Izirayɛli nagoo pʼa cèe kan Bɛnzhamɛ wo gbawege ki mu, kɔnhɔ pʼi bugo sanha
21
Ayiwa, na Izirayɛli nagoo pu yaha Misipa kulo li ni, pʼa bi kàa na wee wa shishiin da ga wu poro kan gbaga ni Bɛnzhamɛ wo tirige shɛn wa mu wɛ. 2 A sipyiire ti bɛɛri di gari Bɛtɛli kulo li ni, na shɛ diin wà Kilɛ ɲaha tàan fo na shɛ nɔ yakoŋɔ ki na. A pʼi ganha na sipyaa waa, na sii mɛhɛɛ su fo xuuni, 3 na jo: «Ee, Tɛhɛnɛ Baa Kilɛ, Izirayɛli wo Kilɛ we, ɲaha na le kaa le shi dʼa pye Izirayɛli fiige ki ni wɛ? Ɲaha na Izirayɛli wo gbawege ka dʼa piin wɛ?» 4 Ɲimuguro ti na, a sipyiire tʼi ba soo yìri, na saraya tawologo ka yàa, na saraya nizogoyo ni ɲaɲiŋɛ saraya wolo kee na. 5 A Izirayɛli nagoo pʼi jo: «Izirayɛli gbaweye yi bɛɛri ni, gbawege kekɛ ki dʼa pye ki ya shɛ pinnɛrɛ ti ni Tɛhɛnɛ Baa Kilɛ ɲaha tàan-i wɛ?» Bani pʼa bi ke kaaga nigbɔhɔ ke kàa na wemu bɛɛri bu bye wu ya shɛ Tɛhɛnɛ Baa Kilɛ ɲaha tàan Misipa kulo li ni wɛ, na pu weefɔɔ gbo.6 Ma li ta Izirayɛli nagoo pu cebooloo pu ɲiɲaara bi jé pu ni, Bɛnzhamɛ wo tirige shɛɛn pee, a pʼi jo: «Ee, ago Izirayɛli gbawege ka kʼa tɔ mɛ niɲaa dɛ! 7 Namaa nigin nigin wemu wʼa shɔ to pu ni ge, mii wèe di da cèe ta di gan pee mu wɛ, bani wèe ya kàa Tɛhɛnɛ Baa Kilɛ na jo wèe wa da ga wu poro kan gbaga ni Bɛnzhamɛ wo tirige shɛn wa mu wɛ?» 8 Wee tuun wu ni, a pʼi jo: «Ta Izirayɛli gbawege ki sipya wa ɲɛ wà, wemu ya ta shɛ Tɛhɛnɛ Baa Kilɛ ɲaha tàan Misipa ni-i ya?» Lee bi li ta Galadi koomɔ pu wo Yabɛshi kulo li shɛn nigin bɛ bi bye pinnɛrɛ ti ni Tɛhɛnɛ Baa Kilɛ ɲaha tàan wɛ. 9 Bani tuun wemu ni pʼa bi sipyiire ti tɔrɔ ge, Galadi fiige ki wo Yabɛshi kulo li shɛn nigin bɛ bye sipyiire ti ni wɛ.
10 Ayiwa lee nibyii na, a sipyiire tʼi kashɛn naŋmaya kabɔfoŋɔɔ kɛ ni shuun (12.000) yaha kari, na pu pye: «Yi shɛ Galadi koomɔ pu ni, yʼi shɛ Yabɛshi kulo li shɛɛn pu gbo, yʼi cèe pee ni nɔhɔpiire ti bɛ gbo. 11 Lemu yʼa da zhɛ bye ge, lee li wa mɛ: Namaa pu bɛɛri, ni cee wemu bɛɛri wʼa sinnɛ ɲa ni ná ni ge, yʼi pee bɛɛri ɲuŋɔ tugo.» 12 A pʼi shɛ doɲiŋɛ pushaa nacɛbaalaa xhuu shishɛɛrɛ (400) ta Yabɛshi kulo li shɛɛn pu ni, Galadi koomɔ pu ni, wee wa sanha sinnɛ ɲa ni ná ni wɛ. A pʼi ba ni pee ni kashɛn keŋɛ ki tasinŋɛ ki ni Silo kulo li ni, Kana fiige ki ni.
13 A sipyiire ti bɛɛri di tuduro yaha shɛ jo Bɛnzhamɛ wo tirige shɛɛn pusamaa mu, pee piimu pʼa paa shɛ lara Irimɔ faaboboyo yi na ge, na yogo kʼa xɔ. 14 A Bɛnzhamɛ wo tirige shɛɛn pʼi ba. Pʼa bi Yabɛshi kulo li pushaa piimu yaha gbobaa Galadi fiige ki ni ge, a pʼi pee kan pu mu. Ga pee cèe pu ya ta pu bɛɛri círi wɛ.
15 Bɛnzhamɛ wo tirige shɛɛn pu ɲiɲaara tʼa bi jé Izirayɛli nagoo pu ni, bani Tɛhɛnɛ Baa Kilɛ bi kapahaŋa kɔn Izirayɛli gbaweye yi na. 16 A ceborogo ki nɔhɔlɛɛ pʼi jo: «Lekɛ wèe di da bye, kɔnhɔ wù cèe ta wù kan Bɛnzhamɛ wo tirige shɛɛn namaa pusamaa mu wɛ, bani cèe wa nige Bɛnzhamɛ wo tirige ki ni wɛ?» 17 A pʼi jo: «Bɛnzhamɛ wo tirige shɛɛn piimu pʼa shɔ to ge, pee ya yaa na nagoo se, kɔnhɔ Izirayɛli nagoo pu wo gbawege ka ganha bu dɔ wɛ. 18 Ga wèe di wa da já wù wo pushaa pu kan pu mu wɛ, bani wèe ya kàa jo wemu bu wu poro kan wèe ni Bɛnzhamɛ wo tirige shɛn wa mu, jo weefɔɔ wu laŋi.» 19 Wee tuun wu ni a pʼi jo: «Yee bɛɛri Tɛhɛnɛ Baa Kilɛ wo kalenɛ la ya byi Silo kulo li ni, Bɛtɛli kulo li suumɔ kulo kacɛ ki na, koo lemu lʼa yìri Bɛtɛli ni, na se Sisɛmu ni ge, lee wo Kilɛ-nɔhɔ ki na, Lebona kulo li woroo kulo kacɛ ki na.» 20 A pʼi Bɛnzhamɛ wo namaa pu pye: «Yi shɛ lara ɛrɛzɛn tiire ti ni, 21 yʼi da kasɛɛgɛ pyi, Silo kulo li pushaa pu ba foro na pu kajoŋɔ ki coni, yʼi gɔn foro ɛrɛzɛn tiire ti ni, wa bɛɛri di Silo kulo li wo doɲiŋɛ pushɔ wa co wʼa gaaŋi Bɛnzhamɛ wo fiige ki ni, wu shɛ bye wu shɔ. 22 Pu tii pee, kelee pu cebooloo pu bu ba pu fiin jo pu keree na wù mu, wù na yi jo pu mu jo: ‹Yi ɲuŋɔ ɲaari pu na, wèe ya ta cèe ta pu bɛɛri mu kashɛn ki ni wɛ. Yee bɛ pu wa cèe pu kan pu mu wɛ, yee da bi pu kan pu mu, wee tuun wu ni yi bi da nahana.› » 23 A Bɛnzhamɛ wo jalaa pʼi li pye mu: A pu bɛɛri di cèe pii co xɔnhɔ-xɔnhɔloo pu ni, na gari ni pee ni pu wo taa ɲiŋɛ ki na. A pʼi shɛ kulogoo ki sinvonɔ sin, na diin diin ki ni.
24 Wee tuun we ni Izirayɛli nagoo pʼa yìri wee xuu wu ni, na gari pu tashɔhɔyɔ ni pu gbaweye yi ni. A wa bɛɛri di gari wu wo taa ɲiŋɛ ki na.
25 Ayiwa, lee caŋa ɲii le ni, saan bye Izirayɛli fiige ki ni wɛ. La bɛɛri bu wemu bɛɛri taan, wʼa lee pye.a