Bɛnzhamɛ wo gbawege ki wo jurumu we
19
Ayiwa, lee caŋa ɲii le ni saan bi bye Izirayɛli fiige ki ni wɛ. Lee bi Levi wo tirige shɛn wa ta nadadɛɛnrɛ na fo Efirayimu wo faaboboyo koomɔ pu sige ki funŋɔ ki ni. Wee bi Zhuda Bɛtilɛhɛmu kulo li wo cee wa lɔ na pye wu shɔ, ga wu furu di ya pɔ wɛ. 2 A cee wu bye ɲɔmɛɛ baa fɔɔ, na foro ná wu mu, na gari wu to wu yíri Zhuda Bɛtilɛhɛmu ni. A wu shɛ diin wà na ta yebyaa shishɛɛrɛ. 3 A ná wu ba yìri, na gari wu fɛni, kɔnhɔ wu shɛ jo ni wu ni wu wu luu ɲiŋɛ, wu guri pa ni wu ni. A wʼi wu kapyebye wu lɔ, ni kafaya shuun. A cee wu shɛ wu tirige wu to wu puga. Ba cee wu to wʼa ná wu ɲa wɛ, na wu ɲuŋɔ círi ni fundanga ni. 4 A wu yafɛna we, cee wu to we, a wee di wu co yaha, a wu cabyaa taanri pye wu mu. A pʼi ganha na li, na gbuu, na shuun wà.5 Ayiwa, caŋa shishɛɛrɛ wogo ki na, a pʼi ba soo yìri. A ná wu pu kari kari yɛrɛyɛ gbegele, a cee wu to wu wu yafɛna wu pye: «Yere mʼa li, mʼa fanha ta, yʼi na yʼa gaaŋi.» 6 A pʼi diin na li, na gba, pu shuun wu bɛɛri. Lee kadugo na, a cee wu to wu cepoo wu pye: «Nʼa ma ɲɛɛri, sɔɔ mʼa piige ki pye naha, mʼa funŋɔ taan!» 7 A ná wu yìri na zhaa da gaaŋi, ga a yafɛna wu nɔrɔ yaha wu na, fo wʼa pa sɔɔ na kee piige ki bɛ pye wà.
8 Ayiwa, caŋa kaguro wogo ki na, a wu ba soo yìri gari wu kaa na. Ayiwa, a cee wu to wu jo: «Nʼa ma ɲɛɛri, kori naha mʼa fanha le mayɛ ni, mʼa caŋa ki ɲiŋɛ.» A pu shuun wu bɛɛri di li. 9 A ná wu yìri na zhaa da gaaŋi ni wu shɔ we, ni wu kapyebye wu ni. Ga a wu yafɛna we, cee wu to we, a wee di wu pye: «Caŋa kʼa xɔ, kariduun wʼa ye, yi piige ki pye naha, nʼa yi ɲɛɛri, caŋa kʼa zhaa di do, yi piige ki pye naha, mʼa funŋɔ taan! Yi na ba soo yìri da gaaŋi ɲiga na ma kaban ki ni.» 10 Ga cepoo wu ya sɔɔ na kee piige ki pye wɛ. A wu yìri, na gaaŋi. A wu shɛ nɔ na saha ni Zhebusi kulo li ni (lee ɲɛ Zheruzalɛmu kulo le), wu ni wu shɔ we, ni wu kafaya shuun we, na yi tugo. 11 Ba pʼa tɛrɛŋɛ Zhebusi kulo li na wɛ, lee bi caŋa ki ta kʼa tigi fo xuuni. A kapyebye wu wu kafɔɔ wu pye: «Nʼa ma ɲɛɛri, wù waa shɛ le kulo le ni, Zhebusi shɛɛn wo kulo le, wù shɛ shɔn wà.» 12 A wu kafɔɔ wu wu pye: «Izirayɛli shɛn ɲɛ kulo lemu ni wɛ, wèe da ga waa di zhɛ jé lee kulo li ni wɛ, Gibeya kulo li ni wʼà da zhɛ shɔn.» 13 A wu nɔhɔ wu kapyebye wu pye sanha na: «Wù la le wù shɛ nɔ Gibeya kulo le, kelee Arama kulo li ni, wù na zhɛ piige ki pye lee kulo la ni.» 14 A pʼi doro na gaaŋi, ba pʼa shɛ dɛrɛŋɛ Gibeya kulo li na wɛ, a caŋa kʼi do. Gibeya bi bye Bɛnzhamɛ wo gbawege ki wo kulo la. 15 A pʼi waa kari Gibeya kulo li ni, kɔnhɔ pʼi shɛ shɔn wà. A pʼi shɛ jé kulo li ni, na shɛ yere kulo li pinnɛrɛ kpɛɛngɛ ki na, ga sipya bɛ ya sɔɔ na pu tirige wu puga wɛ.
16 Lee bi nɔhɔlɛ wʼa ta wʼa yìri wu kɛrɛyɛ ni na ma piige ki ni. Efirayimu wo faaboboyo koomɔ pu shɛn wa wu bye wii, na ɲɛ tiinnɛ na Gibeya kulo li ni, kulo li shɛɛn pʼi ɲɛ Bɛnzhamɛ wo gbawege ki wo sipyii. 17 A wu wu ɲuŋɔ yirige na nabun wu ɲa kulo li pinnɛrɛ kpɛɛngɛ ki na. A nɔhɔlɛ wu wu pye: «Mii mu dʼa yìri wɛ, na se mii wɛ?» 18 A nabun wu wu pye: «Zhuda Bɛtilɛhɛmu ni wèe ya yìri, na se fo Efirayimu faaboboyo koomɔ pu sige ki funŋɔ ki ni. Wà nɛ ɲɛ. Zhuda Bɛtilɛhɛmu ni nɛ bi kari, na guri na se na kaban Tɛhɛnɛ Baa Kilɛ wo Ɲuŋɔ Tacirige Fàya Puga ki xuu wu ni, ga sipya bɛ sanha da wu na tirige wu puga wɛ. 19 Ma li ta bɛ wèe kafaya yi yaligee wa bɛ wèe mu, buuri ni duvɛn bɛ di wa nɛ ni na shɔ we, ni na kapyebye wu mu. Yaaga ka shishiin wa wèe kuuŋɔ wɛ.» 20 A nɔhɔlɛ wu jo: «Yi pama ya ɲɔ! Ma mago wa lemu bɛɛri na ge, nɛ na yere ni yee bɛɛri ni. Ma wa da zhɔn pinnɛrɛ kpɛɛngɛ ki na wɛ!» 21 A wu pu tirige wu puga, na yaligee kan kafaya yi mu. A nabuun pʼi pu tɔɔyɔ je, lee kadugo na, na li, na gba.
22 Ayiwa, na pu fundanga wuu yaha, a kulo li namaa pʼa, sipyipopaya ya, a yee di ba pu puga ki maha, na ganha na gbura ki kuuri fanha na, nɔhɔlɛ wemu wu ɲɛ puga ki kafɔɔ wu ge, na wee pyi na: «Ná wemu wʼa jé ma mu ge, wu yeege naha wù sinnɛ ni wu ni!» 23 A puga ki fɔɔ wu foro pa pu yíri, na ba pu pye: «Ahayi, na cebooloo yi ganha bu da le kakuudiinɛ le pye wɛ, nʼa yi ɲɛɛri. Bani nɛ nabun wu ɲɛ we ná we, yi ganha bu le kakuunɔ le la shi pye wɛ! 24 Li wii, nɛ poro pushɔ wu ɲɛ naha, wu nacɛbaa wo wu ɲɛ, na fara nabunna wu shɔ wu na. Nʼa da pee yeege yi mu, yʼi yi wo ɲidaan wu pye pee na. Ga yi ganha bu le kakuunɔ le la shi pye we ná we na wɛ!» 25 Pu ya ta sɔɔ na wu jomɔ pu logo wɛ. Wee tuun wu ni a nabunna wu wu furu pɔbaa shɔ wu co yeege pu mu kpɛɛngɛ ki na. A pʼi ganha na wu shaa, na sii wu kanha piige ki bɛɛri ni fo na shɛ ɲiga ki ɲɔ taha. Ba ɲimuguɲɔ wʼa nɔ wɛ, a pʼi na wu yaha kari.
26 Ayiwa, ɲisɔɔgbɔhɔ ki na, a cee wu ba, na ba do ná wu puga ki kuɲɔɔ li ɲɔ na, ná wemu mu cee wu poo wʼa tigi ge, fo na shɛ ɲiga ki pye kʼa mugi. 27 Ba ɲiga kʼa mugi wɛ, a wu poo wu gbura ki mugi, na foro na zhaa da gaaŋi. Ga na wu shɔ wu ta wʼa to sanhana kuɲɔɔ li ni, na keye ye taha kuɲɔwege ki na. 28 A wu poo wu wu pye: «Yìri wù da gaaŋi.» Ga cee wu ya jo wɛ. Ayiwa, a wu poo wu wu lɔ taha wu kafaŋa ki na, na gari ni wu ni pu kulo li ni. 29 Ba wʼa shɛ nɔ puga wɛ, na ŋmuu lɔ, na wu shɔ wu kɔn kɔn, yatɛnyɛ yatɛnyɛ, na pye tahaa kɛ ni shuun, na kee tun shɛ mu Izirayɛli fiige ki bɛɛri ni. 30 Piimu bɛɛri pʼa lee ɲa ge, na jo: «Fo caŋa kemu tɛhɛnɛ na Izirayɛli nagoo pu da foro Misira fiige ki ni ge, na co kee caŋa ki na, fo na pa nɔ niɲaa na, le kaa le la tuugo sanha bye ɲa bada wɛ, lʼi sanha logo ɲa bɛ bada wɛ. Yi yi funyɔ sha xuuni, yʼi diin yʼi jo le na.»