Dan wo gbawege kʼa yìri na ɲiŋɛ katii shaa
18
Ayiwa, lee caŋa ɲii le ni, saan bye Izirayɛli fiige ki ni wɛ. A Dan wo gbawege kʼi ba yìri na ɲiŋɛ katii shaa pʼi shɛ diin kee na, bani fo na pa nɔ kee caŋa ki na, pee bi sanha já pu wo taa ɲiŋɛ ki co Izirayɛli gbaweye yi tɛ ni wɛ. 2 A Dan wo tirige shɛɛn pʼi namaa kaguro wa tun na foro pu wo gbawege ki ni, pu wo kashɛn naŋmaya ya, na foro Soreya kulo le ni Ɛsitoli kulo li ni, na pu shɛ fiige ka saala, pʼi ki sɛɛri. A pʼi pu pye: «Yi shɛ ke fiige ke saala.» A pʼi shɛ nɔ Efirayimu wo faaboboyo koomɔ pu ni, Mika wo puga ki na, na piige ki pye wà. 3 Na pu yaha Mika kaban ki ni, a pʼi lɛvɔɔ wu cɛ wu jomɔ pu fɛni. A pʼi fulo wu na, na wu pye: «Jɔgɔ wu dʼa pa naha ni mu ni wɛ? Ɲaha mu di byi we xuu we ni wɛ? Lekɛ li dʼa ma co yaha wee wɛ?» 4 A wu pu pye: «Le ni le Mika ya pye nɛ mu. Wʼa saraa kaan na mu, a nɛ di ɲɛri pye wu saraya ɲaha shɔɔnrivɔɔ.» 5 A pʼi wu pye: «Wʼà ma ɲɛɛri, shɛ Kilɛ yege wii, ɲara lemu na wù wa ge, li bu da li na da ɲɔ, kɔnhɔ wù lee cɛ.» 6 A saraya ɲaha shɔɔnrivɔɔ wu pu pye: «Yʼa se ɲaɲiŋɛ na, ɲara lemu na yi wa ge, Tɛhɛnɛ Baa Kilɛ wʼa ɲii shan li na.»7 A namaa kaguro wu gari, na shɛ nɔ Layishi kulo li ni. Sipyii piimu pu bye wà ge, a pʼi pee ta ɲaɲiŋɛ na ɲɛ pu na, ba Sidɔn shɛɛn pu ɲɛ wɛ, pu ɲahaya yʼa ɲiŋɛ, pu xakilee dʼa tiin. Pu tiinɲii nigin bɛ ɲɛ tiinbɛnmɛ fɔɔ wɛ. Sipya bɛ di ya ɲaa woni pu ɲuŋɔ ni wɛ. Pu ni Sidɔn shɛɛn pʼa lii puyɛ na, kariɲɛɛgɛ di ɲɛ pu ni sipya bɛ tɛ ni wɛ. 8 A namaa kaguro wu guri pa pu cebooloo pu yíri Soreya kulo le ni Ɛsitoli kulo li ni. A pu cebooloo pʼi ba pu yege na: «Dii yi dʼa shɛ keree ki ta wɛ?» 9 A pʼi jo: «Wù shɛ do pu na! Wèe ya shɛ fiige ki ɲa, kʼa sii ɲɔ fo xuuni. Nakaara ti wa yee ni gɛ? Yi ganha bu yatɛnyɛ gbo wɛ. Yi yìri yʼi dii fiige ki na, yʼi shɛ ki co! 10 Yi ba shɛ jé ki ni, yi na ki sipyii pu ta ɲaɲiŋɛ fɛɛ. Fiige kʼa pɛlɛ, Tɛhɛnɛ Baa Kilɛ dʼa ki kan bɛ yi mu. Yara bɛɛri li wa ke ɲiŋɛ ke na ge, yee bɛɛri wa kee fiige ki ni.»
11 Ayiwa, a namaa xhuu gbaara (600) di foro Dan wo gbawege ki ni, Soreya kulo le, ni Ɛsitoli kulo li ni, na kari ni pu kashɛn yagboyo yi ni. 12 A pʼi gari na shɛ pu kashɛn keŋɛ ki sin Kiriyati-Yarimu kulo li tàan, Zhuda wo koomɔ pu ni. Lee na pʼa wee xuu wu mɛgɛ yiri na Maxhane-Dana fo na pa nɔ niɲaa na. Wee xuu wu wa Kiriyati-Yarimu kulo li caŋatomɔ pu ni. 13 A pʼi yìri wà, na gari Efirayimu wo faaboboyo koomɔ pu ni, na shɛ nɔ Mika wo puga ki na. 14 Ayiwa, sipyii kaguro wemu wʼa fɛnhɛ shɛ Layishi fiige ki saala ge, a pee di pu cebooloo pu pye: «Ta yee ya li cɛ na efodi†,b ni yapɛrɛɛ, ni warifyɛn yapɛrɛ li wa ke puga ke ka ni ya? Yʼa yaa na lemu pye ge, yʼa lee cɛ nimɛ.» 15 A pʼi waa jé wà, na shɛ nɔ Levi wo tirige shɛn lɛvɔɔ wu wo puga ki na, Mika kaban ki ni, na wu shaari, na wu yege na ta wʼa cuuŋɔ? 16 A Dan wo tirige shɛɛn namaa xhuu gbaara (600) wu yere kuɲɔɔ, li ɲɔ na, ni pu kashɛn yagboyo yi ni. 17 Namaa kaguro wemu wʼa fɛnhɛ shɛ fiige ki saala ge, a pee di jé na efodi† we, ni yapɛrɛɛ kee, ni warifyɛn yapɛrɛ li lɔ, lee di saraya ɲaha shɔɔnrivɔɔ wu niyerege ta kuɲɔɔ li ɲɔ na ni namaa xhuu gbaara (600) wu ni pu kashɛn yagboyo yi ni. 18 Ba pʼa jé Mika kaban ki ni na wu efodi† we, ni wu yapɛrɛɛ kee, ni wu warifyɛn yapɛrɛ li lɔ wɛ, a saraya ɲaha shɔɔnrivɔɔ wu pu pye: «Ɲaha yee di byi naha wɛ?» 19 A pʼi wu ɲɔ shɔ na: «Cari mayɛ na, ma keŋɛ ki taha ma ɲɔ ki na, mʼa daha wù fɛni. Pye wù to ni wù saraya ɲaha shɔɔnrivɔɔ. Na pye shɛn nigin pe wo puga ki wo saraya ɲaha shɔɔnrivɔɔ, kelee na pye gbawege ka, kpuun la wo saraya ɲaha shɔɔnrivɔɔ Izirayɛli ni, lekɛ lʼa pɔrɔ mu mu wɛ?» 20 A lee di daan saraya ɲaha shɔɔnrivɔɔ wu ni, a wʼi efodi† wu lɔ, ni yapɛrɛɛ kee, ni warifyɛn yapɛrɛ le, na daha pu fɛni.
21 A pʼi guri kari, na kpɔnhɔɔ kee ni yapɔrɔyɔ ye, ni tuguro ti lɔvɛɛ pu torogo puyɛ ɲaha na. 22 Na pu ta pʼa lii na xɔ Mika wo puga ki na, a Mika wo tiinɲii pʼi puyɛ yiri yiri, na yìri na Dan wo gbawege ki sipyii pu nɔhɔ niinɛ. 23 A pʼi ganha na mujoŋɔɔ waa Dan wo gbawege ki sipyii pu mu, a pee di ba ŋmahana ɲɛri, na Mika pye: «Ɲaha kʼa pye wɛ? Te sipyiire te wo kapinnɛnɛ ɲuŋɔ di ɲɛ lekɛ wɛ?» 24 A Mika di jo: «Na kilɛlɛɛ, pee piimu nɛ yàa ge, yee ya pu lɔ na fara saraya ɲaha shɔɔnrivɔɔ wu bɛ na, na kari. Ɲaha ki dʼa kori nɛ mu wɛ?» A yʼi nɔhɔ na na yegee sanha na: «Ɲaha kʼa pye wɛ?» 25 A Dan jalaa pʼi wu pye: «Ma ganha bu wù ɲuwegee tanha wù na wɛ, lee bɛ wɛ wèe wo sipyii pii loyiregee wuu na ba do yi na, lee na ma ɲuŋɔ tugo, na ma puga ki bɛ ɲuŋɔ tugo.» 26 A Dan wo jalaa pʼi koo lɔ na gaaŋi. Mika ya li ɲa na pu fanha ya ɲɛhɛ wee wogo ki na ge, na guri kari wu puga.
Dan wo kulo le ni li saraya tawologo
27 Ayiwa, yaŋmuyɔ yemu Mika bi yàa ge, a Dan wo gbawege kʼi yee lɔ mu lee lɔgana li na, na gari ni wu saraya ɲaha shɔɔnrivɔɔ wu bɛ ni. A pʼi shɛ do Layishi kulo li na, lee kulo lemu li bye fɛrɛmɛ ni ɲaɲiŋɛ na ge. A pʼi ŋmɔpara taga pu bɛɛri ɲuŋɔ tugo, na na le kulo li na. 28 Sipya bɛ ya ta pu ɲuŋɔ wolo wɛ, bani pu bi lii Sidɔn kulo li na, kariɲɛɛgɛ di ɲɛ pu ni sipya wa shishiin bɛ tɛ ni wɛ. Faaya yi tɛ logoro li ni pu kulo li bye, lee lemu lʼa kari Bɛti-Erobu shizhaa na ge. Lee kadugo na, a Dan wu tirige shɛɛn pʼi kulo li yereŋɛvonɔ yereŋɛ, na diin li ni. 29 A pʼi pu sefɛlɛ mɛgɛ le kulo li na na Dan. Dan bi bye Izirayɛli wo ja. Ga kulo li mɛgɛ ki bi fɛnhɛ pye na Layishi. 30 A Dan jalaa pʼi lee yapɛrɛ li sin puyɛ mu. Manase ja Gɛrɛshɔn, wee wo ja Zhonatan, a wee ni wu jalaa pʼi bye Dan wo gbawege ki wo saraya ɲaha shɔɔnrivɛɛ, fo na shɛ nɔ caŋa kemu pʼa pa pu kuu na kari bulooro ti na ge. 31 Mika bi warifyɛn yapɛrɛ lemu yàa ge, a pʼi lee sin puyɛ mu. Kilɛ wo Ɲuŋɔ Tacirige Fàya Puga kʼa tuun wemu bɛɛri pye Silo kulo li ni ge, a Mika bɛ wo warifyɛn yapɛrɛ lʼi wee tuun wu bɛɛri pye Dan wo tirige shɛɛn pu mu.