Izirayɛli gbaweye yisaya ya shɛ kashɛn kɔn Bɛnzhamɛ wo gbawege ki na
20
Ayiwa, a Izirayɛli nagoo pu bɛɛri di puyɛ pinnɛ, na lɔ Dan na fo na shɛ nɔ Bɛɛrisheba na, ni Galadi fiige ke, a pu bɛɛri di ba na ba binnɛ ba shɛn nigin ɲɛ wɛ, Tɛhɛnɛ Baa Kilɛ ɲaha tàan Misipa kulo li ni. 2 Izirayɛli nagoo pu bɛɛri wo gbaweye yi bɛɛri wo ɲuŋɔfɛɛ pu bi pa na ba yere Kilɛ wo sipyiire ti ni. Kashɛnŋmuu namaa tɔdiiye fɛɛ kabɔfoŋɔɔ xhuu shishɛɛrɛ (400.000), pee bɛɛri ya ŋmɔparaa cɛ.3 A Bɛnzhamɛ wo gbawege kʼi yi logo na Izirayɛli nagoo pusamaa ya pa binnɛ Misipa kulo li ni.
A Izirayɛli nagoo pʼi jo: «Tagana lemu na le kakuunɔ le ya yee ta ge, yi li tagana li jo wù mu.» 4 Ba lee ya pye wɛ, a Levi wo tirige shɛn ná we, cee wemu pʼa gbo ge, wee wo poo we, a wee di jo: «Nɛ ni na furu pɔbaa shɔ wʼa nɔ caŋa ka Gibeya kulo li ni Bɛnzhamɛ wo tirige shɛɛn pu wo kulo le, kɔnhɔ wù shɔn wà. 5 A Gibeya wo sipyigbɔɔ pʼi yìri nɛ fɛni, puga kemu ni nɛ bi bye ge, a pʼi ba kee kuuri piige ki ni. Nɛ pʼa bi zhaa di gbo, ga na nɛ furu pɔbaa shɔ wu sha fo na wu pye wʼa xu. 6 A nɛ na shɔ wu nixhugo ki kɔn na pye tahaa tahaa, na kee tahaa ki yaha kari mu Izirayɛli fiige ki bɛɛri ni, bani tanhaŋa kaa, kakuudiinɛ pʼa pye Izirayɛli ni. 7 Yee Izirayɛli nagoo bɛɛri pu wa naha, yi tiin yʼi jo yʼi bɛ fungɔngɔ ka na!»
8 A sipyiire ti bɛɛri di yìri ba shɛn nigin ɲɛ wɛ, na jo: «Wèe wa shɛn nigin bɛ wa da jé wu fàya puga wɛ, sipya bɛ wa da zhɛ wu puga wɛ. 9 Lemu wèe wa da bye Gibeya shɛɛn pu na ge, lee li wa mɛ: Wʼà da ba kagaanshaan pye, piimu na ba fɛnhɛ zhɛ do pu na ge, wù pee cɛ. 10 Wù sipyii pu wolo Izirayɛli gbaweye yi bɛɛri ni, wù kɛ kɛ lɔ sipyii xhuu nigin nigin (100) wu ni, wù xhuu nigin nigin (100) lɔ sipyii kabɔfoŋɔɔ nigin nigin (1.000) wu ni, wù kabɔfoŋɔɔ nigin nigin (1.000) lɔ sipyii kabɔfoŋɔɔ kɛ kɛ (10.000) wu ni, pee di shɛ yaligee sha pu pa gan kashɛnŋmuu pu mu piimu na zhɛ do Bɛnzhamɛ koomɔ pu wo Gibeya na ge. Pu ba jo pʼa pa ge, Gibeya shɛɛn ya kakuudiinɛ lemu pye Izirayɛli fiige ki ni ge, pu na ba wù ta wʼà li foo tɔ pu mu.» 11 A Izirayɛli nagoo pu bɛɛri di ba binnɛ mu lee pinnɛgana li na ba shɛn nigin ɲɛ wɛ Gibeya kulo li fɛni.
12 A Izirayɛli gbaweye yʼi namaa pii tun Bɛnzhamɛ wo tirige shɛɛn pu bɛɛri mu, na pu shɛ pu pye na: «Ɲaha kʼa pa ni le kakuunɔ le bye ni yee mu wɛ? 13 Nimɛ, piimu pu wa Gibeya ni na kapopaya yi pyi ge, yi pee ɲɔ yaha wù mu wù pu gbo, kɔnhɔ wù le kakuunɔ le xɔ laha wà Izirayɛli ni.» Ga Bɛnzhamɛ wo tirige shɛɛn pu ya ta sɔɔ na pu ceboronamaa Izirayɛli nagoo pu jomɔ pu logo wɛ.
14 A Bɛnzhamɛ wo tirige shɛɛn pu bɛ di foro pu wo kulogoo ki ni, na shɛ binnɛ Gibeya kulo li ni, kɔnhɔ pʼi kashɛn ŋmɔ ni Izirayɛli nagoo pusamaa ni. 15 Bɛnzhamɛ wo tirige shɛɛn piimu pʼa bi pa na yìri kulogoo ki ni ge, a pʼi pee tɔrɔ: Namaa kabɔfoŋɔɔ kɛlɛɛ shuun ni gbaara (26.000) pee piimu ya ŋmɔparaa yogo cɛ ge, Gibeya kulo li niŋɛ bye pee ni wɛ. A pʼi Gibeya kulo li wuu pu tɔrɔ a pee di bɛ ni kashɛn naŋmaya xhuu gbarashuun (700) ni. 16 Pee sipyii pii bɛɛri ni, kashɛn naŋmaya xhuu gbarashuun (700) bye wà piimu ɲɛ kamuunɔɔ ge. Wee wa bɛɛri bu sɔwa kagereŋɛ taga ɲuzhige peele, wu ya ki waa na foni wɛ. 17 A pʼi Izirayɛli bɛ wo namaa pu tɔrɔ, pu ya ta Bɛnzhamɛ wo gbawege ki niŋɛ le mu ni wɛ. A pee di bɛ ni namaa kabɔfoŋɔɔ xhuu shishɛɛrɛ (400.000) ni, piimu ya ŋmɔparaa yogo cɛ ge, pu bɛɛri ya kashɛn ɲaha cɛ. 18 A Izirayɛli nagoo pʼi gari Bɛtɛli ni, na shɛ Kilɛ yege na: «Wekɛ wʼi da vɛnhɛ zhɛ kashɛn ki ɲɔ kɔn shɛnshiimɛ Bɛnzhamɛ wo tirige shɛɛn pu na wèe ni wɛ?» A Tɛhɛnɛ Baa Kilɛ di pu ɲɔ shɔ na: «Zhuda wo tirige shɛɛn pee.»
19 Ayiwa, ɲisɔɔgɔ ki na, a Izirayɛli nagoo pʼi shɛ pu kashɛn keŋɛ ki sin Gibeya kulo li tàan. 20 A Izirayɛli wo namaa pʼi foro kashɛn ki kaa na. A pʼi gbegele shɛ yere Bɛnzhamɛ wo tirige shɛɛn pu fɛni Gibeya ɲahagbaa li na. 21 A Bɛnzhamɛ wo tirige shɛɛn pʼi foro Gibeya kulo li ni, na Izirayɛli shɛɛn kabɔfoŋɔɔ kɛlɛɛ shuun ni shuun (22.000) gbo kee caŋa ke kashɛn sige ki ni. 22 A sipyiire te, Izirayɛli nagoo pee, a pʼi lowaa le puyɛ ni, na gbegele sanha na shɛ yere cazhiige ki wo tayerege ki ni. 23 Ga sani pu shɛ ge, a pʼi fɛnhɛ kari Tɛhɛnɛ Baa Kilɛ yíri, na shɛ mɛɛ su wee fɛɛ ni fo na shɛ nɔ yakoŋɔ ki na, na wu yege na: «Ta wèe ya yaa na gbegele na shɛ kashɛn kɔn sanha wù cebooloo Bɛnzhamɛ wo tirige shɛɛn pu na ya?» A Tɛhɛnɛ Baa Kilɛ di pu ɲɔ shɔ na: «Yi shɛ!» 24 Wee tuun wu ni a Izirayɛli nagoo pʼi gari sanha Bɛnzhamɛ wo tirige shɛɛn pu fɛni caŋa shuun wogo ki na. 25 Kee caŋa bɛ, a Bɛnzhamɛ wo tirige shɛɛn pʼi foro Gibeya ni, na shɛ pu ɲuŋɔ círi. A pʼi namaa kabɔfoŋɔɔ kɛ ni gbarataanri (18.000) gbo Izirayɛli nagoo pu ni, kashɛn sige ki ni. Pee bɛɛri bi ŋmɔparaa yogo cɛ. 26 A Izirayɛli nagoo pu bɛɛri di gari, Bɛtɛli ni. A pʼi shɛ diin wà na mɛɛ suu Tɛhɛnɛ Baa Kilɛ ɲaha tàan. A pʼi suun le kee caŋa ke, fo na shɛ nɔ yakoŋɔ ki na. A pʼi saraya nizogoyo ni ɲaɲiŋɛ saraya wolo Tɛhɛnɛ Baa Kilɛ mu. 27 A Izirayɛli nagoo pʼi Tɛhɛnɛ Baa Kilɛ yege. Wee xuu wu ni Kilɛ wo Kariɲɛɛgɛ Ɲɔmɛɛ li Keshi wu bye wee tuun wu ni. 28 Finiyasi wu bi bye wee tuun wu wo saraya ɲaha shɔɔnrivɛɛrɛ ti na Tɛhɛnɛ Baa Kilɛ ɲaha tàan. Wee bi bye Eleyazari wo ja, na ɲɛ Aarɔn wo ɲabige. A pʼi jo: Wèe ya yaa na gbegele, na shɛ kashɛn kɔn sanha wù cebooloo Bɛnzhamɛ wo tirige shɛɛn pu na laa, wèe ya yaa na shɛ wɛ? A Tɛhɛnɛ Baa Kilɛ di jo: «Yi shɛ, bani ɲiga na nʼa da pu le yi keŋɛ ni.»
29 Ayiwa, a Izirayɛli shɛɛn pii di shɛ ŋma le na Gibeya kulo li maha. 30 Caŋa taanri wogo ki na a Izirayɛli nagoo pusamaa di shɛ do Bɛnzhamɛ wo tirige shɛɛn pu na. A pʼi pu kashɛn gbegemɛ pu pye Gibeya kulo li ɲahagbaa li na, ba tɛɛlɛɛ li ɲɛ wɛ. 31 A Bɛnzhamɛ wo tirige shɛɛ pʼi foro di zhɛ pu ɲuŋɔ círi, na shɛ pu nɔhɔ niinɛ fo na lii kulo li na. A pʼi ɲɔ kɔn na gbuu Izirayɛli nagoo pu ni ma na jo ba pʼa tee li pye toro wɛ. A pʼi kɛlɛɛ taanri (30) gbo Izirayɛli nagoo pu ni Bɛtɛli koo le ni Gibeya koo li na sige ki funŋɔ ki ni. 32 Bɛnzhamɛ wo tirige shɛɛn pu bi yu na: «Wèe ya pu já le bɛ ni, ba wʼà tee na li pyi wɛ!» Ga Izirayɛli nagoo pu bi yu na: «Wʼà fe pu ɲaha na korogoo ki ni, kɔnhɔ wù pu kile pʼi lii kulo li na!» 33 A Izirayɛli nagoo pusamaa bɛɛri di pu tayereye yi yaha, na ba binnɛ Baali-Tamari ni. Izirayɛli nagoo piimu pu bi ŋma wu le ge, a pee di din na foro pu talaraya yi ni Mare-Geba kulo li caŋatomɔ pu ni. 34 Namaa kabɔfoŋɔɔ kɛ (10.000) piimu ɲɛ naŋmaya ge, pee bi foro Izirayɛli nagoo pu bɛɛri ni, na ba binnɛ Gibeya kulo li fɛɛ ni. A kashɛn kʼi wɛri, ga Bɛnzhamɛ wo tirige shɛɛn pu bi li cɛ na kapegee kʼa pee ɲaha mari wɛ. 35 A Tɛhɛnɛ Baa Kilɛ di Bɛnzhamɛ wo tirige shɛɛn pu já na kan Izirayɛli nagoo pu mu. A Izirayɛli nagoo pʼi gbo kee caŋa ke namaa kabɔfoŋɔɔ kɛlɛɛ shuun ni kaguro di xhuu nigin (25.100), pee piimu bi ŋmɔparaa yogo cɛ xuuni ge, na foro Bɛnzhamɛ wu tirige shɛɛn pu ni.
36 Ayiwa, a Bɛnzhamɛ wo tirige shɛɛn pʼi li cɛ na pee wa da se ta nige wɛ.
Ayiwa lee bi Izirayɛli nagoo pu ta pu na fe na gbee Bɛnzhamɛ wo tirige shɛɛn pu ɲaha na, bani ŋmaa we pʼa le Gibeya kulo li fɛni ge, pʼa bi daa wee ŋma we na. 37 Kashɛnŋmuu piimu pu bye ŋma wu ni ge, a pee di foro tɔvuyo na Gibeya kulo li fɛni, na li co, na kulo li shɛɛn pu bɛɛri gbo ni ŋmɔpara ni. 38 Pʼa bi bɛ lemu na ni Izirayɛli wo kashɛnŋmuu pusamaa ni ge, lee li wa mɛ na ŋmalemɛɛ pʼa yaa na wuriluu pye lʼi da yìri lʼa duri kulo li ni. 39 Izirayɛli nagoo pʼa bi ŋmahana kuri, na fe na gbee Bɛnzhamɛ wo tirige shɛɛn pu ɲaha na, a Bɛnzhamɛ wo tirige shɛɛn pii sipyii kɛlɛɛ taanri (30) gbo na xɔ pu ni. Bɛnzhamɛ wo tirige shɛɛn pʼa bi jo na: «Nakaara baa, wèe ya pu já le bɛ ni, ba taashiinɛ lʼa pye wɛ!» 40 Ga a wuriluu di ɲɔ kɔn na yìri kulo li ni na duri. A Bɛnzhamɛ wo tirige shɛɛn pʼi gara wii, na wuriluu ɲa li na yìri pu kulo li ni na duri, kulo li bɛɛri ɲɛ na. 41 Wee tuun wu ni a Izirayɛli nagoo pʼi ŋmahana kuri nimɛ Bɛnzhamɛ wo tirige shɛɛn pu fɛni. Ba Bɛnzhamɛ wo tirige shɛɛn pʼa li ɲa na kapegee kʼa pee le wɛ, a pu jaalaa di yìri. 42 A pʼi ganha na fe na gbee Izirayɛli nagoo pu ɲaha na na se siwaga ki ni. Ga lee bɛ ya pu shɔ wɛ. Piimu pʼa bi ŋma wu le ge, a pee di foro pu fɛni na ganha na pu xuli, bani pʼa bi bye kashɛn kuruyo shuun wu tɛ ni. 43 A Izirayɛli nagoo pʼi Bɛnzhamɛ wo tirige shɛɛn pu le niŋɛ ni, na gbɛri pu na ɲaɲiŋɛ baa, na pu xuli fo na shɛ nɔ Gibeya kulo li shizhaa, Kilɛ-nɔhɔ kacɛ ki na. 44 A pʼi namaa kabɔfoŋɔɔ kɛ ni gbarataanri (18.000) gbo Bɛnzhamɛ wo tirige shɛɛn pu ni. Pee bɛɛri bye kashɛn naŋmaya. 45 Piimu pʼa bi fe na se siwaga ki ni, Irimɔ wo faaboboŋɔ ki yíri ge, a pʼi kabɔfoŋɔɔ kaguro (5.000) ta gbo pee ni korogoo ki na. A pʼi pu nɔhɔ niinɛ fo na shɛ nɔ Gidomu kulo li na, na kabɔfoŋɔɔ shuun (2.000) gbo pu ni sanha. 46 Piimu pʼa xu Bɛnzhamɛ wo tirige shɛɛn pu ni kee caŋa ki ge, a pu bɛɛri di bye namaa kabɔfoŋɔɔ kɛlɛɛ shuun ni kaguro (25.000), pu bɛɛri na ŋmɔparaa yogo cɛ xuuni. Pu bɛɛri bye kashɛn naŋmaya. 47 A sipyii xhuu gbaara (600) di baa kari siwaga ki ni, Irimɔ wo faaboboŋɔ ki na. A pʼi shɛ diin wà na ta yebyaa shishɛɛrɛ. 48 A Izirayɛli nagoo pʼi guri pa Bɛnzhamɛ wo tirige shɛɛn pu fɛni na ba pu gbo ni ŋmɔpara ni, na lɔ kulo li shɛɛn pu bɛɛri na fo na shɛ nɔ yapɔrɔyɔ yi na, ni yara yara bɛɛri pʼa ta ge. Kulogoo kiimu bɛɛri bɛ pʼa ta ge, a pʼi na le kee bɛ na.