nigin.
Gazhiire ni yapɛɛgaan wo jurumu wu bɛɛri wu ɲɛ nigin.
Ba mu ya she Tɛhɛnɛ Baa Kilɛ wo jomɔ pu ni wɛ,
mu Tɛhɛnɛ Baa Kilɛ bɛ ya she mu ni.
Mu da ba bye nige saan wɛ.»
24 Ayiwa, a Sɔli di Samuwɛli pye: «Jurumu nɛ pye. Nɛ ta Tɛhɛnɛ Baa Kilɛ wo ɲɔmɛjogoo ki koro ɲaari wɛ, nɛ di ya mu bɛ wo jomɔ pu logo wɛ. Bani nɛ fya sipyii pu na, na pee wo ɲɔmɛɛ co. 25 Nʼa ma ɲɛɛri nimɛ jo ma ɲɔ mayɛ na mʼa na wo jurumu wu yafa na mu, mʼa binnɛ shɛ ni na ni, kɔnhɔ di shɛ Tɛhɛnɛ Baa Kilɛ pɛlɛ.» 26 Ga a Samuwɛli di wu pye: «Nʼa da guri zhɛ ni ma ni wɛ. Mu ya she Tɛhɛnɛ Baa Kilɛ wo jomɔ pu ni, lee na Tɛhɛnɛ Baa Kilɛ bɛ ya she mu ni. Mu da ba bye nige saan Izirayɛli shɛɛn pu ɲuŋɔ ni wɛ.»
27 Ba Samuwɛli ya kadugo le na da da gaaŋi wɛ, a Sɔli di wu co wu fadeŋɛ ki ɲɔwaŋa ki na, a kʼi shɛɛngi. 28 A Samuwɛli di wu pye: «Tɛhɛnɛ Baa Kilɛ bɛ ya Izirayɛli wo saanra ti shɛɛngi na wolo mu keŋɛ ni niɲaa, na ti kan watii mu wemu ya ye mu na ge. 29 Izirayɛli wo Kilɛ nɔɔrɔ wo wu da ga kafinɛyɛ jo wɛ, wu fungɔngɔ di wa figi na ɲɛri bɛ wɛ, bani wu ɲɛ sipyiyawyii wu fungɔngɔ kʼa figi kʼa ɲɛri wɛ.» 30 A Sɔli di jo: «Nɛ jurumu pye. Ga nʼa ma ɲɛɛri jo ma ɲɔ mayɛ na, mʼa baraga taha na na na shi shɛɛn pu nɔhɔlɛɛ pee ni Izirayɛli ɲaha tàan, mʼa binnɛ ni na ni kɔnhɔ di shɛ Tɛhɛnɛ Baa Kilɛ, ma Kilɛ wu pɛlɛ.»
31 Lee funŋɔ ni a Samuwɛli di guri kari ni Sɔli ni, a Sɔli di shɛ nuguro sin na Tɛhɛnɛ Baa Kilɛ pɛlɛ.
32 Lee kadugo na a Samuwɛli di jo: «Pa ni Agagi ni na mu, Amalɛki shi shɛɛn pu wo saan we.» Ba pʼa shɛ Agagi yiri wɛ, a wu fundanga wo di fulo Samuwɛli na, bani wu bi giin na xu wo zoro wu sanha ya lii wee na. 33 A Samuwɛli di jo: «Mu wo ŋmɔpara lʼa cèe pii buun pu nagoo ni buungana lemu na ge, lee buungana le na mu bɛ wo nu wʼa da ba buun mu ni niɲaa.» A Samuwɛli di Agagi gbo Tɛhɛnɛ Baa Kilɛ ɲaha tàan Giligali ni.
34 Lee kadugo na, a Samuwɛli di guri kari wu kaban Arama ni, a Sɔli di guri kari wu kaban Gibeya ni, wu wo kulo le. 35 Fo na shɛ Samuwɛli wo caŋa ɲii li xɔ, wu ya shɛ nige Sɔli yíri wɛ. Samuwɛli bi mɛɛ suu tuun bɛɛri ni Sɔli kaa na. Ga na wu teŋɛ saanra ti na Izirayɛli ɲuŋɔ ni, lee wo daajeŋɛ bi jé xɔ Tɛhɛnɛ Baa Kilɛ ni.